Diosmanta willakuypim yanapakunku: México nacionpi

ANCHA kusikunapaqmi achka mozo sipaskuna imakunatapas saqespanku Diosmanta willakuyninkupi anchata kallpanchakusqankuqa (Mat. 6:22). ¿Ima sasachakuypim tarikunku? Chayta kutichinapaq qawasun México nacionman astakuspanku chaypi serviq iñiqmasinchikkunamanta.

“IMAYNA KAWSASQAYKUTAM CAMBIANAYKU KARQA”

Estados Unidos nacionniyoq Dustin hinaspa Jassa iñiqmasinchikkunam 2007 watapa enero killanpi casarakurqaku. Casarakusqanku qepallamanmi munasqankuman hina rantirurqaku huk taksa buqueta chaypi kawsanankupaq. Chay buqueqa Astoria llaqtapim karqa (Oregón, Estados Unidos), chay llaqtaqa Pacífico lamar qochapa hichpallanpim kachkan, muyuriqninpim qawakun ritiyoq orqokuna chaynataq sachakunapas. Dustinmi nin: “Maymanña qawaptikipas sumaqllañam rikukuq”, nispa. Dustinwan señoranqa manam iskayrayarqakuchu Jehova Diospi hapipakusqankutaqa, manataqmi ancha kapuqniyoqtaqchu karqaku, paykunaqa iskayllankupaq taksa buquellapim yacharqaku, manataqmi tukuy tiempochu llamkaqku, mana rimasqanku rimaypi kaq congregacionpitaqmi huñunakurqaku hinaspapas wakin killakunapim precursor auxiliar karqaku. Ichaqa tiempo pasaruptinmi cuentata qokururqaku tukuy tiemponkuwan Diosta mana servisqankuta. Dustinmi nin: “Congregacionta yanapanaykumantaqa buque allichaypim tiempoykuta usuchiq kaniku. Cheqaptapuni Jehova Diospa munayninta puntapi churanaykupaqqa, imayna kawsasqaykutam cambianayku karqa”, nispa.

Señoran Jassapas nintaqmi: “Manaraq casarakuspaymi México nacionpi yacharqani hinaspam ingles rimaypi congregacionman rirqani. Chaypi yanapakusqayqa anchatam kusichiwarqa chaymi kutiyta munarqani”, nispa. Huk nacionpi serviy munasqankuta astawan kallpanchanankupaqmi familiawan Dios yupaychasqankupi leeyta qallaykurqaku huklawman astakuspanku achka runakunata yanapaq cristianokunapa vidankumanta (Juan 4:35). Dustinmi nin: “Ñoqaykupas paykuna hinam kusisqa kayta munarqaniku”, nispa. México nacionpi yachaq amistadninkunam willaykurqaku chay nacionpi huk kaqnin llaqtachapi yanapakuyta necesitasqankumanta, chaymi paywan señoranqa tantearurqaku chay lawman astakunankupaq. Chaypaqmi llamkayninkuta saqerurqaku, buquentapas rantikururqakum.

“IMAMANTAPAS ASWAN ALLINPUNIM KARQA”

Dustinqa señoranwanmi Tecomán niq llaqtaman astakururqaku, chay llaqtapas karqa Pacífico lamar qochapa hichpallanpim, Astoria llaqtamanta yaqa 4.300 kilometropi. Dustinmi nin: “Sumaq orqokunatawan sumaq wayrapa kasqanpi yachasqaykumantaqa, kunanqa llumpay rupaypa kasqanpi hinaspa limon sachakunapa kasqanpiñam yachanayku karqa”, nispa. Qallariypiqa manam llamkayta tarirqakuchu hinaspapas as qollqeyoqlla kasqankuraykum yaqa sapa semana huk punchawpi iskay kutita arroztawan frijolkunallata mikuqku. Jassa señoranmi nin: “Hina chay mikuyllata amiruptiykum qonqayllamanta ñoqaykuwan estudiaq runakuna qowarqaku mangokunata, platanokunata, papayakunata hinaspa ¡bolsakunapi achka limonkunatapas!”, nispa. Tiempopa risqanman hinam, Internet nisqantakama huk rimaykunata yachachiq escuelapaq llamkayta qallaykurqaku, chay escuelaqa Taiwán nacionpim karqa. Kunanqa llamkasqankumanta qollqe chaskisqankum yanapan imapas necesitasqankuta rantinankupaq.

Ichaqa, ¿kusisqachu tarikunku chaynata kawsaspanku? Iskayninkum ninku: “Kayman astakamusqaykuqa imamantapas aswan allinpunim karqa. Casarasqa kasqaykupim huk sonqolla tarikuniku hinaspapas Jehova Dioswan amistadniykuqa aswan allinmi. Sapa punchawmi yaqa llapanpi iskayniyku imatapas ruwaniku: lloqsinikum Diosmanta willakuq, huñunakuykunapaqmi preparakuniku hinaspapas rimanikum Biblia estudiaqkunata imayna yanapanaykupaqpas. Chaymantapas, ñawpaq sasachakusqaykuqa manañam kanñachu”, nispa. Ninkutaqmi: “Musyakurqanikum Salmo 34:8 nisqan cheqap kasqanta, chaypim nin: ‘Pruebaspataq yachaykuychik Diospa allin kasqantapas’”, nispa.

¿IMATAQ YANAPAN HUKLAWPI SERVIQKUNATA?

2.900 masnin iñiqmasinchikkunam, casarasqa kaspanku otaq sapallanku kaspankupas México nacionpa llaqtachakunaman rirqaku Diosmanta willakunankupaq, paykunaqa 20 watayoqmanta 40 watayoqkamam kanku. ¿Imanasqam achka testigokuna huklawpi Diosmanta willakuyta munanku? Chaymanta tapuptinkum wakiqninkuna 3 kaqkunata kutichinku. ¿Mayqankunataq chayqa?

Jehova Diosta hinaspa runamasinkuta kuyasqankurayku. 18 watanpi bautizakuq Leticia, cristianam willakun: “Yacharqanim Jehova Diosman qokuspayqa tukuy sonqoywan hinaspa tukuy vidaywan servinaymanta. Munarqanim tiempoytawan kallpayta Jehova Diosman qoyta chaynapi ancha kuyasqayta qawachinaypaq”, nispa (Mar. 12:30). Leticiawan casarasqa Hermilo iñiqmasinchikpas 20 watayoqllaraq kachkaspanmi huklawman rirqa Diosmanta willakuypi yanapakunanpaq. Paymi nin: “Runakuna kuyasqanchikta qawachinapaqqa Diosmanta yachay munasqankupim yanapana”, nispa (Mar. 12:31). Chaymi payqa bancopi allin llamkayninta hinaspa Monterrey hatun llaqtanta saqespan taksa llaqtachapi kawsananpaq astakurqa.

Cheqap kusikuyta tarinapaq. Bautizakurusqan qepallamanmi Leticiaqa unay wataña precursorawan huk llaqtaman rirqaku, chaypim huk killa Diosmanta willakurqaku. Leticiam nin: “Manam ima niytapas atirqanichu. Anchatam kusikurqani Diosmanta willakusqaykuta runakuna allinta chaskiptinku. Killa tukuytam nirqani: ‘¡Kaytam tukuy vidaypi ruwayta munani!’”, nispa. Yaqa chaynam pasarqa 20 masnin watanpi Essly sutiyoq iñiqmasinchiktapas. Hukkunapa ancha kusikusqanta qawaspanmi paypas mana ancha Testigokunapa kasqanman astakurqa. Paymi reqsirurqa huklawpi tukuy sonqonwan Diosta serviq achka Testigokunata. Paymi nin: “Kusisqallaña kasqankuta qawaspaymi paykuna hina kayta munarqani”, nispa. Essly hinam achka cristianakunapas ruwarqaku. México nacionpim huklawmanta kaq 680 masnin cristianakuna yanapakuchkanku. ¡Mayna qatipakunapaqmi paykunaqa kanku lliw cristianokunapaq!

Allin hinaspa hawka kawsakunapaq. Essly iñiqmasinchiktam colegionta tukuruptin universidadman gratislla yaykunanpaq nirqaku. Wakin mozo-sipaskunam hikutarqaku universidadpi estudiananpaq chaynapi carronta rantinanpaq hinaspa huklaw nacionkunaman rispan purikunanpaqpas. Ichaqa manam payqa chayna nisqankutaqa kasurqachu. Esslym nin: “Diosta serviq achka amistadniykunam chaykunata haypanankupaq tantearurqaku, chaymi cuentata qokurqani Dios serviyninku mana puntapi kasqanta. Rikurqanitaqmi kay Pachapi imatapas haypanankupaq kallpanchakuspanku sasachakuypi hinaspa ancha hukmanyasqa tarikusqankuta. Ñoqam ichaqa sipas kayniypi tukuy tiempoywan Dios serviyta munarqani”, nispa.

Essly iñiqmasinchikmi precursora kaspa pisi tiempollapi estudiarqa chaynapi chay estudiasqanwan yanapachikunanpaq, hinaspanmi mana ancha predicaqkunapa kasqanman astakurqa. Chaymantapas otomí hinaspa tapanco nisqa rimaykunatam yacharurqa. Kimsa wataña iñiqmasinchikkunapa mana ancha kasqanpi Diosmanta willakusqanqa yuyaymanachirqam, chaymi Essly nin: “Mana ancha predicaqkunapa kasqanpi Diosta servisqaymi allinta hinaspa kusisqata tarichiwan. Dioswan amistadniypas astawanmi yapakurqa”, nispa. Chayna kasqantam ninku Estados Unidos nacionmanta casarasqa Phillip hinaspa Racquel iñiqmasinchikkunapas, paykunaqa 30 masnin watayoqmi kachkanku. Paykunam ninku: “Kay Pachapi imapas kaqkunaqa utqayllamanmi cambiachkan, chaymi runakunaqa mana hawkachu tarikunku. Bibliamanta yachay munaq achka runakunapa kasqanpi predicaymi ichaqa anchata kusichiwanku. ¡Manamá chayqa yanqapaqchu!”, nispa.

SASACHAKUYKUNATA IMAYNA ATIPANAMANTA

Arí, mana ancha predicaqkunapa kasqanpi Diosta serviyqa sasaniraqmi. Wakinpiqa qollqemantam sasachakunku. Chayta atipanapaqqa tukuytam ruwanku. Unay tiempoña precursora Verónica iñiqmasinchikmi nin: “Huklawpim mikuyta yanuspay mana ancha qollqepaq runakunaman rantikuq kani, huklawpiñataq pachakunata rantikuq hinaspa chukchakunata rutuq kani. Kunanñataqmi huk wasita limpiaspay llamkachkani, yachachinitaqmi chayllaraq churi-wawayoq tayta-mamakunatapas warmankuta imayna uywanankupaq”, nispa.

Wakinpiqa sasaniraqmi kanman runakunapa costumbrenkuman hina kawsayqa, astawanraqmi chayqa kanman karu llaqtachakunaman astakuptinkuqa. Chaynam tarikurqaku Phillip hinaspa Racquel iñiqmasinchikkuna náhuatl rimayniyoq llaqtachaman astakuspanku. Phillipmi nin: “Chay lawpi runakunapa imayna kawsasqanku hinaspa costumbrenkupas manam ñoqaykupa hinachu karqa”, nispa. ¿Imaynatam amañarqaku? Phillipmi nin: “Náhuatl rimayniyoq runakunapa allin ruwasqankuta, familiankuwan huñulla kawsasqankuta hinaspa qokuykuq kasqankutam qawarqaniku”, nispa. Racquelpas ninmi: “Chaypi kawsaspaykuqa tukuy imatam yacharurqaniku hinaspapas huk sonqollam iñiqmasinchikkunawan kuska Diosta servirqaniku”, nispa.

IMATAM ÑAWPAQMANTARAQ RUWACHWAN

Ichapas qam huklawpi servinaykipaq tanteachkanki, ichaqa ¿imatam ruwawaq manaraq astakuchkaspa? Achka wataña precursor iñiqmasinchikkunam ninku manaraq astakuchkaspa, imapas kapuqllanchikwan contentakunamanta (Filip. 4:11, 12). ¿Imatawanraqmi ruwawaq? Leticiam nin: “Unay tiempota qepachiwaq llamkaypiqa manam llamkayta munarqanichu. Munarqanim imay hora maymanpas astakunaypaq libre kayta”, nispa. Hermilopas nintaqmi: “Yacharurqanim pacha taqsayta, planchayta hinaspa yanukuytapas”, nispa. Veronicapas ninmi: “Familiaywan yachaspayqa pichaypim yanapakuq kani hinaspam yacharurqani mana achka qollqellapaq miski mikuykuna yanukuyta. Yacharurqanitaqmi qollqeta yanqakunapi mana usuchiytapas”, nispa.

Estados Unidos nacionmanta Levi hinaspa Ameliam pusaq wataña casarasqa kanku. Paykunam ninku México nacionpi servinankupaq Diosta mañakusqanku anchata yanapasqanmanta. Levim nin: “Huklaw nacionpi huk wata servinaykupaq hayka qollqeta necesitasqaykumantam tantearqaniku, chaymantam Jehova Diosta mañakurqaniku chayna qollqeta tarinaykupaq”, nispa. Killakuna pasaytaqa lliwtañam huñururqaku hinaspankum chaylla astakurqaku. Levim nin: “Mañakusqaykuta Dios uyariykuwasqankuraykum ñoqaykupas ima mañawasqankuta cumplinayku karqa”, nispa. Ameliapas nintaqmi: “Piensarqanikum huk watalla kanaykumanta ichaqa qanchis watañam kachkaniku hinaspapas manam kutiytaqa piensanikuchu. Kaypi yachasqaykuwanqa sutillatam musyakuniku Jehova Dios waqaychawasqankuta. Sapa punchawmi cuentata qokuniku Jehova Dios kuyawasqankutapas”, nispa.

Diosta mañakuyqa anchatam yanaparqa Adam hinaspa Jennifer sutiyoq iñiqmasinchikkunatapas, paykunapas Estados Unidos nacionniyoq casarasqakunam kanku hinaspa México nacionpim ingles rimayniyoq runakunata yachachinku. Paykunam ninku: “Ama suyaychu tukuy imapas alli-allin kanantaqa. Huklaw llaqtapi serviy munasqaykimanta Jehova Diosta mañakuy hinaspayki mañakusqaykiman hina ruway. Imapas kapuqllaykiwan contentakuy, qellqay chay serviy munasqayki nacionpi Betel wasiman maypi serviy munasqaykimanta, tanteay hayka qollqeta chaypaq necesitasqaykimanta hinaspa chay piensasqaykiman hina ruway”, nispa.a Chaynata ruwaspaykiqa kusikuywanmi astawan Jehova Dios serviyta atinki.