BIBLIAMANTA TAPUKUYKUNA
¿Imapaqtaq Jesusqa kutimunqa?
33 kaq watapi hanaq pachaman manaraq kutichkaspanmi Jesusqa prometerqa kutimunanpaq. Rikchanachiywan rimaspanmi willakurqa huk llampu sonqo runa huklaw nacionta rispan rey kananpaq nombramientota chaskispa gobiernananpaq kutimusqanmanta. Jesucristoqa kutimunqa runakunata gobiernananpaqmi. (Leey Lucas 19:11, 12, Chuya Qellqa edición revisada 2012.)
Jesusmi runakunata allinta kamachimunqa
Jesucristoqa kawsarirqa espiritu cuerpopim chaynaqa, ¿aycha cuerpopichu kutimunqa? (1 Pedro 3:18.) Hanaq pachaman kutispanmi Diospa alleq lawninpi tiyaykurqa (Salmo 110:1). Chaymanta tiempo pasaytam ‘Wiñaypaq Kawsaqpa otaq Diospa qayllanman asuykachirqaku’. Hinaptinmi Jehova Diosqa Jesusman atiyta qorqa runakunata kamachimunanpaq. Chaymi Jesusqa atiyniyoq reyña, kamachimuchkan hanaq pachamanta. (Leey Daniel 7:13, 14.)
¿Imatam Jesusqa ruwanqa kutimuspan?
Jesusqa kutimunqa mana rikuy atina angelninkunapiwanmi runakunata juzgananpaq. Mana kasukuq runakunatam wañuchinqa, kasukuqkunamanmi ichaqa wiñay kawsayta qonqa. (Leey Mateo 25:31-33, 46.)
Allpa pachatam sumaqta huertayachinqa. Chaymantapas chaypi kawsanankupaqmi wañusqakunata kawsarichinqa. (Leey Lucas 23:42, 43.)