BIBLIAMANTA TAPUKUYKUNA

¿Allinchu kanman Diosta mañakuyqa?

Diosqa munanmi sasachakuyninchikmanta otaq ima llakinchikmantapas mana recelaspa willakunanchikta (Lucas 18:1-7). Payqa sientewanchikmi chaymi mañakusqanchikta uyariwanchik. Hanaq pachapi Taytanchikqa kallpanchawanchikmi payman asuykunapaq. ¿Munawaqchu payman asuykuyta? (Leey Filipenses 4:6.)

Diostaqa mañakunchik manam yanapawanallanchikpaqchu, aswanqa payman asuykunapaqmi (Salmo 8:3, 4). Tukuy sonqonchikwan payman asuykusqanchikqa astawan amistadta ruwanapaqmi yanapawanchik. (Leey Santiago 4:8.)

¿Imaynatam mañakunanchik?

Diosqa manam niwanchikchu yachayniyoq runakunapa rimasqanku palabrakunawan mañakunapaqchu, nitaq umallanchikmanta ima resotapas yacharuspa resakunanchiktachu. Manataqmi niwanchikchu sayaykuspa, qonqorakuspa, tiyaykuspa mañakunanchiktachu, aswanqa tukuy sonqonchikwan mañakunanchiktam munan (Mateo 6:7). Ñawpaq israelitakunapa tiemponpim Ana familianpi sasachakuy kasqanmanta Jehova Diosman willakurqa. Chayna llaki vidan pasaruptinñataqmi kusikuywan Diosta mañakuspan agradecekurqa. (Leey 1 Samuel 1:10, 12, 13, 26, 27; 2:1.)

¡Mayna allinmi Unanchawaqninchik Taytanchikman ima sasachakuyninchikmantapas willakuyninchikqa! Paytaqa tukuy ima ruwasqanmanta alabaspam agradecekunanchik. Amayá haykapipas qonqasunchu tukuy sonqonchikwan Dios mañakuytaqa. (Leey Salmo 145:14-16.)