Jehova Diospa serviqninkunaqa mana allinkunamantam karunchakunku

1. ¿Imataq ñoqanchikpaq ancha chaninniyoq?

¿HAYKAPIPAS rikurqankichu Jehova sutita maypipas qellqasqata? Chayna kaptinqa admirakurqankichá. Jehova Diospa testigon kasqanchikraykum, Diospa sutinqa ancha chaninniyoq ñoqanchikpaqqa. Chay sutiwanqa manam ñoqanchik hinaqa pi runakunapas reqsichikunchu. Ichaqa yachanchikmi chay sutita apaspaqa paypa munasqanman hina kawsananchikta.

2. ¿Imaynam kawsananchik Diospa sutinta apasqanchikrayku?

² Diospa amistadnin kanapaqqa manam sutinmanta rimayllachu. Aswanqa kamachisqanman hinam kawsananchik. Chaymi Diosqa sapakama serviqninkunata yuyarichiwanchik mana allin ruwaykunata saqenanchikpaq (Sal. 34:14). Apostol Pablom chaymanta rimaspan kaynata qellqarqa: “[Jehova Diospi] hapipakuqkunaqa suchurikuchunyá mana allin ruraykunamantaqa”, nispa (2 Tim. 2:19). Jehova Diospa testigonkunaqa paypa sutinmanta willakuq kasqanchikwanmi reqsichikunchik. Ichaqa, ¿imaynatam mana allin ruwaykunamanta suchurikuchwan?

“ASURIKUYCHIK” MANA ALLIN RUWAYKUNAMANTA

3, 4. ¿Bibliapi mayqan textota entiendenankupaqmi wakin runakunaqa sasachakunku, hinaspa imanasqa?

³ (Leey 2 Timoteo 2:19.) Kay textopim, Pablo riman “Diosmi [. . .] cimientota hina churarqa” nispan, kay textomantam iskay willakuykuna kan. Punta kaqmi: “[Jehova Diosqa] reqsinmi pim paypa kasqantaqa”, kayqa horqosqam kachkan Numeros 16:5 nisqanmanta (qaway kay yachachikuypa ñawpaqninpi yachachikuyta). Iskay kaqñataqmi “[Jehova Diospi] hapipakuqkunaqa suchurikuchunyá mana allin ruraykunamantaqa” nisqan. Wakin runakunaqa sasachakunkum kay palabrakunata entiendenankupaq. ¿Imanasqa?

⁴ Pablopa qellqasqan palabrakunaqa, yaqapas Hebreo Rimaypi Qellqasqa Diospa Palabranmanta horqosqa kasqanmanmi rikchakun, ichaqa manam chaypi mayqan textowanpas tupanchu. Chaynaqa, ¿ima niytataq munachkarqa: “[Jehova Diospi] hapipakuqkunaqa suchurikuchunyá mana allin ruraykunamantaqa” nisqanwan? Chayta manaraq rimaspanmi Pabloqa Numeros 16 capitulonmanta rimarqa, chaypim Diospa contranpi Coreypa hatarisqanmanta willakuchkan. Chaynaqa, ¿tupanchu kay willakuypa nisqan Pablopa nisqanwan?

5-7. ¿Moisespa tiemponpi ima pasakusqanmantam Pabloqa 2 Timoteo 2:19 nisqanpi rimarqa? (Qaway 12 kaq paginapi dibujota.)

⁵ Bibliam nin Datanwan Abiram Coreyman hukllawakuspanku, Moisespa hinaspa Aaronpa contranpi hatarisqankumanta (Num. 16:1-5). Paykunaqa manam Moisestaqa respetarqakuchu nitaqmi reqsikurqakuchu payta Dios akllasqantapas. Chay ruwasqankuwanmi Diosman sonqo kaqkunapa iñiyninta hukmanyachichkarqa, paykunawan kuska yachasqankurayku. Ichaqa, mayqanninku tukuy sonqonkuwan Diosta servisqankumanta yachanankupaq tiempo chayaramuptinmi, Jehova Diosqa kay kamachikuyta qorqa.

⁶ Moisestam nirqa: “Niy Israelpa mirayninkunata Coreypa, Datanpa hinaspa Abirampa kasqanku karpamanta asurikunankupaq, nispa. Chaymi Moises hatarispan wakin ancianokunapa compañasqan pasarqa Datanpa chaynataq Abirampa kasqanman. Hinaspam chaypi runakunata Moises nirqa: Kay mana allin ruraq runakunapa karpanmanta asurikuychik, amataq imankutapas hapiychikchu yanqañataq paykunapa huchanmanta qamkunapas wañuruwaqchik, nispa. Chaymi Coreypa, Datanpa hinaspa Abirampa kasqanku karpapa muyuriqninmanta runakuna asurikururqaku” (Num. 16:23-27). Hinaptinmi Jehova Diosqa contranpi kaqkunata wañurachirqa. Ichaqa payman sonqo runakunam mana wañurqakuchu Diospa contranpi kaq runakunamanta karunchakusqankurayku.

⁷ Jehova Diosqa sonqonchiktam qawan hinaspapas reqsinmi paypaq kaqkunataqa. Chayna kaptinpas, Diosman sonqo runakunaqa chayllam mana allin runakunamanta asurikunanku karqa. Chaynaqa, yaqapaschá Pabloqa Numeros 16:5, 23- 27 nisqanmanta rimachkarqa: “[Jehova Diospi] hapipakuqkunaqa suchurikuchunyá mana allin ruraykunamantaqa”, nispa qellqaspanqa. Chayna kasqantam ninchik, chay rimaykunata manaraq nichkaspan kaynata qallarisqanrayku: “[Jehova Diosqa] reqsinmi pim paypa kasqantaqa”, nispa (2 Tim. 2:19).

“AMAYÁ CHAPUKUYCHU RUNAKUNAPA YANQA ATIPANAKUSQANMANQA”

8. ¿Imatam ruwananchik Dioswan amistadninchikta chaninchaspaqa?

⁸ Moisespa tiemponpi imakuna pasakusqanmanta rimaspanmi, Pabloqa Timoteota yuyarichirqa Jehova Dioswan amistadninta chaninchananpaq. Chay tiempopi cristianokunataqa manam congregacionpi kayllachu yanapanman karqa, chaynam Moisespa tiemponpipas mana Diospa sutinmanta rimayllachu yanaparqa. Chaymi lliw cristianokunaqa chaylla mana allin ruwaykunamanta asurikunanchik. ¿Imaynatam kayqa Timoteota yanaparqa? ¿Imatam ñoqanchikmanpas yachachiwanchik?

9. ¿Sasacharqachu punta pachak watapi cristianokunata ‘yanqa atipanakusqanku’?

⁹ Diospa Palabranqa niwanchikmi mana allinkunata qepanchananchikpaq. Pablom Timoteota nirqa palabrakunamanta atipanakuy mana allin kasqanta. Nirqataqmi “yanqapas-yanqa rimaykunamanqa” mana hukllawakunanpaq (leey 2 Timoteo 2:14, 16, 23). ¿Ima niytam kaywanqa munachkarqa? Congregacionpi wakin iñiqmasinkunam Diospa contranpi yachachichkarqaku. Chaymantapas, wakinkuqa atipanakuytam rikurichichkarqaku. Ichapas yachachisqankuqa mana llapanpichu Bibliapa contranpi karqa, chayna kaptinpas congregacionpi huk sonqolla kasqankutam sasacharqa. Chaymi Pabloqa Timoteota nirqa: “Amayá chapukuychu runakunapa yanqa atipanakusqanmanqa”, nispa.

10. ¿Imaynam kananchik Diospa contranpi kaqkunawan?

¹⁰ Kunanqa manam anchachu qawanchik congregacion ukupi Diosta qepanchaqkunataqa. Chaywanpas, tupachwanmi Bibliamanta mana imam kaqta yachachiqkunawanqa. Chayna kaptinqa, chayllam qepanchananchik imataña niwaptinchikpas. Manam allinchu kanman Diospa contranpi yachachiqkunawan atipanakuyqa. Yanapayta munaspapas, Bibliapa kamachisqantam mana kasuchuchkachwanchu. Kay yachachikuypi yachamusqanchikman hinam, Jehova Diospa testigonkunaqa mana hukllawakunchikchu Diospa contranpi kaqkunawanqa.

11. (1) ¿Imam yanqa atipanakuyta rikurichinman? (2) ¿Imapim ancianokunaqa qatipakunapaq hina kanmanku?

¹¹ Congregacionpi mana huk sonqolla kanapaqqa sasachantaqmi, kusirikuymanta mana chaynallata piensaypas. Chaykunam yanqa atipanakuyta hatarichinman. Ichaqa, pipas mana allinkunawan kusirikuyta munaptinqa, ancianokunaqa manam saqenankuchu paykunawan hawka kayta munaspallaqa (Sal. 11:5; Efes. 5:3-5). Chayna kaptinpas, manam piensasqankuman hinallachu ruwananku. Aswanmi kasukunanku Bibliapa kayna nisqanta: “Makikichikpi kaq Diospa ovejankunatayá michiychik. [. . .] Amayá michiychikqa munaychakuq hinachu, aswanqa ejemplonyá kaychik” (1 Ped. 5:2, 3; leey 2 Corintios 1:24).

12, 13. (1) ¿Imaynatam Jehova Diospa testigonkuna akllanku kusirikuykunata? (2) ¿Bibliapa mayqen textonkunam yanapawasun kusirikuykunata allinta akllanapaq? (3) ¿Imakunapaqwanmi yanapawanchik 12 parrafopi textokunapa nisqanqa?

¹² Diospa llaqtanpiqa manam akllapuwanchikchu ima peliculakunata, videopi pukllaykunata, librokunata hinaspa takikunata uyarinapaqqa otaq qawanapaqqa. ¿Imanasqa? Diosmi sapakamata niwanchik “allin kaqtapas hinaspa mana allin kaqtapas” reqsinanchikpaq (Heb. 5:14). Bibliam yanapawanchik imawanpas kusirikunapaq allinta tanteanapaq. Imata ruwaspapas maskananchikmi Dios kusichiyta (Efes. 5:10). Bibliaqa yachachintaqmi familiapi uma kaqkuna familianmanta nanachikunanpaq, chayraykum tanteanman imakunawan mana kusirikunankupaq (1 Cor. 11:3; Efes. 6:1-4).

¹³ Hanaypi Bibliapa nisqankunaqa manam kusirikuykunallapichu yanapawanchikman. Llapanchikmi mana imam kaqllatachu piensanchik pachakuymanta, hampichikuymanta, imakuna mikuymanta hinaspa hukkunamantapas. Chaynaqa, kaykuna Bibliapa contranpi mana kaptinqa, Diosta serviqkunaqa “manam peleollapichu purinan, aswanqa llapallanwanmi allinlla kanan” (2 Tim. 2:24).

¡MANA ALLIN AMISTADKUNAMANTA KARUNCHAKUSUN!

14. ¿Ima rikchanachiytam Pabloqa servichikurqa mana allin amistadkunamanta karunchakunapaq?

¹⁴ ¿Imaynatawanmi Jehova Diospi hapipakuqkunaqa mana allin ruwaykunamanta suchurikuchwan? Mana allin ruwaqkunawan mana hukllawakuspam. Pablom servichikurqa “Diosmi [. . .] cimientota hina churarqa” niq rikchanachiyta chaynataq ‘hatun wasimanta’ rikchanachiytapas. Nirqam: “Hatun wasipiqa [vasokunapas] manam qori-qollqellamantachu tarikun, aswanqa kachkanmi kullumanta allpamantapas, wakinqa allin kaqkunapi servikunanpaqmi, wakinñataqmi sapa punchaw qanrachanapaq”, nispa (2 Tim. 2:20, 21). Chaymi cristianokunata nirqa “qanrachanapaq” vasokunamanta karunchakunankupaq.

15, 16. ¿Imatam yachachiwanchik hatun wasimanta rikchanachiyqa?

¹⁵ Pabloqa congregaciontam hatun wasiwan tupachirqa, iñiqmasinkunatañataq vasokunawan. Wasipi wakin serviciokuna qacha kaspanqa onqorachiwanchikmanmi. Chaymi wasiyoqqa limpio kaqtawan qacha kaqtaqa sapaqchanan.

¹⁶ Jehova Diospa serviqninkunapas kawsakuyninkupi limpio kanankupaqqa, congregacionpi Diosta mana kasukuq amistadkunamantam karunchakunanku (leey 1 Corintios 15:33). Sichu congregacion ukupi chayna amistadkunamanta karunchakuna kaptinqa, astawanraqmi karunchakuna Diosta mana serviqkunamantaqa. Paykunaqa kanku “qollqella kuyaqkuna, [. . .] mama-taytanku mana kasuqkuna, [. . .] huchallapi purikuqkuna, [. . .] runakunapa contranpi rimaqkuna, mana controlakuqkuna, mana llakipayakuqkuna, [. . .] runamasin traicionaqkuna, [. . .] Dios yupaychayta qepaman churaspanku kikinkupa munasqallanpi purikuqkuna” (2 Tim. 3:1-5).

JEHOVA DIOSQA PAYMAN SONQO KASQANCHIKTAM CHANINCHAN

17. ¿Imaynatam Diosman sonqo Israel runakuna mana allinkunata qepancharqaku?

¹⁷ Coreypa, Datanpa hinaspa Abirampa karpanmanta Israel runakuna asurikunankupaq Jehova Dios kamachiptinmi, paykunaqa chaylla asurikurqaku (Num. 16:24, 27). Mana iskayrayaspam sonqomanta kasukurqaku. Chay ruwasqankuwanmi qawachirqaku Jehova Diosman sayapakusqankuta hinaspa mana allinkuna qepanchasqankutapas. ¿Imatam kaymanta yachachwan?

18. ¿Imata ruwananpaqmi Pablo Timoteota kallpancharqa?

¹⁸ Jehova Dioswan amistadninchiktaqa anchatam chaninchananchik. Chaymi Pablo Timoteota nirqa: ‘Jovenkunapa munapayasqanmantayá ayqekuy’, nispa (2 Tim. 2:22). Timoteoqa yaqapaschá 30 wata masninpiña karqa. Ichaqa ayqekunanmi karqa mozokunapa munapayayninmanta. Huk rimaypiqa suchurikunanmi karqa mana allin ruwaykunamanta. Jesuspas yaqa chaynatam nirqa: “Sichu ñawiki huchallichisuptikiqa, allinnikipaqchá horqoruwaq”, nispa (Mat. 18:9). Dioswan amistadninchikta mana chinkarachiyta munaspaqa, kunanpas chayna nisqantam mana iskayrayaspa kasukunanchik.

19. ¿Imatam wakin iñiqmasinchikkuna tantearunku Dioswan amistadninkuta waqaychanankupaq?

¹⁹ Wakin iñiqmasinchikkunaqa trago tomaywanmi sasachakurqaku manaraq Diosta reqsichkaspanku, chaymi mana imaniraqtapas tomanankupaqña tantearunku. Wakinkuqa yaqapaschá kallpanchakunku ima mana allinmanpas mana wichiykunankupaq, chaymi mana munankuchu wakin kusirikuykunapi kayta, chay kusirikuykuna allinña kaptinpas (Sal. 101:3). Huk iñiqmasinchikmi manaraq Testigo kachkaspan fiestakunapi qawaq mana allin tusuykunata. Ichaqa Diosta reqsisqanmantapacham manaña fiestakunamanqa rinchu nitaq iñiqmasinchikkunawan tususqanchikmanpas. Chaynapim manaña yuyarinchu mana allin pensamientokunata nitaq munapayaykunatapas. Cristianokunapaqqa manam huchachu pisilla trago tomayqa nitaq tusuypas. Ichaqa llapanchikmi kallpanchakunanchik allinta tanteanapaq, chaynapim Dioswan amistadninchikta waqaychasun.

20. Mana allin ruwaykunamanta karunchakuy sasa kaptinpas, ¿ima yachasqanchikmi kusichiwanchik?

²⁰ Diospa sutinta apayqa ancha chaninniyoqmi ñoqanchikpaqqa, chaymi munasqanman hina kawsananchik. Karunchakunanchiktaqmi mana allin kaqkunamantaqa (Sal. 34:14). Chay ruway sasa kaptinpas, kusikunchikmi Jehova Dios ‘paypaq kaqkunata’ chaynataq kasukuqninkunata kuyasqanmanta yachaspanchikqa (2 Tim. 2:19; leey 2 Cronicas 16:9a).