QARANPI KAQ YACHACHIKUY | DIOSQA KUYAKUYWANMI QAWASUCHKANKI
Diosqa kuyakuywanmi qawamusuchkanki
“Diosqa qawachkanmi runakunapa imaynam kawsasqantaqa. Diosqa rikuchkanmi runakunapa imaynam purisqantaqa.” (JOB 34:21)
Warmachaqa astawan atiendenatam necesitan
IMANASQATAQ WAKINQA ISKAYRAYANKU: Chayraq yachasqankumantam yachayniyoq runakuna willakunku hanaq pachapi huknin kaq galaxia nisqallankupi pachak waranqa millonnintin Allpa pacha kaqlla sitiokuna otaq planetakuna kasqanmanta. Universo nisqanku llumpa-llumpay hatun kasqanraykum wakinqa piensanku uchuychalla Allpa pachapi kaq runakunapiqa Dios mana reparasqanpi.
IMATAM BIBLIA YACHACHIN: Jehova Diosqa palabranta runakunapaq qellqachispanpas manam qonqawanchikchu, paymi nin: ‘Ñoqam qawarimuspay consejasqayki’, nispa (Salmo 32:8).
Piensarisun Egiptomanta kaq Agar sutiyoq warmipi. Agarqa huk kutipim chunniqman lluptikurqa servisqan Sarai humillaptin. ¿Patronanta piñachisqanraykuchu Diosqa paypi manaña sienterqa? Bibliam willakun, Jehova Diospa angelnin tariruspan kaynata kallpanchasqanmanta: “Waqasqaykitam Tayta Dios uyarirusunki”, nispa. Chaymi Agar nirqa: ‘Qamqa rikuwaqniy Diosmi kanki’, nispa (Genesis 16:4-13, Chuya Qellqa revisión 2012 [CQ12]).
Diosqa sapakamatam qawawanchik. ¿Imaynanpitaq chaynata ninchik? Kay rikchanachiypi piensarisun. Mamaqa kuyakuywanmi llapan wawankunata cuidan, astawanraqmi wawallaraq kaqkunataqa. Chaynallataqmi Jehova Diospas sapakamata cuidawanchik, astawanraqmi hukmanyasqa otaq llakisqa tarikuptinchikqa. Chaymi niwanchik: “Alto-altopim yachani. Chuyay-chuyay sitiopim yachani. Chaywanpas ñakarichisqakunawanmi kachkani. Chaywanpas humillachisqakunawanmi kachkani. Paykunawanqa kachkani ñakarichisqakunata kallpanchanaypaqmi. Paykunawanqa kachkani humillachisqakunata valorchanaypaqmi”, nispa (Isaias 57:15).
Chaywanpas yaqapaschá kaynataraq piensanki: “¿Imaynatataq Diosqa qawawan? ¿Rikchayllaypichu reparan icha entiendewanchu imayna sientekusqayta?”, nispa.