QARANPI KAQ YACHACHIKUY | DIOSQA KUYAKUYWANMI QAWASUCHKANKI
Diosqa consuelasuqnikim
‘Llakisqakunata kallpanchaq Diosmi kallpanchawanchik.’ (2 CORINTIOS 7:6)
“Paymi kuyawaspan ñoqapa rantiypi wañupuwarqa.” (GALATAS 2:20, CQ12)
IMANASQAM WAKINQA ISKAYRAYANKU: Wakinqa anchatam munanku pipas consuelaykunanta, ichaqa manam mañakunchu Dios yanapanantaqa. ¿Imanasqa? Raquelmi nin: “Enteron allpapi achkallaña runakuna tukuywan sasachakusqankuta yachaspaymi kikiypa sasachakuyniytaqa mana kaqpaqpas hapinichu, chaymi Diospa yanapaynintaqa mana mañakunichu”, nispa.
IMATAM BIBLIA YACHACHIN: Diosqa tantearunñam imaynata yanapawananchikpaq chaynataq consuelawananchikpaq. Huchallikuq kasqanchikraykum mana hampiy atina onqoywan hina llapallanchik tarikunchik. Chaymi mana atinchikchu Diospa kamachikuyninkunata allintapuni cumpliytaqa. Chaywanpas Diosqa ‘ñoqanchikta kuyawaspanchikmi Churinta kachamurqa huchanchikrayku’ rantinchikpi wañunanpaq (1 Juan 4:10). Jesucristo rantinchikpi wañusqanraykum Diosqa huchanchikmanta pampachawanchik, chuya concienciayoq kananchikpaq yanapawanchik chaynataq hawkayaypi wiñay kawsakuytapas prometewanchik.a Lliw runakunapa rantinpi Jesucristo wañunanpaq saqesqanwanmi Jehova Diosqa qawachin qanmantapas sientesqanta.
Rantinchikpi Jesucristo wañusqanmantam apostol Pablo mana iskayrayaspan kaynata nirqa: “Paymi kuyawaspan ñoqapa rantiypi wañupuwarqa”, nispa (Galatas 2:20, CQ12). Jesusqa wañurqa apostol Pablo manaraq cristiano kachkaptinmi, chaywanpas Jesuspa wañusqantam qawarqa paypaq Diospa regalon qosqanta hina.
Rantinchikpi Jesuspa wañusqanqa qampaqpas Diospa regalo qosusqaykim, chaywanmi qawachisunki ancha kuyasusqaykita. Chay regaloqa ‘wiñaypaq consuelasuspaykim confianzata qosunki, kallpanchasunkitaqmi allin ruwaynikipi hinaspa allin rimaynikipi takyanaykipaqpas (2 Tesalonicenses 2:16, 17).
Ichaqa Jesuspa wañukusqanmantaqa yaqa 2.000 watañam pasarun. ¿Imaynatam yachanchik kay tiempopipas Diosqa hinalla kuyawasqanchikta?
a Rantinchikpi Jesuspa wañukusqanmanta astawan yachayta munaspaqa qaway ¿Imatapunim Bibliaqa yachachin? niq libropa 5 kaq yachachikuyninta, chayqa Jehova Diospa testigonkunapa ruwasqanmi.