Jesusqa, ¿ñuqaraykuchu wañurqa?

BIBLIAQA willawanchikmi achka runakunapa imayna tarikusqankumanta (Sant. 5:17). Huk kaqninmi karqa apostol Pablo, paymi nirqa: “Allin kaqta ruwayta munaptiymi mana allin kaq ñuqapi kachkan. [...] ¡Imapitaq rikukullani!”, nispa (Rom. 7:21-24). Ñuqanchikpas wakinpiqa Pablo hinachá hukmanyasqallaña tarikurqanchik pantaq kasqanchikrayku. Chaymanta yachayqa sunqunchiktam tiyaykachin.

Chaywanpas Pabloqa nirqam: “[Jesusmi] kuyawaspan ñuqarayku wañurqa”, nispa (Gal. 2:20). Pabloqa, Jesus kuyasqanmantaqa manam iskayrayarqachu. Ñuqanchikpas, ¿Pablo hinachu mana iskayrayanchik? Wakinpiqa yaqapaschá iskayrayayta qallaykuchwan.

Ñawpaqta, mana allinkunata ruwasqanchikraykum hukmanyasqallaña tarikuchwan, chayrayku yaqapaschá nichwan Jehova Dios mana kuyawasqanchikta hinaspa mana pampachawasqanchikta. Utaq Jesuspa wañukusqanqa sapakamata mana yanapawasqanchikmanta. Jesuspa wañukusqanqa sapakamatam yanapawanchik, chaymantaqa manam iskayrayananchikchu.

JESUSQA SAPAKAMA RUNATA KUYASQANRAYKUM WAÑUKURQA

Jesusqa sapakamata kuyawasqanchikraykum wañukurqa, chayta mana qunqananchiktam payqa munan. Chaymanta mana iskayrayanapaq Lucas 23:39-43 nisqanpi yuyaymanasun. Jesuspa waqtanpi warkusqa huk kaqnin runam huchanta riqsikurqa. Payqa llumpay mana allin ruwaqchá karqa chaypi warkusqa kananpaqqa. Chaypi ñakarisqanraykum kaynata nirqa: “Jesus yuyarillawankimá kamachikuynikiman yaykuspayki”, nispa.

Nanayllawanña kachkaspanpas Jesusqa, chay runata qawariykuspanmi kuyakuyllawanña nirqa: “Chiqaptapunim kunan niki: Sumaq huertapim ñuqawan kanki”, nispa. Jesusqa ninmanmi karqa ‘achka runakunata librananpaq hamusqanmanta’ (Mat. 20:28). Ichaqa kaynatam nirqa: ‘Sumaq huertapim ñuqawan kanki’, nispa. Chaywanmi nichkarqa payrayku wañunanmanta, hinaspa hamuq tiempopipas sumaq huertapi kawsananmanta.

Chay runaqa manam Jehova Diostaqa yupaycharqachu. Chaywanpas Jesusqa payrayku wañusqanta chay runa yachanantam munarqa. Jesusqa munantaqmi qatiqninkuna chay yachanankutapas. Chaynaqa, ¿imataq yanapawasunchik Jesuspa wañukusqanqa sapakamapaq kasqanmanta mana iskayrayanapaq?

IMATAQ PABLOTA YANAPARQA

Pabloqa manam iskayrayarqachu payrayku Jesus wañukusqanmantaqa, ¿imanasqa? Willakunanpaq kamachisqa kasqanraykum. Paymi nirqa: “Agradecekunim atiy quwaqniy señorninchik Jesucristota, payqa allin runa kasqayta yachaspanmi Dios serviypi llamkayta quwarqa. Chaynatam ruwarqa ñawpaqta Diospa contranpi mana allinkunata rimachkaptiypas hinaspa iñiqkunata qatikachaspay tratachkaptiypas”, nispa (1 Tim. 1:12-14). Willakunanpaq Jesuspa kamachisqanwanmi Pabloqa yacharqa Jesus kuyasqanmanta hinaspa llakipayaykusqanmanta. Ñuqanchiktapas Jesusqa kamachiwanchikmi Diosmanta willakunanchikpaq (Mat. 28:19, 20). Chayraykum ñuqanchikpas mana iskayrayananchikchu Jesus sapakama runapaq wañusqanmantaqa.

Rimarisun Albert iñiqmasinchikmanta, payqa mana allin ruwasqanraykum Diospa llaqtanmanta qarqusqa karqa. Ichaqa kaqllamantam kutimurqa yaqa 34 watamanta. Paymi willakun: “Mana allinkuna ruwasqaytaqa manam qunqayta atinichu. Diosmanta willakuspaymi ichaqa Jesus chayta ruwanaypaq kamachiwasqanmanta musyakuni. Chayqa anchatam kusichiwan, chaymantapas manañam hukmanyaniñachu”, nispa (Sal. 51:3).

Diosta manaraq riqsichkaspam Alanqa llumpay mana allin ruwaq hinaspa maqakuqllaña karqa. Paymi nin: “Runakuna ñakarichisqaytam mana qunqanichu. Chaymi wakinpiqa llumpayta hukmanyani. Ichaqa ñawpaq vidaypi mana allin ruwaq kachkaptiypas, Jehova Diosqa saqiwanmi paymanta runakunaman yachachinaypaq. Runakuna willasqaykuta uyarispan kusisqa kasqanta qawaspaymi musyakuni Jehova Diosqa kuyakuqllaña kasqanmanta. Payqa yanapawanmi mana allin kawsakuq runakunata yanapanaypaq”, nispa.

Diosmanta willakuyninchikqa yanapawanchikmi allin kaqta ruwananchikpaq hinaspapas allin kaqkunapi umanchik kananpaq. Chaywantaqmi musyakunchik Jesus llakipayawasqanchikta, kuyawasqanchikta hinaspa ñuqanchikmanta mana iskayrayasqantapas.

JEHOVA DIOSQA SUNQUNCHIKTAM ALLINTA RIQSIN

Yaqapaschá mana allin ruwasqanchikwan hinalla hukmanyasqa tarikunchik. ¿Imam yanapawasun mana chayna tarikunapaq?

Iñiqmasinchik Jeanmi musu kayninpi Diospa testigon kachkaspanpas mana allinkunata ruwarqa. Paymi nin: “‘Ñuqanchikmantapas aswan allinta Jehova Dios sunqunchik riqsisqanta’ yachaspaymi hawka tarikuni”, nispa (1 Juan 3:19, 20). Chaynaqa ñuqanchikpas hawkañam tarikuchwan Jehova Dioswan Jesus pantaq kasqanchikta yachasqankuwanqa. Jehova Diosqa huchasapa runakunata kuyasqanraykum kuyasqan churinta runakunarayku wañunanpaq kachamurqa, Jesuspas huchasapa runakunata kuyasqanraykum vidanta qurqa (1 Tim. 1:15).

Sapakama runapaq Jesus wañusqanmanta mana iskayrayanapaqmi kaykunata ruwananchik: Yuyaymanananchikmi pantaq runakunawan Jesus imayna kasqanpi. Chaymantapas Diosmanta willakunapaq Jesuspa kamachiwasqanchiktam tukuy sunqunchikwan ruwananchik. Chayta ruwaspanchikqa mana iskayrayaspam Pablo hina nisun: “[Jesusmi] kuyawaspan ñuqarayku wañurqa”, nispa.