BIBLIAMANTA TAPUKUYKUNA
¿Lliw religionkunachu Diospa agradonpaq kanman?
Yaqapaschá noticiakunapi uyarirqanki religionkunaqa mana allin ruwaykunapi chaqrukusqankuta. Chaywanmi cuentata qokunchik religionkunaqa mana llapankuchu Diospa agradonpaq kasqanmanta (Mateo 7:15). Chay religionkunapim yaqa lliw runakuna engañasqa tarikunku. (Leey 1 Juan 5:19.)
Diosqa yachanmi pikunam payman sonqo kasqankuta, chaynataq paypa munasqanman hina yupaychay munasqankutapas (Juan 4:23). Chaymi paykunata Dios kallpanchan cheqap yachachikuyninkunata Bibliapi maskanankupaq. (Leey 1 Timoteo 2:3-5.)
¿Imaynatam yachawaq mayqen religiontaq Diospa agradonpaq kasqanta?
Jehova Diosqa pantay religionpi kaq llampu sonqo runakunatam yanapachkan huk sonqolla kawsakunankupaq. ¿Imaynata? Cheqap yachachikuykunamanta hinaspa kuyanakunankupaq yachachispam (Miqueas 4:2, 3). Cheqap religionpi kaqkuna reqsiytaqa atiwaqmi imayna kuyanakusqankupi reparaspa. (Leey Juan 13:35.)
Runakuna huk sonqolla kawsakunankupaqmi Jehova Diosqa cheqap religionta servichikun. (Salmo 133:1)
Tukuy sonqonkuwan Diosta yupaychaqkunaqa Bibliapa yachachikuyninkunapim iñinku chaynataq kasukunku (2 Timoteo 3:16). Diospa sutintam respetanku (Salmo 83:18). Chaymantapas willakunkum Diospa Gobiernollan runakunapa tukuy sasachakuynin allichananmanta (Daniel 2:44). Paykunaqa Jesusta qatipakuspam achkiy hina kanku runamasinkuta yanapasqankuwan (Mateo 5:16). Suti reqsiyllam kanku Diospa Gobiernonmanta willakunankupaq runamasinkuman wasin-wasin watukusqankuwan. (Leey Mateo 24:14; Hechos 5:42; 20:20.)