Chaninchasunyá Diospa llamkaqmasin kasqanchikta

1. (1) ¿Imaynam tarikun Jehova Diosqa llamkayninwan? (2) ¿Imatam Jehova Dios ruwan hukkunapas kusisqa kanankupaq?

JEHOVA DIOSQA ima llamkaynintapas kusikuywanmi ruwan (Sal. 135:6, NM; Juan 5:17). Munantaqmi angelninkuna hinaspa runakunapas pay hina kanankuta. Chaymi runakunaman ima ruwaytapas kamachin chayta ruwaspanku kusisqa kanankupaq. Diosqa tukuy imakunata unanchasqanpipas, Churin yanapananpaqmi nirqa (leey Colosenses 1:15, 16). Chayraykum, Bibliaqa willawanchik Jesusqa manaraq kay Pachaman hamuchkaspan hanaq pachapi Diospa ‘ruraysiqnin maestro’ kasqanmanta (Prov. 8:30).

2. ¿Imaynatam yachanchik kusikunapaq ruwaykunata angelkunaman Dios kamachisqanta?

² Achka kutipim Bibliaqa willawanchik Jehova Diosqa angelkunaman imatapas kamachisqanmanta. Adanwan Eva huchallikusqanrayku Eden huertamanta qarqosqa kaptinkum, Diosqa “churarqa querubin sutiyoq angelkunata. Paykunaqa karqa ruparichkaq espadayoqkamam chaynapi kawsay qokuq sachaman riq ñanta waqaychanankupaq” (Gen. 3:24). Apocalipsis 22:6 nisqanpipas Diosqa ‘kachamurqam angelninta chaylla pasananpaq kaqkunamanta serviqninkunaman qawachinanpaq’.

DIOSQA RUNAKUNAMANMI RUWAYKUNATA KAMACHIN

3. ¿Imatam Jesusqa kay Pachapi kaspan Taytanta qatipakuspan ruwarqa?

³ Kay Pachapi Jesus kaspanqa kusikuywanmi Taytanpa kamachisqanta ruwarqa. Taytanta qatipakuspanmi Jesuspas qatiqninkunaman ruwaykunata kamachirqa. Chayta kusikuywan ruwanankupaqmi kaynata kallpancharqa: “Ñoqapi iñiqqa ruranqam ñoqapa rurasqaykunata, payqa ñoqapa rurasqaymantapas mastaraqmi ruranqa, chaynataqa ruranqa Taytamanña risqayraykum”, nispa (Juan 14:12). Chay nisqanta chaylla ruwanapaq kasqanmanta qawachinanpaqmi, nirqa: ‘Punchawraq kachkaptinqa llamkananchikmi kachamuwaqniypa rurasqankunapi, tutayaramuptinmi ichaqa manaña atichwanñachu llamkayta’, nispa (Juan 9:4).

4-6. (1) ¿Imanasqam Noeypa chaynataq Moisespa Diospa kamachisqanta kasukusqanqa allinninchikpaq karqa? (2) ¿Ima iskay kaqkunapaqmi Jehova Diospa kamachisqan ruwaykunaqa?

⁴ Manaraq kay Pachaman Jesus hamuchkaptinpas Jehova Diosqa runakunamanmi kusikunapaq ruwaykunata qorqa. Adanwan Eva Diospa kamachisqanta mana kasukuptinkupas, hukkunaqa kasukurqakum (Gen. 1:28). Noeymanmi kamachirqa buque imayna ruwasqa kananmanta, chaynapi paywan familianpas Sinchi Paramanta salvakunankupaq. Diospa kamachisqanman hina ruwasqanraykumá kunanqa ñoqanchikpas kawsachkanchik (Gen. 6:14-16, 22; 2 Ped. 2:5).

⁵ Moisespas Diosman asuykuna karpata ruwananpaq hinaspa sacerdotekuna kananpaq kamachikuytaqa Jehova Diospa nisqanman hinamá ruwarqa (Ex. 39:32; 40:12-16). ¿Imanasqam allinninchikpaq karqa Moisespa kasukusqan? Apostol Pablopa nisqanman hinaqa, Diosman asuykuna karpaqa hinaspa sacerdotekunaqa hamuq tiempopi allin kaqkuna kananmantam qawachirqa (Heb. 9:1-5, 9; 10:1).

⁶ Serviqninkunaman Jehova Dios imapas ruwaykunata kamachisqanqa munaynin ruwakusqanman hinam cambian. Chayqa Jehova Diostam hatunchan hinaspa kasukuq serviqninkunapa allinninpaqmi. Hanaq pachapi hinaspa kay Pachapi Jesuspa ruwasqankunapas Diostam hatuncharqa (Juan 4:34; 17:4). Kunan tiempopi Jehova Diospa kamachiwasqanchik ruwaykunapas paytam hatunchan hinaspa allinninchikpaqmi (Mat. 5:16; leey 1 Corintios 15:58). ¿Imanasqa?

DIOSPA KAMACHIWASQANCHIK RUWAYKUNATA CHANINCHASUN

7, 8. (1) ¿Ima sumaq ruwaykunatam kunan tiempopi cristianokunaqa ruwachkanku? (2) ¿Imaynatam qawananchik Diospa llaqtanpa tukuy niwasqanchikta?

⁷ ¿Manachu kusichiwanchik pantaq runakuna kaptinchikpas Diospa llamkaqmasinkuna kasqanchik? (1 Cor. 3:9.) Huñunakunapaq Salonkunata, Asambleakuna Ruwana Wasikunata hinaspa Betel wasikunata ruwaypi yanapakuqkunapas Noeypa chaynataq Moisespa ruwasqanku llamkayta hinam ruwachkanku. Ichapas Huñunakunapaq Salonkunata otaq Warwick (Nueva York) llaqtapi Betel wasikunata ruwaypi yanapakuchkanki (qaway 16 kaq paginapi dibujota). Chayna kaptinqa, chaninchasunyá Diospaq chay sumaq llamkayninchiktaqa. Cristianokunapaqqa kantaqmi huk llamkaypas, chayqa Diosmanta willakuymi. Chay ruwayqa Jehova Diostam hatunchan hinaspapas willasqanchikta kasukuqkunatam yanapan (Hech. 13:47-49). Chay llamkayta allintapuni ruwananchikpaqmi Diospa llaqtanqa allinta yanapawanchik. Chaymi wakinpiqa mosoq yanapakuykunata qowanchik.

⁸ Diospa serviqninkunaqa llaqtanpa tukuy nisqantam haykapipas kasukunku (leey Hebreos 13:7, 17). Ichapas qallariypiqa mana allintachu yachasun kaynata otaq waknata ruwanapaq Diospa llaqtan imanasqa niwasqanchiktaqa. Ichaqa, manam iskayrayananchikchu Diospa llaqtan imataña kamachiwaptinchikpas kasukuyninchikqa allinninchikpaq kasqanmanta.

9. ¿Imanasqam qatipakunapaq hina kanku ancianokunaqa?

⁹ Ancianokunaqa tukuy sonqonkuwan Dios serviy munasqankutam qawachinku congregacionpi qatipakunapaq hina kaspanku (2 Cor. 1:24; 1 Tes. 5:12, 13). Paykunaqa anchatam congregacionpaq llamkanku hinaspapas Diospa llaqtanpa ima nisqantapas kasukunkum. Chaymi kusikuywan Diosmanta imayna willakunapaq yanapakuykuna chaskisqankuta ruwayman apanku. Yaqapaschá wakinkuqa qallariypi iskayrayarqaku telefonontakama, achka runakunapa kasqanpi otaq huk lawkunapipas Diosmanta willakuytaqa. Ichaqa, pisi-pisimantam musyakurqaku chayna ruwayqa allinpi tukusqanta. Rimarisun Alemania nacionniyoq tawa precursorkunamanta. Paykunam negociokunapa kasqan lawman Diosmanta willakunankupaq rirqaku. Huk kaqnin Michael sutiyoq ancianom nin: “Unay watañam negociokunapa kasqan lawpiqa Diosmanta mana willakurqanikuchu, chaymi manchakurqaniku. Chayna tarikusqaykuta Jehova Dios yachaspanmi yanapaykuwarqaku chay punchaw allintapuni paymanta willakunaykupaq. ¡Ancha kusisqamá tarikurqaniku paypi hapipakuspa Diospaq Llamkayninchik niq qellqapa yanapakuyninkunata kasukusqaykumanta!”, nispa. ¿Chaynatachu ñoqanchikpas nichwan? ¿Yaqachu qellqanchikkunapa yanapakuyninkuna qosqanta kasukuchkanchik?

10. ¿Imatam qayninpakunalla Diospa llaqtanqa tantearurqa?

¹⁰ Wakinpim Jehova Diospa llaqtanqa imatapas tanteanan imapas aswan allin kananpaq. Chayraykum qayninpakunalla achka Betel wasikuna aswan hatun Betel wasikunaman hukllawasqa karqaku. Chaykuna kasukuy wakin cristianokunapaq sasaniraq kaptinpas, pisi tiempomantam musyakurqaku ancha allin kasqanmanta (Ecl. 7:8). Paykunapaqqa, ¡mayna kusikuypaqmi Diospa llaqtanpi kasqankuqa!

11-13. ¿Imakunamanmi amañananku karqa huk law Betel wasiman astakuq wakin cristianokunaqa?

¹¹ Betel wasikuna hukllawakuptin iñiqmasinchikkunapa kasukuq kasqankuqa qatipakunapaqmi. Wakin iñiqmasinchikkunaqa chay hukllawakuq Betel wasikunapim unay watakuna llamkarqaku. Rimarisun Centroamérica law Betel wasipi Rogelio sutiyoq casarasqa iñiqmasinchikmanta. Paykunatam nirqaku México nacionpi kaq hatun Betel wasiman astakunankupaq. Paymi nin: “Sasam karqa aylluykunamantawan amistadniykunamanta rakikuyniykuqa”, nispa. Hina México nacionpi Betel wasiman astakuq Juan sutiyoq iñiqmasinchikpas ninmi: “Mosoqmantam amistadkunata armanayki hinaspapas amañanaykitaqmi chay nacionpi imayna kawsakusqankuman hinaspa piensasqankumanpas”, nispa.

¹² Europa lawpi kaq wakin Betel wasimanta cristianokunapas, Alemania Betel wasimanmi astakurqaku. Paykunapaqpas sasaniraqmi karqa, ¿imanasqa? Suiza nacionpi kuyayllapaq kaq orqokunapa kasqanpi yachasqankuraykum. Austria nacionmanta cristianokunapaqpas sasam karqa llaqtankupi kawsakuyman amañarusqankurayku.

¹³ Huk law Betel wasiman astakuq cristianokunaqa amañanankum karqa mosoq wasiman, chaypi kaq iñiqkunaman hinaspa wakinpi huk llamkayta yachaymanpas. Amañanankutaqmi karqa mosoq congregacionman, huk lawpi Diosmanta willakuyman hinaspa wakinpi huk rimaymanpas. Chaykunaman amañay sasa kaptinpas, Betelpi achka llamkaqkunam kasukurqaku. ¿Imanasqa?

14, 15. (1) ¿Imaynatam achka cristianokuna qawachinku Diospa llamkaqmasin kasqanku chaninchasqankuta? (2) ¿Imaynatam paykunata qatipakuchwan?

¹⁴ Grethel sutiyoq cristianam nin: “Ñoqaqa manam kay llaqtallapichu, kay wasillapichu nitaq kay llamkayllaypichu Jehova Diostaqa servini. Chaymi kasukurqani pay kuyasqayta qawachinaypaq”, nispa. Dayska sutiyoq cristianañataqmi nin: “Chay kamachiwasqanku Jehova Diosmanta hamusqanraykum mana iskayrayaspay kasukurqani”, nispa. André hinaspa Gabriela casarasqa cristianokunapas ninkum: “Kay kamachikuyqa qawachiwarqakum ima munasqaykutapas qepaman churaspayku Jehova Diospa munayninta puntapi churanaykupaq”, nispa. Paykunaqa ninkum Diospa llaqtan imatapas kamachiptin kasukuyqa ancha allin kasqanmanta.

¹⁵ Betel wasikuna hukllawakuptinmi chaypi wakin llamkaqkunata ninku precursor kanankupaq. Chaynam karqa Europa norte lawninpi Betel wasi kananpaq Dinamarca, Noruega hinaspa Suecia Betel wasikuna hukllawakuruptinku. Chay Betelpi llamkaqkunamanta huk kaqninkum karqa Florianwan Anja sutiyoq casarasqa cristianokuna, paykunam ninku: “Precursor kanaykupaq kamachiwasqankutaqa ancha allinpaqmi hapiniku. Kusikunikum Jehova Dios hinalla servichikuwasqankumanta. Sonqomantapunim niymanku Jehova Dios achkanpi bendeciwasqankumanta”, nispa. Ichapas, paykuna hinaqa mana haykapipas tarikusunchu. Chayna kaptinpas, paykunapa kasukuq kasqankuta qatipakusun hinaspa paykuna hina Diospa Munaychakuyninta puntapi churasun (Is. 6:8). Jehova Diosqa bendecinmi tukuy sonqonkuwan maypiñapas serviqninkunataqa.

DIOSPAQ LLAMKASQANCHIKTA KUSIKUYWAN HINALLA RUWASUN

16. (1) ¿Imatam Galatas 6:4 niwanchik? (2) ¿Ima ruwaywantaq llapanchik anchata kusikunchik?

¹⁶ Runakunaqa pantaq kasqanchikraykum piwanpas tupachinakuchkanchik. Diospa Palabranmi ichaqa niwanchik sapakama ruwasqanchikpi reparananchikmanta (leey Galatas 6:4). Yaqa llapanchikmi congregacionpi mana punta apaqchu kanchik. Manataqmi llapanchikchu atinchik precursor otaq misionero kayta otaq Betel wasipi llamkayta. Ichaqa amam kayta qonqananchikchu: llapanchikmi Diosmanta willakuspa paypa llamkaqmasin kanchik. ¡Chayqa ancha kusikunapaqmá!

17. (1) ¿Imatam ichapas Satanaspa munaychakusqanpiqa mana ruwayta atisunchu? (2) ¿Imanasqam chaywanqa mana hukmanyananchikchu?

¹⁷ Satanaspa munaychakusqanpiqa, manapaschá Jehova Diospaq tukuy ruway munasqanchiktaqa ruwayta atisunchu. Ichaqa amayá chaywanqa hukmanyasunchu. Familiayoqña, onqoqña otaq huk sasachakuyniyoqña kaspapas, atichwanmi Jehova Diospa sutinmantawan Gobiernonmanta maypipas willakuytaqa. ¡Amayá chaytaqa mana kaqpaq hinaqa hapisunchu! Tukuy atisqanchikta ruwaymi imamantapas aswan allinqa. Jehova Diostayá mañakusun ñoqanchikmanta aswan atiq iñiqmasinchikkunata yanapananpaq. Jehova Diospaqqa ancha chaninniyoqmi lliw serviqninkunaqa.

18. ¿Imatam hawka suyananchik, hinaspa imanasqa?

¹⁸ Pantaq runakunaña kaptinchikpas, Jehova Diosqa ancha kusisqam tarikun llamkaqmasinkuna kasqanchikmanta. ¿Chaninchanchikchu kay tukupay tiempokunapi paypa llamkaqmasin kasqanchikta? Chayna kaptinqa, hawkam suyasunchik mosoq pachapiña tukuy munasqanchikta ruwanapaq. Mosoq pachapi kaspaqa kusisqallañam hawkayaypi wiñaypaq kawsakusunchik (1 Tim. 6:18, 19).

19. ¿Ima mosoq llamkaytam Jehova Dios qowasun?

¹⁹ Kunanqa mosoq pachapi kawsakuyqa hichpallapiñam kachkan. Yuyarisun Prometesqa Allpaman Israel runakuna manaraq yaykuchkaptinku Moisespa kayna nisqanta: “Yupaychasqanchik Tayta Diosmi tukuy rurasqaykichikpi allinta kawsachisunkichik”, nispa (Deut. 30:9). Armagedon guerra pasaruptinmi Jehova Diosqa nisqankunata cumplinqa lliw llamkaqmasinkunaman kay Allpa pachata qospan. Hinaptinmi huk mosoq llamkayta chaskisun, chayqa kay Allpa pachata suma-sumaq huertaman tikraymi.