Diosta servisqanchikta allinpaq hapisunchik
1 Ñawpa tiempomantaraqmi Jehová Diosqa serviqninkunata tukuy imata ruranankupaq kamachirqa hayka watayoqñapas, warmipas, qaripas, apupas otaq wakcha kaptinkupas (Luc. 1:41, 42; Hech. 7:46; Fili. 1:29). ¿Imanichwantaq kunan tiemponchikmanta? ¿Ima bendicionkunatam Jehová Diosqa qowanchik?
2 Diospaq wakin rurayninchikkuna. Puntataqa Jehová Diosmi bendeciwanchik paymanta yachananchikpaq (Mat. 13:11, 15). Huñunakuykunapipas alabachwanmi rimanapaq kaptin rimaspa (Sal. 35:18). Chaymi, huñunakuypi rimanapaq kaptinqa rimaspanchikmi Diosninchikta alabachwan otaq imata ruranapaq kaptinpas kusisqa chaynataq kallpanchakuspapas ruraspanchik. ¿Yanapakullanchikchu huñunakusqanchik Salonta chuyanchaypi chaynataq allichaypipas? Kaykunapas Jehová Diospa bendicionninmi.
3 Wara-waranqantin runakunam mana yachankuchu mañakusqanku uyarisqa kasqanta, ñoqanchikmi ichaqa kusikunchik tukuy ima unanchaq Diosninchikpuni uyariwasqanchikwan (Pro. 15:29). Serviqninkunapa mañakusqantaqa kikin Jehová Diosmi uyarin (1 Ped. 3:12). Payqa mañakunanchikta manam haykapipas harkawanchikchu. Cheqaptamá, Jehová Diosqa kallpanchawanchik ‘tukuy tiempo mañakunanchikpaq’ (Efe. 6:18).
4 ‘Diospa llamkaqmasin.’ Anchata kuyanapaq rurayninchikqa ‘Diospa llamkaqmasin’ hina Munaychakusqanmanta allin noticiata willakuymi (1 Cor. 3:9). Kay rurayninchikmi kallpanchawanchik hinaspa anchata kusichiwanchik (Juan 4:34). Jehová Diosqa hukkunata servichikuspa atispanpas kuyawaspanchikmi chayta rurananchikpaq ñoqanchikta encargaruwarqanchik (Luc. 19:39, 40). Jehová Diosqa manam llapallan runamanchu chayta ruranankupaq kamachin, predicaqkunaqa Diospa yachachisqantam kasukunanku (Isa. 52:11). Chaynaqa, ¿chaninchanchikchu chay rurayninchikta hinaspa sapa semanapaq arreglo rurasqanchikpiqa chaypaq tiempota hapinchikchu?
5 Jehová Diosta servinanchikpaq favorecewasqanchikqa kusichiwanchikmi (Pro. 10:22). ¡Amayá haykapipas yanqa rurayta hinaqa qawasunchu! Chaninchasqanchiktayá qawachisunchik. Chaynata ruraspam hanaq pachapi kaq Taytanchiktaqa kusichisunchik, paymantam “chaskinchik llapa ima allin kaqkunataqa” (Sant. 1:17).