BIBLIAMANTA TAPUKUYKUNA
¿Imam yanapanman warmaykikuna Diosta kuyananpaq?
Diospa unanchasqankunata qawachispa warmaykikunata yanapay Diosta kuyanankupaq
Warmaykikuna Diosta kuyanankupaqqa, paytam riqsinanku hinaspapas kuyasqantam yachananku (1 Juan 4:8). Yachanankum runata imanasqa unanchasqanmanta, imanasqa runakuna ñakarinanta saqisqanmanta hinaspa hamuq tiempopi ñuqanchikpaq imakuna ruwananmantapas. (Leey Filipenses 1:9.)
Warmaykikuna Diosta kuyanankupaqqa, paykunapas qawanankum qam kuyasqaykita, chayta ruwaptikiqa qatipakuytachá munanqaku. (Leey Deuteronomio 6:5-7; Proverbios 22:6.)
¿Imaynatam qampas yanapawaq?
Diospa Palabranqa ancha atiyniyuqmi (Hebreos 4:12). Chaynaqa warmaykikunata yanapay Bibliamanta yachanankupaq. Warmaykikunapa sunqunman chayanaykipaqqa Jesuspa imayna yachachisqantam qatipakunayki, pay hinam: tapukuykunata ruwanayki, ima nisqankuta uyarinayki hinaspa mana entiendesqankutapas yachachinayki. (Leey Lucas 24:15-19, 27, 32.)
Chaymantapas runakunata Dios kuyasqanmanta Bibliapi willakusqantam warmaykikunawan leewaqchik. Chaynata ruwaptikim Unanchawaqninchiktaqa astawan riqsinqaku hinaspa kuyanqakupas. Chaypaqmi achka yanapakuykunata tarinki www.jw.org/quy nisqapi. (Leey 2 Timoteo 3:16.)