BIBLIAMANTA TAPUKUYKUNA

¿Imatam ruwana allin tayta-mama kanapaqqa?

Warmakunaqa allintam qispinku tayta-mama respetanakuspa kuyanakuptinkuqa (Colosenses 3:14, 19). Warmakunaqa munankutaqmi tayta-maman kuyananta chaynataq alabaykunantapas. Jehova Diosmi churin Jesucristota nirqa kuyasqanmantawan payrayku kusikusqanmantapas, chaytam tayta-mamakunapas qatipakunanku (leey Mateo 3:17).

Taytanchik Jehova Diosqa uyariwanchikmi hinaspa sunqunchikpi imayna tarikusqanchiktapas entiendenmi. Tayta-mamakunaqa Jehova Dios hinam churi-wawankupa ima nisqantapas allinta uyarinanku (Santiago 1:19). Respetanankutaqmi sunqunkupi imayna tarikusqankutapas. Manataqmi wakin tanteasqankupi pantaruptinkuqa chayllaqa piñakunankuchu nitaq qaqchanankuchu (leey Numeros 11:11, 15).

¿Imatam ruwana wawa-churikuna allin ruwaq kanankupaq?

Tayta-mamaqa warmankumanmi kamachinanku imata ruwanankupaq utaq imata mana ruwanankupaqpas (Efesios 6:1). Ichaqa, Jehova Dios hinam allinta entiendechinanku chay kamachikuykunamanta chaynataq mana kasukuptinku ima pasananmantapas. Chaynata uywaspaqa kuyasqankutam qawachinku (Genesis 3:3). Kasukunankupaq hikutanankumantaqa entiendechinanmi imanasqa allinninkupaq kasqanta (leey Isaias 48:18, 19).

Kallpanchakuy warmaykikuna Jehova Diosta kuyanankupaq yanapaypi. Yachachisqaykiman hina kawsaspankuqa, paykunapa qayllanpi mana kaptikipas allin kaqtam ruwanqaku. Diosqa manam rimaspallachu yachachiwanchik, yachachiwanchiktaqmi ruwasqanwanpas, chaynatayá qampas ruway (leey Deuteronomio 6:5-7; Efesios 4:32; 5:1).