QARANPI KAQ YACHACHIKUY | ¿IMAYNATAQ KANKU JEHOVA DIOSPA TESTIGONKUNAQA?
¿Imanasqataq Diosmanta maypipas willakuniku?
Ñuqaykuqa suti riqsiyllam Diosmanta maypipas willakuniku. Willakunikum wasin-wasin rispa utaq maypipas runakunapa kasqanpiqa. ¿Imanasqataq chayta ruwaniku?
Ñuqaykuqa munanikum lliw runakuna Jehova Diosmanta yachanankuta (Hebreos 13:15). Kasukunikutaqmi Jesuspa kamachisqantapas, paymi nirqa: “Chaynaqa llapallan nacionpi runakunaman rispayá willamuychik qatiqniykunaña kanankupaq. [...] Yachachimuychikyá qamkunaman tukuy ima kamachisqayta kasukunankupaq”, nispa (Mateo 28:19, 20).
Runamasiykuta kuyasqaykuraykutaqmi chaykunata ruwaniku (Mateo 22:39). Yaqa lliw runakunam sapaq religionniyuq kanku chaymi wakinqa mana uyariwankuchu. Ichaqa yachanikum bibliapi yachachikuykunalla vidanku salvanankupaq yanapasqanta. Chaymi hinalla tukuy tiempo kallpanchakuniku Jehova Diosmanta chaynataq Jesucristomanta lliw runakunaman willanaykupaq. Chaynatam ruwarqaku apostolkunapa tiempopi kaq iñiqkunapas (Hechos 5:41, 42).
Antonio Cova Maduro sutiyuq runam nirqa: ‘Jehova Diospa testigonkunaqa tukuy sunqunkuwanmi anchata kallpanchakunku Diosmanta enteron pachapi willakunankupaq’, nispa (El Universal, Venezuela).
Ruwasqayku qillqakunataqa manam testigokunallachu leenku. Kallpanchakunikutaqmi sapaq religionpi kaq wara-waranqantin runakunaman bibliamanta yachachinaykupaqpas, paykunaqa munankum testigokuna watukunankuta.
Ñuqaykumanta astawan yachanaykipaqqa:
Huk kaqnin testigota tapuy.
Internetpi maskay www.jw.org/quy nisqanta.
Huñunakuyniykuman riy. Manam qullqipaqchu, chaymanqa lliw munaqkunam rinku.