QARANPI KAQ YACHACHIKUY | ¿ALLINRAQCHU ALLIN KAQKUNATA RUWAYQA?
Llullakuyqa llapallanchikpaqmi mana allin
Sudáfrica nacionmanta Samantha sutiyuq warmim nin: “Achka kutipim llullachakuyqa yanapasunki mana pinqaypi qipanaykipaq”, nispa.
¿Allinchu chay ruway qampaq? Yaqa llapanchikmi achka kutipi yaqa chayna sasachakuypi tarikurqanchik. Ichaqa llullakusqanchik utaq mana llullakusqanchikmi qawachinqa imayna runa kasqanchikta. Wakinpim ichapas runapa qayllanpi allin qipayta munasqaykirayku mana allin ruwasqaykimanta llullakuyta munawaq. Tiempopa risqanman hinam ichaqa, huchaykita riqsikunayki kanqa imam kaq yachakuruptin. Qatiqninpiyá qawasun llullakuy ima mana allinkuna apamusqanmanta.
LLULLAKUYQA RIQSINAKUSQAYKIMANTAM KARUNCHASUNKI
Piwanpas allin amistad kanapaqqa confianzapaqmi hapinakunanchik. Ichaqa manayá riqsinakusqanchik horallachu chayna amistadqa kasun. Aswanqa tiempopa risqanman hina imam kaqta willanakusqanchikrayku hinaspa allinninpaq imatapas ruwasqanchikraykum. Amistadnikita llullakuruptikiqa utaq ima mana allinta ruwaruptikiqa qanmantam karunchakurunman. Sasañam kaqmanta amistad kayqa.
¿Haykallapipas amistadniki llullakusurqankichu? Chayna kaptinqa mayna hukmanyasqach qiparurqanki. Qawamusqanchikman hinam llullakuyqa allin amistadkunatapas karunchachin.
LLULLAKUQKUNAWAN KASPAYKIQA LLULLAKUYTAM YACHARUWAQ
Robert Innes sutiyuq profesormi nirqa, ‘llullakuqkunawan amistad kaqkunaqa llullakuy yachasqankumanta’ (Profesor de Economía de la Universidad de California). Llullakuyqa ratakuq unquy hinam. Piwanpas llullakuq kaqwan unay tiempo kaspaqa pay hina llullakuytam qallaykuchwan.
¿Imatam ruwachwan mana hukkuna hina llullakuyta qallaykunapaq? Chaypaqqa bibliam yanapawasun qatiqninpi sumaq yachachikuyninkunawan.