Navidad fiestataqa ¿Jesuspa qatiqninkunaqa ruwanankuchu?

Wara-waranqantin runakunam navidad fiestataqa ruwanku Jesuspa santonmi nispanku. Ichaqa ¿yaqachum Jesuspa apostolninkunaqa navidad fiestataqa ruwanmanku karqa Jesuspa santonmi nispanku? Chaymantapas ¿ima nintaq bibliaqa santokuymanta? Chaykunamanta yachaymi yanapawasunchik navidad fiestata ruwanapaq utaq manapas.

Bibliaqa manam ninchu Jesus hinaspa Diosta serviqkunapas santokusqankumantaqa. Aswanmi willakun Diosta mana yupaychaq iskay runakuna santokusqanku punchaw mana allinta ruwasqankumanta (Genesis 40:20; Marcos 6:21). Encyclopædia Britannica nisqan qillqapas willakunmi Jesuspa qatiqninkunaqa santokuyta mana allinpaq qawasqankumanta.

Bibliaqa manataqmi willakunchu imay punchawpi Jesus nacesqantaqa. Diccionario de historia de la Iglesia niq qillqapas willakunmi: “Manam yachakunchu imay punchawpi nitaq imay killapi Cristopa nacesqanqa”, nispa. Sichum Jesus munanman karqa nacesqan punchawta qatiqninkuna yuyarinankuta hinaspaqa, willanmanchá karqa haykapi nacesqanta yachanankupaq.

Chaymantapas, bibliaqa manam willakunchu Jesuspas nitaq qatiqninkunapas navidad fiestata ruwasqankumantaqa. New Catholic Encyclopedia niq qillqapa nisqanman hinaqa, navidad rimayqa Jesuspa wañukusqanmanta yaqa 300 wata qipatañas wamaq rikurisqa, “Cronógrafo de Filócalo” nisqa sutiyuq Roma nacionniyuq runakunapa almanaquenpi. Arí, navidad rimayqa rikurirqa biblia qillqayta tukurusqanku qipatañam. Chaymi McClintock hinaspa Strong runakunaqa Cyclopedia niq qillqankupi ninku, navidad fiesta ruwayqa mana Diospa kamachikuynin kasqanta nitaq musuq testamentopipas mana kasqanta.a

Jesusqa qatiqninkunataqa niqmi ima ruwanankupaqpas, chay nisqankunaqa tarikun bibliapim. Ichaqa manam kanchu navidad fiestata ruwanankupaq nisqanqa. Imaynam yachachiqpas munan yachachisqanman hina yachachisqan runa ruwananta, chaynam Jesuspas munan qatiqninkuna bibliapi ‘qillqasqa kasqanman hinalla ruwananchikta’ (1 Corintios 4:6).

Jesusqa qatiqninkunatam nirqa wañukusqan punchawta yuyarinankupaq, chaymi yachachirqa imaynata ruwanankupaq hinaspa haykapi ruwanankupaq. Chayraykum qatiqninkunaqa sapa wata yuyarirqaku Jesuspa wañukusqanta (Lucas 22:19; 1 Corintios 11:25).

Qawamusqanchikman hinam navidad fiestaqa tupan santokuywan, chaymi Jesuspa qatiqninkunaqa mana navidadtaqa ruwarqakuchu. Chaymantapas, bibliaqa manam willakunchu Jesuspas nitaq Diosta yupaychaq runakunapas navidad fiestata ruwasqankumantaqa. Chaymi waranqantin Jesuspa qatiqninkunaqa navidad fiestataqa mana ruwankuchu.