¿Yanapawanchikraqchu bibliaqa?

WAKINMI NINKU MANAÑA YANAPAKUSQANTA. Huk doctormi nirqa yanapawananchikpaq bibliata servichikuyqa 1920 watapiraq lluqsimuq qillqata servichikuy hina kasqanta. Bibliapa nisqanta mana kaqpaqpas hapiqkunaqa ichapas nisunkimanraq: “¿Yaqachu laqla computadorapa papelninta qawawaq musuq computadorata servichikunaykipaq?”, nispa. Ninkum bibliaqa qalaypaq mana imapipas yanapawasqanchikta.

¿Pitaq ñawpaq tiempopiraq qillqasqa librota servichikuyta munanman kunan tiempopi tukuy qillqakuna kachkaptinqa? Internet nisqapipas tarichwantaqmi yanapakuykunataqa. Televisionpipas yachaysapa runakunam sapa punchaw tukuymanta yachachinku. Runakunapa qillqasqanku librokunapas achkallañam kachkan.

Achkallaña yanapakuykuna kachkaptinqa, ¿imapaqtaq qawanchikman ñawpaq tiempopiraq qillqasqa bibliataqa? ¿Wakin runakunapa nisqanman hinachu bibliapa yachachikuyninkunaqa kanman laqla computadorapa papelnin hina? Manamá chaynachu. Runakunapa yachasqankuwan ruwasqanku watakunapa risqanman hina mana chaynalla kaptinpas, hinallam munanchik kusisqa hinaspa hawkalla kawsakuyta chaynataq runamasinchikkunawanpas allinlla kawsakuyta.

Bibliaqa ñawpaq tiempopiraq qillqasqa kaspanpas tukuy chaykunamantam yachachiwanchik. Willawanchiktaqmi tukuy ima unanchaqpa qillqachisqan kasqantapas. Yanapawanchiktaqmi tukuy ima sasachakuykuna kaptinpas imayna atipananchikpaq (2 Timoteo 3:16, 17). Chaymantapas, tukuy ima yachachikuyninkunaqa wiñaypaqmi. Kikin bibliam nin: “Diospa palabranqa kawsachkanmi”, nispa (Hebreos 4:12).

¿Chiqapchu bibliapa chayna nisqankunaqa? ¿Yaqachu bibliaqa tukuy imapi yanapawanchikman? Kay qillqapi hinaspa qatiqnin killakunapi lluqsimuq Willakuq qillqakunapim chay tapukuykunamanta yachasun.