Bibliam yanapawanchik imam allin utaq mana allin kasqanta yachanapaq

Kikinchikpa utaq runakunapa piensasqanman hina tukuy tiempo tantiakuspaqa wakinpiqa sasachakuypim tarikusun. Bibliapim imanasqa chayna kasqanmanta willawanchik. Willawanchiktaqmi imata ruwaspa kusisqa kawsakunamantapas. Arí, bibliaqa yanapawanchikmi imam allin utaq mana allin kasqanta yachanapaq.

DIOSTA UYARISPALLAM ALLINTAQA TANTIAKUSUN

Bibliapim kikin Jehovaa Dios niwanchik runaqa pay yanapawaptillanchik allin kawsakunamanta. Manamá kikinchik tantiakuspa kawsakunapaqchu unanchasqa karqanchik (Jeremias 10:23). Chaymi bibliata quwarqanchik chayta qawaspa vidanchikpi allinta tantiakunapaq. Diosqa anchata kuyawasqanchikraykum allinta tantiakunanchikta munan, manam ñakarisparaq imam allin kasqanta yachananchiktachu (Deuteronomio 5:29; 1 Juan 4:8). Payqariki unanchaqninchikmi, ancha yachayniyuqmi, sumaqtataqmi riqsiwanchik, chaymi yachan ima ruway allinninchikpaq kasqanta (Salmos 100:3; 104:24). Chaywanpas manam pitapas obliganchu kamachikuyninman hina kawsakunanpaqqa.

Jehova Diosqa Adanman hinaspa Evamanqa tukuy ima necesitasqankutam qurqa kusisqa kawsakunankupaq (Genesis 1:28, 29; 2:8, 15). Ichaqa qurqataqmi facil kasukuy kamachikuytapas, paykunam tantiakunanku karqa chayta kasukunankupaq utaq manapas (Genesis 2:9, 16, 17). Ichaqa Adanwan Evaqa munasqankuman hina kawsakunankupaqmi tantiakurqaku, manam Diospa kamachikuyninman hinachu, chayqa llakikuypaqmi karqa (Genesis 3:6). ¿Imaynataq runakunaqa kachkanchik kikinchik imam allin utaq mana allin kasqanta tantiakusqanchikrayku? ¿Allinchu kawsakuchkanchik? Manam. Runakunaqa ñawpaqmantaraqmi ñakariyllapi kawsakuchkanchik Diospa kamachikuyninkunata mana kasukusqanchikrayku (Eclesiastes 8:9).

Bibliapim sumaq yachachikuykuna kachkan maymantaña kaspapas imam allin kasqanta yachaspa allinta tantiakunapaq (2 Timoteo 3:16, 17; Qawaytaq “Lliw runakunapaq libro” niq yachachikuytapas). Chaymantam qatiqninpi yachasun.

Yachaykuy imanasqa bibliaqa ‘Diospa palabran’ kasqanmanta (1 Tesalonicenses 2:13). Chaypaq yaykuy jw.org nisqaman hinaspa qaway ¿Pipa yuyaychasqantaq bibliaqa? niq videota.

¿IMANASQATAQ WAKINQA BIBLIA LEEYTA MANA MUNANCHU?

Wakin runakunam ninku bibliapi nisqankunaqa allinta kawsakunankupaq mana yanapananmanta. Yachaykusunyá ima nisqankumanta:

Ninkum: “Bibliapiqa huk partenpim hukta nin, huk partenpiñataq hukta”, nispanku.

Manam chaynachu: Biblia leeyta qallaykuptikiqa ichapas chayna rikchakusunkiman, ichaqa llapanta leeruspaykiqa hinaspa ima tiempopi qillqakusqanta, ima costumbre kasqanta, pikuna qillqasqankuta yacharuspaykiqa cuentatam qukunki lliwpi tupasqanta.

Chaymanta astawan yachanaykipaq leey “¿Se contradice la Biblia?” niqta jw.org niqpi.

Ninkum: “Bibliata leeq runakunapas mana allinkunatam ruwanku. Chaynaqa bibliaqa manachá allinta ruwananchikpaqqa yanapawanchikmanchu”, nispanku.

Manam chaynachu: Bibliata mana kasukuspanku runakuna mana allin ruwasqankumantaqa manam bibliamanqa tumpachwanchu. Bibliaqa willakurqañam wakin runakunaqa hinaspa religionpi wakin punta apaqkunaqa bibliapa ima nisqanta yachachispankupas kikinkuqa mana kasukunankumanta. Nirqataqmi paykunapa kawsankupi Diospa yachachikuyninkunamanta ‘mana allinta rimanankuta’ (2 Pedro 2:1, 2).

Religionkunapa achka umalliqninkunam mana bibliapa nisqanman hinachu kawsakunku, chaymanta yachanaykipaqmi leewaq “¿Allinchu kanman Diosmanta yachachispanku qullqita mañayninkuqa?” niqta jw.org niqpi.

Ninkum: “Bibliaqa runakunatam chiqninachin” nispanku.

Manam chaynachu: Bibliaqa niwanchikmi lliwta respetanapaq. Niwanchiktaqmi imayna mana kanapaqpas:

Manam hukkunamanta aswan allinpaqqa hapikunanchikchu (Filipenses 2:3).
Niwanchiktaqmi huk religionniyuqkunatapas, ñuqanchik hina mana piensaqkunatapas respetanapaq (1 Pedro 2:17).
Manam pitapas obligananchikchu ñuqanchik hina piensanankupaqqa (Mateo 10:14).

Bibliaqa ninmi Diosqa lliw runakunata kuyasqanta hinaspa allin ruwaq kasqanta. Payqa munanmi ñuqanchikpas chayna kananchikta (Romanos 9:14).

Chaymanta astawan yachaykunaykipaqmi leewaq “¿Biblia yanapawanchikmanchu entiendeq kananchikpaq?” niqta jw.org niqpi.

DIOSQA BIBLIAWANMI ALLINTA TANTIAKUNAPAQ YANAPAWANCHIK

Bibliam willawanchik ñawpaqmantapacha runakunata Diosqa yanapasqanmanta. Bibliata leespam yachanchik imayna kawsakunanchikta Diosqa munasqanta, payqa yachanmi ima ruway allinninchikpaq utaq mana allinninchikpaq kasqanta (Salmos 19:7, 11). Leespaqa yachasunmi imaynata allinta kawsakunapaq. Kamachikuyninkunaqa tukuy tiempom yanapawanchik.

Qawaykusun Proverbios 13:20 versiculopi ima consejawasqanchikta. Niwanchikmi: “Yachayniyuqkunawan hukllawakuqqa yachayniyuqmi kanqa, mana yuyayniyuq sonso runakunawan hukllawakuqmi ichaqa sasachakuypi kanqa”, nispa. Kay consejoqa ñawpaqpi Diosta serviqkunatapas yanaparqam, kunanpas hinallam yanapawanchik. Chayna sumaq consejokunam bibliapiqa achka kakuchkan (Qaway “Bibliapi consejokunaqa kunanpas yanapawanchikmi” niq recuadrota).

Ichapas nikunki: “Kunan tiempopas ¿bibliata kasukuyqa vidaypi yanapawanmanchu?”, nispa. Qatiqninpim yachasun imaynata bibliapa consejonkuna achka runakunata yanapasqanmanta.

a Bibliapim nin Diospa sutinqa Jehova kasqanta (Salmos 83:18).

BIBLIAPI CONSEJOKUNAQA KUNANPAS YANAPAWANCHIKMI

2.000 wataña biblia qillqakusqanmanta pasaruptinpas hinallam kunan tiempopipas yanapawanchik. Runakunaqa hinallamá munachkanchik kusisqa hinaspa allin kawsakuyta (Eclesiastes 1:9). Chaypaqmi bibliapi consejokuna yanapawachwan. Rimapayawanchikmi:

Conciente runa kanapaq

Hebreos 13:18 niwanchik: ‘Munachkanikum tukuy imapi mana llullakuspa allinlla kawsakuyta’, nispa.
Efesios 4:28 niwanchik: “Pipas suwakuqqa amañayá suwakuchunchu, aswanqa anchata llamkachun imapas allin llamkaypi”, nispa.

Hukkunawan allinlla kawsakunapaq

1 Corintios 10:24 niwanchik: “Sapakamayá maskachun wakinkunapa allinninta, amayá kikillanpa allinnintachu”, nispa.
Colosenses 3:13 niwanchik: “Piñanakunaykichikpaq razon kaptinpas amayá piñakuychikchu, aswanqa tukuy sunqumantayá hinalla pampachanakuychik”, nispa.

Allinta tantiakunapaq

Proverbios 14:15 niwanchik: “Mana yuyayniyuq runaqa tukuy ima nisqankutam chaylla creerun, yuyayniyuq runam ichaqa imapaqpas allinta tantian”, nispa.
Proverbios 22:3 niwanchik: “Allin tantiuyuq runaqa sasachakuyta qawarispanmi asurikun, mana yuyayniyuq runam ichaqa mana asurikusqanrayku ñakarin”, nispa.