Ayllunchik wañukuptin

Australia nacionpi yachaq Vanesam willakun: “Mayor turiymi qunqayllamanta wañukurqa. Achka killaña pasaruptinpas hinallam waqarqani. Wakinpim niq kani ‘¿imanasqataq turiyraq wañukun?’, nispa. Ñakakurqanitaqmi turiypaq mana tiempochakusqaymantapas”, nispa.

HUK kaqnin aylluyki utaq kuyasqayki runa wañukuptinqa maynatachá waqarqanki, ichapas ñakakurqanki wañukuqpaq imapas mana ruwasqaykimanta. Nirqankipaschá chay llakikitaqa mana atipanaykimanta.

Wañukuq ayllunchikmanta waqayqa allinmi. Waqaspanchikqa qawachichkanchikmi wañukuqta anchata kuyasqanchikta. Chaywanpas, ¿yaqachu imapas sunqunchikta tiyaykachinman?

¿IMATAM WAKIN RUNAQA RUWARQA?

Ichapas ninki: “Manam imapas sunquytaqa tiyachinmanchu”, nispa. Chaywanpas kay sumaq yanapakuykunam sunquykita tiyaykachinman.

AMA WAQAYTAQA PINQAKUYCHU

Wakiqninchikqa ayllunchik wañukuptinqa unaymi llakisqa kallanchik. Chayna kaptinpas, waqayninchikqa hawkayanapaqmi yanapawanchikman. Vanesam willakun: “Turiy wañukuptinmi achka punchawkuna waqarqani, chaywanmi sunquyqa tumpallatapas tiyaykurqa”, nispa. Sofiapa ñañanpas qunqayllamantam wañukurqa. Sofiam willakun: “Wañukuq ñañayta yuyarispayqa anchatam waqani. Ichaqa tiempopa pasasqanman hinam hawkayachkaniña”, nispa.

IMAYNA TARIKUSQAYKITA WILLAKUY

Pininchikpas wañukuptinqa wakinpiqa sapallanchik kaytam munanchik, chaywanpas kallpanchakunam llakinchikmanta hukkunawan rimanapaq. 17 watanpi kaq Javierpa taytanmi wañukurqa. Paymi willakun: “Muspayniypi hinachusmi llakiymanta tukuyta hukkunaman willakurqani. Ichaqa willakusqaymi anchata yanapawarqa”, nispa. Qallariynin yachachikuypi rimamusqanchik Yanetpas ninmi: “Hukkunaman llakiyta willakuptiymi sunquypas tiyaykurqaraq”, nispa.

HUKKUNAPA YANAPASUSQAYKITA CHASKIKUY

Huk doctoram nin: “Pinikipas wañukuptin aylluykikuna hinaspa amistadnikikuna yanapayta munasuptikiqa chaskikuy, chayqa yanapasunkim sunquyki tiyaykunanpaq”, nispa. Kikinchikpas amistadninchikkunataqa nichwantaqmi imapipas yanapaykuwananchikpaq (Proverbios 17:17).

DIOSMAN ASTAWAN ASUYKUY

Taniam willakun: “Cancer unquywanmi qusay wañukurqa, payllamanmi tukuy imata willakuq kani. Wañukusqan qipamanmi ichaqa Diosllamanña tukuy imata willakurqani. Diosqa anchatam yanapaykuwarqa”, nispa. Taliapañataqmi 22 watanpi kachkaptin maman wañukurqa, paymi willakun: “Bibliatam sapa punchaw ñawincharqani, chaywanmi sunquyqa tiyaykuq”, nispa.

KAWSARIMUNANPI YUYAYMANAY

Taniam nin: “Qusay kawsarimunanmanta yachasqaywanpas qallariyllanpiqa manam sunquyqa tiyarqachu. Ñuqaqa munarqani qusay ñuqawan hinaspa wawaykunawan kuska kanantam. Tawa wataña pasaruptinmi kawsarimunanmanta yachasqaywan chayraq sunquy tiyaykun. Kawsarimuptin tupaykunaykumanta yuyaymanasqaymi yanapawan hawka kanaypaq”, nispa.

Manapaschá imapas sunquykita tiyachinqachu pinikipas wañukusqan qipallamanqa, chaywanpas Vanesapa kayna nisqanmi yanapasunkiman, ninmi: “Ninkipaschá mana imawanpas sunquyki tiyananmanta, ichaqa atinkim tiempopa risqanman hina hawkayayta”, nispa.

Manaña imapas sunquykita tiyachiptinpas atiwaqmi mana llumpay llakisqa kawsakuytaqa. Diosqa yanapasunkim amistadnikikunawan kusisqa kawsakunaykipaq. Wañuqkunatapas Diosqa kawsarichimunqañam. Payqa munachkanmi wañukuq aylluykikunawan kaqmanta tupaykunaykita, chaynapi manaña llakisqa kanaykipaq.

Bibliapa nisqankunam yanapasunki

Diosqa yachanmi waqasqaykitapas hinaspa llakisqaykitapas

Dios serviq runam Diosta nirqa: ‘Qamqa wiqiykunatam huñurqanki. Chaykunataqa libroykipim qillqarunki’, nispa (Salmo 56:8).

Diosman imayna tarikusqaykita willay

Salmo 142:2, 5 nin: ‘[Jehovaa Diosllamanmi] llakiyta willakullani. Dios taytalláy, qayakamullarqaykim’, nispa.

Wañuqkunaqa kawsarimunqakum

Hechos 24:15 nin: ‘Allin ruwaq hinaspa mana allin ruwaq runakunam kawsarimunqaku’, nispa.

Diosmi niwanchik wañuqkunata kawsarichinanmanta, chay ruwaytam Diosqa munachkanb (Job 14:14, 15).

a Bibliam nin Diospa sutinqa Jehova kasqanta.

b Kawsarimuymanta astawan yachayta munaspaykiqa, qaway ¿Imaynatam wiñaypaq kusisqa kawsakuchwan? niq libropa 30 kaq yachachikuyninta. Kayqa Jehova Diospa testigonkunapa ruwasqanmi. Hurquwaqtaqmi www.jw.org niqmanta.