Yanayki hukwan tupakuruptin

España nacionpi yachaq Mariam willakun: “Huk kutipim qusay niykuwarqa huk sipaswan ripukunanmanta, chaywanmi sunquy anchata nanawarqa. Tukuypi yanapachkaptiypas saqiruwarqam”, nispa.

España nacionpi yachaq Bil sutiyuq runapas willakunmi: “Huk punchawmi qunqayllamanta warmiy hukwan ripukurqa, hinaptinmi muspaypi hina rikurirurqani. Ruwanaykupaq imapas tantiasqaykum chay punchawllapi tukururqa. Wakin punchawqa hawka hinaraqmi tarikurqani, ichaqa yuyariptiymi kaqmanta sunquyqa llakisqalla kaq”, nispa.

CASADO kaqkunapaqqa hatun llakim yananku hukwan tupakuruptinqa. Wakinqa, wanakuq yanankuta pampachaykuspankum hinalla kuska kawsakunku.a Chaywanpas, mana huchapakuq kaqmi sunqunpi ancha llakisqa tarikun. ¿Imataq yanapanman chayna llakisqa sunquyuqkunata?

BIBLIAPA NISQANKUNAM YANAPASUNKI

Yananku hukwan ripukuptin llakisqa kaqkunatam bibliapa nisqankuna sunqunkuta tiyaykachirqa. Bibliata ñawinchaspankum yacharurqaku Diosqa waqasqankuta hinaspa llakisqa kasqankutapas yachasqanta (Malaquias 2:13-16).

Salmo 94:19 nin: ‘Llakipa intusqan kallaptiymi sunqullayta tiyaykachispa kusiykachillawarqanki’, nispa.

Bilmi nin: “Bibliapa chayna nisqanta ñawinchasqaymi yuyaymanachiwarqa Jehova Diosqa kuyakuq tayta hina ñuqawan kasqanpi”, nispa.

Salmo 18:25 (NM) nin: “Diosnilláy, qamllaman sunquyuqkunataqa manam saqirunkichu”, nispa.

Carmenpa qusanmi achka killaña hukwan kakurqa. Paymi willakun: “Qusayña hukwan saqiruwaptinpas Jehova Diosqa manam haykapipas saqiwarqachu”, nispa.

Filipenses 4:6, 7 nin: “Amayá imamantapas afanakuychikchu, aswanqa Diosmanyá lliwta willakuychik tukuy tiempo mañakuspaykichik [...] hinaptinqa Diospa hawkayayninmi sunquykichiktawan yuyaynikichikta [...] waqaychanqa”, nispa.

Sabinam nin: “Bibliapa chayna nisqantam kuti-kutirispa ñawincharqani. Diosta sapa kuti mañakuptiymi sunquy hawkayaykurqa”, nispa.

Kaypi willakuq runakunaqa nirqakum llakinkuta mana atipay atinankumanta, ichaqa Jehova Diospi hapipakuspanku chaynataq bibliata ñawinchaspankum atiparurqaku. Bilmi nin: “Llakiykuna mana allichay atina rikuriruptinpas Jehova Diosmi kallpata hapinaypaq yanapawarqa. ‘Manchakuypaq tutayaq wayqunta hinaña puriptiypas’ Diosmi yanapawarqa”, nispa (Salmo 23:4).

a Wanakuq yanankuta imaynanpi pampachasqankumanta astawan yachayta munaspaykiqa, qaway (Las tragicas consecuencias de la infidelidad, ¿Es posible la reconciliación?, La opcion del divorcio) niq yachachikuyta 1999 watapi 22 abril ¡Despertad! qillqapi.

¿Imatam wakin runaqa ruwarqa?

Bibliapa yachachikuyninpim yuyaymanarqaku

Bilmi willakun: “Job qillqata chaynataq Salmos qillqata sumaqta ñawinchaspaymi kallpanchawaqniy willakuykunata señalarqani. Yacharurqanim Diosta serviqkunapas ñuqa hina llakisqa kasqankumanta chaynataq ñakarisqankumanta”, nispa.

Sumaq takikunatam uyarirqaku

Carmenmi willakun: “Wakin tutaqa manam puñuyta atirqanichu, chaymi takikunata uyariq kani, chaywanmi sunquypas hawkayaqraq”, nispa. Danielpas willakunmi: “Guitarra waqachiytam yacharurqani, waqachispaymi llakiykunatapas qunqarqaniraq”, nispa.

Imayna tarikusqankutam willakurqaku

Danielmi willakun: “Ñuqaqa manam anchachu sunquypi imayna tarikusqaymantaqa pimanpas willakuq kani, chaymantam ichaqa kallpanchakurqani amistadniykunawan llakiymanta rimanaypaq. Chayqa anchatam yanapawarqa”, nispa. Sabinapas willakunmi: “Aylluykunam allinta yanapaykuwarqa. Rimayta munaptiyqa uyariwananpaqmi mamayqa tiempochakuq, manam sapallaytachu saqiruwarqa. Taytaypas yanapawarqataqmi llakiyta allimanta qunqanaypaq”, nispa.

Diostam mañakurqaku

Carmenmi willakun: “Diostam sapa kuti mañakuq kani. Musyakurqanim imayna yanapawasqanta. Sasachakuyniypim Diosman astawan asuykurqani”, nispa.