Hamuq tiempopiqa allinñam kawsakusunchik

DIOSQA manam kayna sasachakuypa chawpinpi kawsananchiktachu munarqa. Aswanqa payqa munarqam kasukuqnin runakuna kay pachapi allin kawsakunankuta hinaspa pay hina sunquyuq kanankuta. Munarqam hawka, kusisqa kawsakunanchikta, ima munasqanchikmanta yachananchikta chaynataq kay allpa pachata huertayachinanchikta.

DIOSMI CHINKACHINQA TUKUY ÑAKARICHIWAQNINCHIKKUNATA

• Salmo 46:9 nin: ‘Guerrakunatam kay pachapi kuchun-kuchun chinkachinqa’, nispa.

• Apocalipsis 11:18 nin: “Chayaramuntaqmi tiempo kay pacha purmachiqkunata chinkachinaykipaqpas”, nispa.

• Isaias 33:24 nin: “Manañam mayqannikichikpas ninkichikñachu: ‘Unquchkanim’ nispaqa”.

• Isaias 65:22 nin: “Akllakusqaykunaqa llamkasqankupa ruruntam mikunqaku”, nispa.

Chaykunata ruwananpaqmi churin Jesusta Dios akllarun. Jesusmi hanaq pachamanta kay pachata kamachimuspan tukuy chaykunata ruwanqa (Daniel 2:44). Arí, Jehova Diosmi Jesusta kamachikuq kananpaq churarun, chaynapi wiñaypaq kamachikunanpaq (Lucas 1:32, 33).

Kay pachapi kaspanmi Jesusqa runapa mana atisqan ruwaykunata ruwarqa, chaywanmi yachanchik pay kamachikuptinqa allinña kawsakunanchikmanta.

JESUSMI QAWACHIRQAÑA DIOSTA KASUKUQ RUNAKUNAPAQ IMAKUNATA RUWANANMANTA

• Tukuy rikchaq unquyniyuq runakunatam sanoyachirqa, chaywanmi qawachirqa kamachikuptinqa unquykuna manaña kananmanta (Mateo 9:35).

• Sinchi wayra-paratam sayarachirqa, chaywanmi qawachirqa wayra-parapas makillanpi kasqanta (Marcos 4:36-39).

• Waranqantin runakunamanmi mikuchirqa, chaywanmi qawachirqa kamachikuptinqa manaña pipas yarqaymanta kananta (Marcos 6:41-44).

• Casarakuypim yakuta vinoyarachirqa, chaywanmi qawachirqa kamachikuptinqa kusirikunanchikmanta (Juan 2:7-11).

¿Imatataq ruwananchik Diospa tukuy niwasqanchikta rikunapaq? Bibliam niwanchik ‘kichki ñanninta’ rinapaq, chay ñanqa wiñay kawsayman apakuqmi, chaytaqa asllam tarinku (Mateo 7:14).

ALLIN KAWSAKUYMAN APAKUQ ÑAN

¿Imawantaq tupan wiñay kawsayman apakuq ñanqa? Chay ñanqa tupan Diospa tukuy kamachiwasqanchikta kasukuywanmi. Diosmi niwanchik: ‘Ñuqaqa Diosnikim kani, allinnikipaq yachachiqnikim kani, maynin purinayki qawachiqnikim kani’, nispa (Isaias 48:17). Arí, Diospa ñanninpi purispaqa kusisqam kawsakusunchik.

Jesuspas kaynatam nirqa: “Ñuqam kani ñan, chiqap kaq chaynataq kawsay quqpas”, nispa (Juan 14:6). Jesuspa yachachisqanta hatalliyqa hinaspa pay hina kayqa Diosmanmi asuykachiwanchik, yanapawanchiktaqmi kusisqa kawsakunapaqpas.

¿Imaynatam chay ñanta tarichwan? Jesusmi nirqa religionkunaqa ñankuna hina kasqanmanta. Ichaqa nirqam lliw religionkuna Diosman mana pusawasqanchikmanta. Nirqam: “Manam ‘¡señorlláy, señorlláy!’ nispa llapallan niwaqniykunachu hanaq pachapi Diospa munaychakuyninmanqa yaykunqa, aswanqa hanaq pachapi taytaypa munasqanta ruwaqkunallam”, nispa (Mateo 7:21). Jesusqa nirqataqmi sachata hina ‘rurunpi riqsinanchikmanta’ (Mateo 7:16). Bibliam yanapawanchik Diospa chaskisqan religion imayna kasqanmanta yachananchikpaq (Juan 17:17).

¿Imatam ruwananchik Diospa chaskisqan religionpi kanapaq? Unanchawaqninchiktam sumaqta riqsinanchik. Yachanam imam sutin kasqanta, imayna kasqanta, ima ruwasqanta chaynataq ima ruwananchikta munasqanmanta.a

Diosqa manam llamkanallanchiktachu, kusirikunallanchiktachu utaq aylluyuq kanallanchiktachu munan. Munantaqmi riqsinanchikta hinaspa paypa kuyasqan kananchikta. Kasukuspanchikqa kuyasqanchiktam qawachichkanchik. Jesusmi kaynata nirqa: “Wiñay kawsayqa kanqa sapallan chiqap Dios kasqaykita riqsiqkunapaqmi”, nispa (Juan 17:3).

KALLPANCHAKUSUN DIOSTA KASUKUNAPAQ

Diosta kusichinapaqqa mana allin ruwasqanchikkunatam saqinanchik. Qallariyllanpiqa sasamá, ichaqa Diosta kasukuspaqa kusisqam kawsakusunchik, chaypaqmi kallpanchakunanchik. Diosmanta yachayta munaspaykiqa testigokuna watukamunaykupaq qillqamuwayku nisqanman yaykuspa. Kusisqam bibliamanta yachachinaykupaq watukamusqaykiku.