Ayllupa horarion: Aylluntin predicanapaq
1 Jehová Diosqa kusikunmi mozo-sipaskuna sutinta hatunchaptinku (Sal. 148:12, 13). Jesuspa tiemponpipas ‘wawakunapiwan ñuñuqraq wawakunawanmi alabaspa’ hatuncharqaku Diosta (Mat. 21:15, 16). Chaynallataqmi kunanpas. ¿Qamkunapas tayta-mamakuna imaynatam yanapawaqchik wawaykichikta, Jehová Diosta tukuy sonqowan predicacionpi hatunchanankupaq? Kawsasqaykichikwan qawachinaykichik, kaytaqa yacharqanchikñam huñunakuymanta willaqpi. Achka tayta-mamakunapa musyasqankumanta huk runa kayta nirqa: “wawakunaqa manam nisqanchiktachu ruranku, aswanqa qawasqankutam” nispa.
2 Diosta manchakuq tayta-mamakunawan uywasqa panim yuyarin: “Sábado achikyaykuqta hatarikuspaykuqa manam haykapipas tapukunikuchuqaya predicacionman lloqsinaykupaq. Yacharqanikum lloqsinaykuta”, nispa. Chaynallataqmi tayta-mamakunapas sapa semanapaq horariota ruraspa, wawankuta yachachinmanku aylluntin predicaq lloqsinankupaq. Chayta ruraspaqa, manam kawsayllaykichikwanchu yachachinkichik, aswanqa qawankichikmi wawaykichikpa imayna kasqanta, rurasqanta hinaspa ima rurayta atisqankutapas.
3 Espiritualpi wiñanankupaq yachachiy. Wawakuna kusisqa predicanankuta munaspaqa, allinta predicanankupaqmi yachachina. Ñawpaqpi kaypi willaq paninchik ninpas: “Tayta-mamayku predicaq lloqsiptinku manam haykapipas yanqallaqa puriysirqanikuchuqaya. Ñoqaykupas predicaysirqanikum tratadokunata haywaspa otaq punkullatapas takaspa. Agradecekunikum predicaq lloqsinaykupaq semana tukuykuqta yachachiwasqankumanta, chaywanmi yacharqaniku ima ninaykutapas”, nispa. Qamkunapas yachachillawaqchiktaqmi wawaykichikta imayna predicanankupaq, semanapi iskay kimsa minutollapi ayllupi estudiachkaspa otaq huk ratokunapipas.
4 Aylluntin predicayqa yanapasunkichikmi wawaykichikta cheqapmanta yachachinaykichikpaq. Cristiano wawqe warmi churintin riqkus uchuy llaqtata tratadokunata aypunankupaq, chaypaqa purisqaku iskaychunka kilometrota risqankuwan kutisqankupi. Warmi churinmi kuyakuywan yuyarispa nin: “Chayna illasqaykupim taytayqa sonqoypi cheqapta churarqa”, nispa (Deu. 6:7). Chaynallatataq Jehová Dios bendecichun, sapa semana predicanapaq, aylluykipa horarionpi churasqaykimanta.