Churi-wawaykichikta yanapaychik predicaypi ñawparinankupaq
1 Cristiano tayta-mamakunaqa churi-wawankutam taksachanmantapacha yachachinanku predicayta. Achka yanapakuykunam kachkan chayta ruranapaq. Wakin wawakunaqa manaraq leeyta yachachkaspankupas yuyayninkullamanta rimayta atinku Bibliapi huk textomanta, chayqa uyariqkunatapaschá admirachin. Wiñasqankuman hina astawanraqmi predicanmanku. ¿Imaynatam qamkuna tayta-mamakuna chaypi yanapawaqchik? Yanapasunkichikmanmi qatimuq yanapakuykuna.
2 Runata rimaykuspaña, niwaqmi:
◼ “Churiy [niy sutinta], munachkan ancha allin Bibliamanta huk textota uyarinaykita.” Warmacham ninman: “Kay textowanmi yacharqani Diospa sutinta [warmacha leen otaq yuyayninmanta riman Salmo 83:18, nisqanta]. Kay revistakunam yachachin imatam Jehová Dios ñoqanchikpaq ruranqa. ¿Saqeykuykimanchu?”.
3 Kaynatapas niwaqmi:
◼ “Imaynallam kachkanki. Warmi churiy [niy sutinta] yachachichkani llaqtapi runamasinchikkunata yanapananpaq. Payqa munanmanmi Bibliapi huk willakuyta yanapanasuykipaq qawachiyta.” Warmacham ninman: “Hamuq tiempopaq Bibliapi suyakuy qosqanmantam runakunaman willaspay kusikuni [warmacha leen otaq yuyayninmanta willan Apocalipsis 21:4, nisqanta]. Kay revistakunam willan imatam Diospa Reinon ñoqanchikpaq ruranqa. Kusikunkichá leeykuspa”.
4 Sapa kutita rimay atinankupaq hina yachachiptikichikqa, allillamanta wawakunaqa mana manchakuspanku Diospa Reinonmanta willanqaku. Predicanaykichikpaq paykunawan practicaspaqa, yachachiychik mana simin ukullapi allin entiendekuqta hina rimanankupaq, chaynapim listolla kanqaku imaymanapipas predicanankupaq. Tiempowan allinta preparakuy hinaspa kallpanchasqaykichikpas wawakunataqa yanapanqa iñiyninkumanta rimanankupaq.
5 Tayta-mamanpa yanapayninwanmi achka wawakuna manaraq bautizasqa predicaq kanankupaq kamachikuykunata huntachkanku. ¡Maynataraq kusikunchik predicaypi wawakuna ñawparisqankumanta! (Sal. 148:12, 13.)