Bibliamanta estudiokunata qallarispa punkukunapi hinaspa telefonowanpas
1, 2. ¿Imaynatam allichanchikman Bibliamanta estudio qosqanchikta, achka ruranayoq runakunata yanapananchikpaq?
1 Kay punchawkunapi runakunaqa achka ruranayoq kanku. Chayna kaptinpas, achkam yachayta munanku espiritual ruraykunamanta. ¿Imaynata yanapachwanqa Diosta maskasqankuwan kusikunankupaq? (Mat. 5:3.) Achka predicaqkuna wasi punkullapi otaq telefonollawan Bibliamanta estudiokunata qallarirqaku. ¿Atinchikmanchu servicionchikta yapayta chaynata ruraspapas?
2 Bibliamanta estudiokunata qallariyta munaspaqa listollam kananchikqa qawachinanchikpaq imaynatam estudio rurakusqanta pipas yachayta munaptinqa. ¿Imaynata hinaspa maypitaq kayta rurachwanqa?
3. ¿Imanasqataq qawachinchikman qallariy watukuyllapi imayna Bibliamanta estudio kasqanta, hinaspa imaynatataq chayta rurakunman?
3 Wasi punkupi. Bibliamanta rimay munaqkunawan tupaptinchikqa, preparasqanchik akllasqa parrafota qawachisunchik, Imatam Dios munan folletopa punta kaq leccionpi qallariq parrafowan hina, chaymantaqa qallarisunchik estudiaytapacha. Parrafota leesunchik, tapuyta qawasunchik chaymanta qawachisunchik huk otaq iskay textokunata. Punkupi chaynata rurachwanqa pichqa otaq chunka minutollapi. Uyariqninchikta gustaruptinqa, paywan rimanakunchikmanmi kaqllamanta kutimuspa qatiqnin parrafokunata estudiananchikpaq. (Estudiota punta kaq watukuyllapi qallarinanpaqqa achka yanapakuykunata tarisunchik 6 paginapi, Nuestro Ministerio del Reino de enero de 2002.)
4. ¿Imaynata qallarichwan Bibliamanta estudiokunata wasi punkupi revisitata ruraspa?
4 Chaynallataqmi rurachwanqa estudio qallarinapaq revisitata ruraspanchik. Punta kaq watukusqanchikpi qawachinchikmanmi Imatam Dios munan folletota, chaymantataq 2 kaq leccionpi 1, 2 parrafokunawan yachachichwan imam Diospa sutin kasqanta. Qatiqninpi watukuspanchikqa estudiachwanmi 3, 4 parrafokunata Jehová Diospa sumaq kayninkunamanta yachachinanchikpaq Bibliapa nisqanman hina. Kimsa kutipiña watukuchkaspaqa 5, 6 parrafokunata hinaspa 5 paginapi rikchanachiyta qawachichwan yachachinapaq imaynatam Bibliamanta yachayqa yanapawanchik Jehová Diosta aswan allinta reqsinanchikpaq. Kay estudiokunataqa wasipa punkunpi sayachkaspalla rurachwanqa.
5, 6. a) ¿Imanasqataq wakin runakunaqa Biblia estudiayta munanmanku telefonowan? b) ¿Imata nichwan telefonowan estudiota qallarinanchikpaq?
5 Telefonowan. Wakin runakunapaschá munanqaku telefonontakama Biblia estudiayta, ñoqanchichwan qawakuspa estudiaymantaqa. Uyarisunchik qatiqnin willakuyta. Huk paninchik wasin-wasinta predicachkaspas rimarqa sipas warmiwan wawayoq hinaspa achka rurayniyoq, payqa llamkasqapas wawankunata uywananpaq. Wasinta kutiptin mana tarispam, telefononman qayarqa. Chay sipas wamitaq willakurqa Bibliata estudianapaq mana tiempon haypasqanta. Ichaqa paninchik nirqa: “10 otaq 15 minutollapi yachallawaqmi imallatapas telefonollawan rimaspa”, nispa. Sipas warmiñataq nirqa: “Telefonollawan kaptinqa allinmi kanman”, nispa. Chaynapim telefonontakama qallarirqaku estudiayta.
6 ¿Munanmankuchu wakin watukusqanchikkuna telefonowan estudiayta? Paninchik hina ñoqanchikpas rurachwanmi otaq nichwanpas: “Munaspaykiqa, telefonowan Bibliata estudiachwanmi. ¿Allinchu kanman qampaq? ”, nispa. Bibliamanta yachachisqanchikta, hukkunapaq hina allichaspaqa yanapanchikmanmi “Diospa yachayninta” tarinankupaq (Pro. 2:5; 1 Cor. 9:23).