Allin costumbreyoqyá kay hinaspa achka bendicionkunata chaskiy
1. ¿Imanasqam allin kanman espiritual ruraykunapaq arreglo rurasqanchikpi yuyaymanayninchik?
1 Sasaniraqchá karqa cristiano karuspayki espiritualpi allin arreglokunata rurakuyniki, imayna Bibliata estudianaykipaq, huñunakunaykipaq, predicanaykipaq hinaspa Jehová Diosta mañakunaykipaqpas. Jehová Diospa bendecionninwanmi iñiynikipiqa wiñarqanki. Kunan unay wataña bautizakusqaykimanta pasaruptin, ¿hinallaraqchu kallpanchakuchkanki espiritual ruraykunapi allin costumbreyoq kanaykipaq?
2. ¿Imaynatam yanapawanchik sapa punchaw Biblia leeyninchik?
2 Arreglo rurasqaykipi yuyaymanariy: ¿Sapa punchaw Biblia leeqchu kanki? Chaynata ruraspanchikqa achka bendicionkunatam chaskisun (Jos. 1:8; Sal. 1:2, 3). Ñawpa Israel llaqtapi reymi “sapa punchaw” leenan karqa kikinpa copiasqan Leyta. ¿Imapitaq chay rurasqan yanapanman karqa? Llampu sonqoyoq kananpaq hinaspa Jehová Diosta manchakuyta yachananpaq chaynapi Kamachikuyninkunamanta mana karunchakunanpaq (Deu. 17:18-20). Chaynallataqmi ñoqanchiktapas sapa punchaw Biblia leeyninchik yanapawanchik pierdesqa runakunapa chawpinpi mana culpayoq nitaq huchayoq kanapaq. Chaymantapas allintam preparawanchik Diosmanta yachachinapaq (Fili. 2:15; 2 Tim. 3:17).
3. ¿Ima bendicionkunatam chaskinchik huñunakuykunaman hinalla ipayaptinchik?
3 Costumbrenman hinam Jesusqa yaykurqa Bibliamanta yachanapaq huñunakuna wasiman (Luc. 4:16). Chay rurasqanmi kallpancharqa ñakarinan pruebakunata atipananpaq. Ñoqanchiktapas kallpanchawanchikmi huñunakuykunapi tukuy yachasqanchikkuna, imayna ‘iñiqmasinchikkunawan kallpanchanakuyninchikpas’ (Rom. 1:12). Wawqe-paninchikkunawan huñunakuyninchikmi yanapawanchik tukupay tiempokunapi sasachakuykunata atipananchikpaq (Heb. 10:24, 25). ¿Hinallachu lliw huñunakuykunaman ripayaq kanki?
4. ¿Imaynatam yanapawanchik sapa semana predicayninchik?
4 Bibliam niwanchik apostolkunaqa Diosmanta allin noticiakunatam willakuqku “sapa punchaw templopi hinaspa wasikunapi” (Hech. 5:42). Sapa punchaw predicayta mana atispanchikpas ¿kallpanchakunchikmanchu sapa semana Jehová Diosta imaymana servinapaq? Chaynata ruraspam Diospa Palabranmanta allin yachachiq kasunchik, hinaspam kallpanchakuq experienciakunatapas tarisun.
5. ¿Imanasqataq ancha allin Jehová Diosta sapakutilla mañakuyninchik?
5 Diosmanta willakuq Danielmi achka bendicionkunata chaskirqa Jehová Diosta “mana samaykuspa” wañukunankama servisqanmanta. Servispanpas Jehová Diostam tukuy tiempopi mañakunan karqa (Dan. 6:10, 16, 20). Chaynallataqmi, Jehová Diosta sonqomanta mañakuptinchikqa, chuya espiritunwanmi Payqa bendeciykuwasun (Luc. 11:9-13). Chaymantapas asuykamuwaspanchikmi mañakusqanchikta uyariykuwasun, chaynapim Paywan sumaqllaña amigo kasunchik (Sal. 25:14; Sant. 4:8). ¡Mayna sumaqmi chayqa! Chaynaqa, kallpanchakusunyá espiritual ruraykunapi allin costumbreyoq hinalla kananchikpaq chaynapim Jehová Diosmanta achka bendicionkunata chaskisun.