Qosakuna allin arreglokunata ruraychik familiaykichikwan Diosta servinaykichikpaq
1 Taytacha-mamachakuna yupaychasqanku hinaspa mana allin ruraq Babilonia llaqtapi achka watakuna kawsaspanpas, Danielqa ‘mana samaykuspam’ Diosta servirqa (Dan. 6:16, 20). ¿Imataq Danielta yanaparqa Dios serviyninpi hinalla takyananpaq? Bibliapa nisqanman hina Diosta servinanpaq allin arreglokunata rurasqanmi. Ejemplopaq, kimsa kutikamam Diosta mañakurqa altos law cuartonpi (Dan. 6:10). Chaymantapas sapa kutim Diospa Leyninta leerqa. Chaymi vidanta peligroman churaq pruebapi tarikuptin Jehová Diospi iñiyninqa mana hukmanyarqachu aswanqa chay peligromantam librasqa karqa (Dan. 6:4-22).
2 Kunan tiempopipas kallpanchakunanchikmi ‘listolla kananchikpaq’ (Efe. 6:18). ‘Kay pachapi mana allin kaqkunaqa Diablopa makinpim kachkan’ (1 Juan 5:19). Qonqaymantam iñiyninchikta pruebaman churaq sasachakuykunapi tarikuchwan. Llumpa-llumpay ñakariy punchawpim Dios serviqkunapa contranpi llumpay piñakuywan Satanas Diablo hatarinqa, kayqa mana lluptiy atinapaq hinam kanqa. Chay punchawpiqa Jehová Diospim astawan confiananchik kanqa (Eze. 38:14-16).
3 “Kallpanchakunanchikmi familiantin sapa punchaw Bibliata leenapaq hinaspa estudianapaq.” Kaynatam qallarirqa “Familiakuna sapa punchaw Bibliata leespa Diospa ñanninpi puriychik” niq drama 1998 watapi distrito nisqa asambleapi. Nirqataqmi: “Sapa punchaw Bibliata leenapaq arreglo rurasqankuta familiakuna cumpliptinkuqa chayna estudiasqankum familiata allinta yanapanqa. Diosmanta yachasqankum astawan yapakunqa, iñiyninkupas aswanmi qaqa hina kanqa, chaymantapas ñawpa tiempopi cristianokunapa sumaq kawsasqankum kallpanchanqa cheqap kaqta defiendenankupaq”, nispa. Kay yachachikuypim qosakunata kallpanchamuniku, huk otaq iskay yanapakuyta rurayman churanankupaq, chaynapi familiantin Diosta servinankupaq arreglo rurasqankupas aswan allin kananpaq.
4 Sapa punchaw Diospa Palabranta estudiaychik. “Mana imawanpas harkachikuspa Diospa Gobiernon munaychakuptin hinaspa hanaq pachapi hina kay Pachapi munaynin rurakuptinqa manañam pi runapas nitaq animalkunapas ‘mana allintaqa ruranqakuchu’ manataqmi “pipas dañanqachu” (Isa. 11:9; Mat. 6:9, 10).” Chaynatam nirqa 2001 watapi Examinando las Escrituras diariamente nisqa folletopa 11 de septiembre punchawninpi. ¡Ima sumaqmi karqa! ¿Qosakuna kallpanchakuchkanchikchu sapa punchaw texto diario nisqa folletota familiantin leenanchikpaq? Chayna kaptinqa allinmi kanqa. Madrugawpi mana atispaqa ima ratopas rurawaqmi. Huk taytam nirqa: “Ñoqaykupaqqa allinmi sapa cenasqayku hora chay folleto leesqaykuqa”, nispa.
5 Sapa punchaw familiantin texto diario nisqata leeptikiqa alabaykikum. Aswan allinraqmi kanman Bibliata leeptikichikqa. Hukkunam leenku chay punchawpaq rikurimuq textopa lliw capitulonta. Wakinkunañataqmi Bibliapa huk libronta akllaruspanku pisi-pisimanta leenku. Sapa punchaw Biblia leesqankum familiaykita yanapanqa Jehová Diosta kuyakuywan respetanankupaq hinaspa munaynintapas ruranankupaq (Deu. 17:18-20).
6 Sapa punchaw Bibliata hinaspa texto diario nisqata familiantin leesqaykichikmi aswan allin kanqa sichum imapi yanapasusqaykichikmanta rimaptikichikqa. Escuela del Ministerio nisqa librom 60 paginanpi kaynata consejan: “Sapa semana Biblia leesqaykimantam iskay kimsa versiculota akllawaq hinaspa explicaruspayki kayna tapukuykunata rurawaq: ‘¿Imapim yanapawanchik kay textokuna? ¿Imaynatam predicasqanchikpi servichikuchwan? ¿Imatam yachachiwanchik Jehová Diosmantawan, rurasqanmanta hinaspa imaynatam astawan kuyachwan?’”. Kayna rurasqaykichikmi familiaykichikta yanapanqa Diospa ‘munasqanta entiendenankupaq’ (Efe. 5:17).
7 Familiantin estudianapaq. Qosakunaqa Diosta servisqanku imamantapas aswan allin kasqantam qawachinmanku sapa kuti familianwan Bibliata estudiaspanku. Huk mozom nin: “Wakin kutipiqa llamkasqanmantam llumpay pisipasqa papay kutimurqa, chayna kaptinpas estudiarqanikum, kaymi yanapawarqaku familiantin estudiayqa ancha valorniyoq kasqanta qawanaykupaq”, nispa. Warmakunapas yanapakunmankum familiapi estudiasqanku allin kananpaqqa. Isqon warmayoq tayta-mamam tutamanta las cincota llapanku hatarinku Bibliata estudianankupaq, chaytaqa ruranku punchawpi mana atisqankuraykum.
8 Familiapi estudiasqanku allin kananpaqqa taytam ‘allinta yachachinan’ (1 Tim. 4:16). Escuela del Ministerio nisqa librom 31, 32 paginankunapi kaynata nin: “Familianchikwan estudiasqanchik allinpuni kananpaqqa familianchiktam allinta reqsinanchik. ¿Imaynataq tarikunku Dios servisqankupi? [...] Churikikunawan predicacionman lloqsiptiki, ¿penqapakunkuchu Jehová Diospa testigon kasqankuta estudiaq masinkunawan tupaspanku? ¿Gustankuchu familiantin Biblia leesqankutawan estudiasqankuta? ¿Kallpanchakuchkankuchu Jehová Diospa munasqanman hina kawsakunankupaq? Qosa kaspaykiqa yachankichá señoraykiwan warmaykikuna sumaq kayniyoqkuna kanankupaq imayna yanapayta”.
9 Congregacionpi huñunakuykunamanta. Sapa semanam congregacionpi huñunakuykunapaq preparakunayki, rinaykipaqpas arreglokunatam ruranayki (Heb. 10:24, 25). Wakin kutipiqa familiantinmi preparakuwaqchik huñunakuykunapaq. Rinaykichik horallaña preparakunaykichikmantaqa, ¿manachu ñawpaqmantaraq preparakuwaqchik? Tiempowan rurasqanchikqa yanapawasunmi sumaqta preparakunapaq hinaspa huñunakuykunapipas allinta entiedenanchikpaq (Pro. 21:5).
10 Diosta servinaykipaq arreglo rurasqayki allinpuni kananpaqqa sumaqtam preparakunayki hinaspam cumplinayki. Sichum, ¿tiempoykipi sasachakusqaykirayku huñunakuykunapaq lliwta mana preparakuyta atispaqa? Escuela del Ministerio, nisqa librom 31 paginanpi kaynata consejan: “Amayá cumplinaykiraykuqa apurawllamanñaqa preparakuychu, otaq tiempo mana haypasusqaykiraykuqa ama saqeychu estudiaytaqa. Aswanqa tanteay mayqankunatam estudiawaq hinaspa allintapuni chayta estudiay. Sapa semana chayta ruray hinaspa kallpanchakuy wakin huñunakuykunapaqwan preparakunaykipaq”.
11 Huñunakuykunaman tiempowan chayayqa familiatam yanapanqa Jehová Diosta alabanankupaq hinaspa yachachikuykunata entiendenankupaqpas. ¿Chaynatachu familiayki rurachkan? Chaypaqqa allintam tanteanaykichik hinaspapas lliwmi yanapanakunaykichik. Huñunakuyman rina tarden familiaykichik kaylawman-waklawman apurawllaña pawakachaptinqa, ¿manachu chay tarden ruranaykichikta huk punchaw rurawaqchik? ¿Atiwaqchikchu wakin ruraynikichikkunata ñawpaqmantaraq rurayta? Familiaykipi hukkaqnikichik achka rurayniyoq kaptinqa, ¿manachu mayqannikichikpas yanapawaqchik? Sasachakuykunapi mana kanaykichikpaq, ¿kallpanchakuwaqchikchu ñawpaqmantaraq listo kaspaykichik huñunakuykunaman tiempowan chayanaykichikpaq? Imatapas arregloman hina ruraptinchikqa hawkayaymi kanqa wasipipas chaynataq congregacionpipas (1 Cor. 14:33, 40).
12 Predicanamanta. Diosta servinanchikpaq arreglo rurasqanchikpiqa huk punchawtam rakinanchik sapa semana predicanapaq. Jayson sutiyoq mozom nin: “Familiaymi sapa sabado temprano predicacionman lloqsirqaku, chaymi yanapawarqa aswan allinta predicanaypaq hinaspa kusikuyta tarinaypaqpas”, nispa. Uchuycha kasqankumantapacha cristiano tayta-mamayoq iñiqmasinchikkunapas cuentatam qokunku sapa semana predicanankupaq rakisqanku punchaw Dios servisqankupi ñawparinankupaq yanapasqanta.
13 Allin arreglo rurasqankuqa yanapanqataqmi predicasqankupi familianku kusisqa kanankupaq chaynataq Bibliamanta allinta yachachinankupaqpas. ¿Imaynatataq chayta rurachwan? 1999 watapi 1 de julio La Atalaya nisqa revistapa 21 paginanpim kayna consejota qorqa: “Wakin kutikunapi, ¿servichikunkichu familiantin estudiasqaykichik tiempota familiayki imayna predicanankupaq yanapanaykipaq? Chayna rurasqaykichikqa anchatapunim yanapasunkichik predicasqaykichik mana yanqa kananpaq (2 Timoteo 2:15). Wakin kutipiqa familiantin estudiasqanku horapim imayna predicanankupaq preparakunmanku, chaymantapas sapa kuti estudiasqanku tukuytam otaq huk punchawpas pisillapim rimanmanku imayna predicanankumanta”. ¿Kay consejoman hinachu familiayki rurachkan?
14 Hinallayá ñawparisun. ¿Kay estudiopi yachasqanchikkunata mayqellantapas familiayki rurachkarqañachu? Chaynaqa familiaykita alabaspayki kallpanchakuy aswan allinta ruranaykichikpaq. Sichum kay yachamusqaykipi musyakurunki achka ruraykunapiraq kallpanchakunaykita hinaspaqa akllay hukta otaq iskayta hinaspa kallpanchakuy chayta ruranaykipaq. Chay akllasqaykita ruraruspaykiñataq wakinkunata ruranaykipaq kallpanchakuy. Mana iskayrayaspa chayta ruray (Fili. 4:4, 5). Diosta familiantin allinta servinaykipaq arreglo rurayqa manam facilchu, ichaqa kallpanchakusqaykim ancha allinpuni kanqa, Jehová Diosmi kayta prometewanchik: “Munasqayman hina kawsaqtaqa salvaykusaqmi”, nispa (Sal. 50:23).