Wasin-wasin predicayninchik
1. ¿Ima tapukuymi kanman wasin-wasin predicaymanta, imanasqa?
1 1 de julio de 1893 Zion’s Watch Tower (kunan La Atalaya) nisqan revistam nirqa: “Imayna predicanamanta experienciayoqmi ninqa, wasin-wasin Aurora del Milenio nisqan revistawan Diosmanta predicayqa aswan allinmi kunan tiempoqa.” Kaynata nispanmi qawachirqa imayna wasin-wasin predicayqa ancha valorniyoq kasqanta. Kunan tiempopas entero pachapi runakunaqa Jehová Diospa testigonkunatam reqsinku wasin-wasin predicasqankuwan. Ichaqa, achka nacionkunapi runakunata wasinkupi sasa tarina kasqanrayku, ¿hinallaraqchu allin kanman chayna predicayqa?
2. ¿Maypim Biblia nin wasin-wasin predicanapaq?
2 Bibliapa nisqanman hinam hinaspa allinpunim: Wasin-wasin predicayqa Bibliapa nisqanman hinam. Jesusmi 70 qatiqninkunata kamachirqa iska-iskaymanta runakunapa wasinkuman rinankupaq (Luc. 10:5-7). Bibliam nin Jesuspa wañukusqanpa qepallantam ‘mana samaykuspanku sapa punchaw templopi hinaspa wasikunapi yachachirqaku’ (Hech. 5:42). Apóstol Pablopas tukuy sonqonwanmi wasin-wasin predicarqa (Hech. 20:20).
3. ¿Imanasqataq wasin-wasin predicayqa aswan allin kanman?
3 Wasin-wasin predicayqa hina allinpunim Diosmanta allin noticiakunata kunan tiempo willakunapaq. Yanapawanchikmi allintapuni allin runakunata ‘maskanapaq’ (Mat. 10:11). Yaqa lliw runakunam wasinkupi aswan hawka tarikunku. Runamasinchikwan rimaspanchikmi —rimasqanta uyarispa, imayna qawawasqanchiktawan muyuriqninpi kaqkunata qawaspam—, musyakunchik ima munasqanmanta hinaspa llakichisqanmantapas. Chaymantapas, allinta rimanakunapaqmi yanapawanchik.
4. ¿Imatam rurachwan wasin-wasin predicayninchik aswan allin kananpaq?
4 Predicanayki arregloykita cambiay: Apóstol Pablom predicanan arreglonta cambiarqa ‘Cristomanta allin noticiata willakunanrayku’ (1 Cor. 9:23). Ñoqanchikpas predicanapaq arreglonchiktam ichapas cambiachwan tarden lawpaq, semana tukuypaq otaq fiestakuna punchawpaq, runamasinchikkunata wasinkupi tarinanchikrayku. Mana wasinkupi tarisqanchikkunapa maypi yachasqankuta qellqasun hinaspa semanapi huk punchaw kutinanchikpaq kallpanchakusun.
5. ¿Imatam rurachwan onqoq wawqe-paninchikkunawan wasin-wasin predicanapaq?
5 Onqoqkunapas wasin-wasin predicaytaqa atinmankum. ¿Imanasqataq puriypi sasachakuq wawqe-paninchikkunawan arreglokunata mana ruranchikchu mana sasa chayana wasikunaman rispa predicanapaq, hinaspa atisqankuman hina puriysispapas? Huk paninchikmi samaywan onqosqanrayku pisillata rimarqa sapa hora partellanta, ichaqa ¡mayna kusisqam tarikurqa wawqe-paninkunawan kuska predicaptin!
6. ¿Imanasqataq wasin-wasin hinalla predicananchik?
6 Hinallam tarichkanchik llampu sonqo runakunata wasin-wasin predicaspa. Huk wasiyoqmi huk wawqenchikta nirqa: “Yaykuykamuy, yachaniñam pi kasqaykita. Diostam mañakuchkarqani pipas yanapaykuwananpaq, hinaptinmi punkuyta takaykamurqanki. Paymi uyariykuwaspan qamta kachamusurqanki”. Qawasqanchikman hinam Jehová Diosqa wasin-wasin predicayninchiktaqa bendecichkan (Mat. 11:19). Chaynaqa, kallpanchakuyá wasin-wasin hinalla predicanaykipaq.