Aslla Huñunakuspa Bibliamanta Estudio nisqa huñunakuypa yanapakuyninkuna
1. ¿Imakunapim yanapawanchik semanapi pichqa huñunakuykuna?
1 Semanapi pichqa huñunakuyninchikqa manam kaqllachu manataqmi chaynallatachu yanapawanchikpas. Chayna kaspanpas llapallan huñunakuyninchikqa allinpunim, chaypim ‘kuyanakunapaq hinaspa allin ruranapaq yanapanakunchik’ (Heb. 10:24, 25). ¿Imakunapim yanapawanchik Aslla Huñunakuspa Bibliamanta Estudio nisqa huñunakuy?
2. ¿Imakunapitaq yanapawanchikman aslla huñunakuyqa?
2 Dios serviyninchikpi wiñanapaq. Wakin huñunakuykunamantaqa Aslla Huñunakuspa Bibliamanta Estudio nisqa huñunakuyqa manam achka runakunawanchu apakun, chayraykum iñiyninchikpi yanapawananchikpaq allin amistadkunata rurayta atichwan (Pro. 18:24). ¿Kallpanchakunchikchu llapanta reqsinanchikpaq, ichapas ñoqanchikwan kuska predicanankupaq nispanchik? Kay huñunakuypi yachachiq ancianotapas yanapanmi, sapakamapa imayna kasqanta yachaspa kallpanchananpaq (Pro. 27:23).
3. Aslla Huñunakuspa Bibliamanta Estudio, ¿imanasqam rimarinapaq hinaspa Biblia estudiaqkuna rinankupaqpas yanapan?
3 ¿Invitarqanchikchu ñoqanchikwan Biblia estudiaqkunata kay huñunakuyman rinanchikpaq? Salonpi achka huñunakusqanchikrayku penqakuspa mana riy munaqkuna ichapas mana penqakunqakuchu aslla huñunakuptinchik, aswanraq iñiqmasinchikpa wasinpi rurakuptinqa. Ayllu hina kayna huñunakuyninchikmi mozo-sipaskunata hinaspa chayllaraq riqkunatapas yanapanqa rimarinankupaq. Chaymantapas, aslla huñunakusqanchikraykum astawan rimarispanchik Jehová Dios alabayta atisunchik (Sal. 111:1).
4. ¿Imakunapiwantaq yanapawanchik aslla huñunakuyqa?
4 Kay huñunakuykunaqa congregacionpa predicanan sitiokunapim apakun, wawqe-paninchikkunapa yachasqanku hichpallanpi. Ichapas mana niwasunchu wasinchikpa hichpallanpi kaq huñunakuyman rinanchikpaq, chayna kaptinpas Salonmantaqa ichapas wasinchikpa hichpallanpiraq kachkan. Chaymantapas kay huñunakunanchik wasitaqa servichikuchwanmi manaraq predicaq lloqsichkaspa huñunakunapaq.
5. ¿Imaynatam aslla huñunakuypi yachachiq yanapawanchikman Diosmanta allinta yachachinapaq?
5 Diosmanta allinta yachachinapaq. Kay huñunakuypi yachachiqmi munachkan atisqanchikman hina llapallanchik sapakuti kusikuywan predicananchikta. Chaymi, kallpanchakun chay huñunakuyman riqkunawan llamkananpaq hinaspa Diosmanta imaymana yachachiypi yanapananpaqpas. Ejemplopaq, yachay munaqkunata yapamanta watukuypi sasachakuspanchikqa paywan rimasunchik. Ichapas chaypi huñunakuq allin yachachiq wawqe-paninchikwan llamkanapaq niwasunchik. Chaymantapas estudiopi imayna yachachisqanta allinta qawaspanchikqa, Bibliamanta estudiota qospam aswan allin yachachiq kasunchik (1 Cor. 4:17).
6. ¿Imanasqataq aslla huñunakuspa Biblia estudiasqanchikta allintapuni yanapachikunanchik?
6 Aslla Huñunakuspa Bibliamanta Estudio nisqa huñunakuyqa sumaq bendicionmi ñoqanchikpaq. Jehová Dios kuyakuyninpi kay huñunakuyta qowasqanchikmi yanapawanchik kay sasa tiempokunapi iñiyninchikpi takyananchikpaq (Sal. 26:12).