Grupokunaqa Diosmanta willakunapaqmi yanapawanchik
1. ¿Ima yanapakuykunatam tarichwan Diosmanta willakunapaq sapa gruponchikpi?
1 ¿Llakikunkichu Aslla Huñunakuspa Bibliamanta Estudiopa imayna kasqanmanta? Chaypi aslla huñunakusqanchikraykum hawkalla hinaspa amistadkunata ruranapaq ancha allin karqa (Prov. 18:24). Chay huñunakuymanta encargakuq ancianoqa sapakama imayna tarikusqanchikmantam yachaq hinaspapas yanapawaqmi kanchik (Prov. 27:23; 1 Ped. 5:2, 3). Kunanpas chay yanapakuykunataqa hinallam tarichwan Diosmanta willakunapaq sapa gruponchikpi.
2. ¿Imatam qamqa rurawaq grupoykipi allin amistadkunata ruranaykipaq?
2 Kikikimanta qallariy. Diosmanta willakunapaq grupopiqa aslla iñiqmasinchikkunam kanku, chaynallataqmi karqa Aslla Huñunakuspa Bibliamanta Estudiopipas. “Huk sonqolla” iñiqmasinchikkunawan Diosta servispanchikmi aswan amistadkunata ruranchik (Filip. 1:27). ¿Grupoykimanta hayka iñiqmasikikunawantaq Diosmanta willakunaykipaq lloqsirqanki? ¿Atiwaqchu llapankuwan lloqsiyta? (2 Cor. 6:13.) Paykunataqa niwaqtaqmi wasikipi mikunankupaq otaq Familiawan Diosta Yupaychanapaq Tutaman hamunankupaqpas. Wakin congregacionkunapi grupokunaqa discurso qoq watukuqtam paykunawan mikunanpaq invitananku. Huk grupota tupaptinmi lliw huñunakunku kusirikunankupaq, chaypi discurso qoq paykunawan kayta mana atiptinpas.
3. ¿Imaynatam Diosmanta willakunapaq grupokunapi yanapakuyta chaskichwan?
3 Iskay kutillata semanapi huñunakuptinchikpas manam nichwanchu ancianokuna ñoqanchikpaq mana tiempochakunankutaqa. Grupokunapi encargakuq ancianokunapa rurayninkuqa sapakama iñiqmasinkunata kallpanchay, yanapay hinaspa Diosmanta willakunapaq yachachiymi. Sichu grupoykipi kaq ancianowan predicaq lloqsiyta mana atirqankichu hinaspaqa, ¿niwaqchu paywan lloqsinaykipaq? Chaymantapas, predicaymanta encargakuq ancianom sapa killapi sabado otaq domingo punchaw watukun sapaq grupokunata. Congregacionkunapi aslla grupokuna kaptinqa ichapas watapi iskay kutillata sapa grupokunata watukunman. ¿Kallpanchakunkichu predicacionman lloqsinaykipaq predicaymanta encargakuq anciano grupoykita watukuptin?
4. a) ¿Imaynatam rurakunan predicanapaq huñunakuykunaqa? b) ¿Imanasqam wasinchik munachiyta piensananchik?
4 Semana tukuyta grupokuna sapakama huñunakusqankuqa achkanpim yanapakun. Puntataqa, achka lawkunapi huñunakunankupaq hinaspa imay hora predicanankuta yachaymi yanapakun tiempowan chayanapaq. Yanapakuntaqmi iska-iskaymanta lloqsinapaq chaylla tupachiypas, chaynapi tiempota mana usuchinapaq. Grupomanta encargakuq ancianopas atinmanmi paypa makinpi kaqkunamanta qawan-qawanlla kayta. Wakinpiqa allinmi kanman iskay otaq kimsa grupokunata hukllawaypas. Sichu llapallan congregacionpi kaqkuna killapa punta kaq sabadonpi otaq Llaqta Cuidaq qellqa estudio tukuyta predicanapaq huñunakuptinkuqa, allinmi kanman wakin predicaqkuna gruponkupa kasqallanpi kayninku, hinaspapas sapa grupopi encargakuqkunam gruponpi kaqkunata sumaqta tupachinanku lloqsinapaq manaraq Diosta mañakuchkaptinku (Qawariy “¿Munachiwaqchu wasikita?” niq recuadrota.)
5. Aslla Huñunakuspa Bibliamanta Estudio manaña kaptinpas, ¿imamantam seguro kachwan?
5 Aslla Huñunakuspa Bibliamanta Estudio manaña kaptinpas, hinallamá Jehová Diosqa yanapawanchik munayninta rurananchikpaq (Heb. 13:20, 21). Payqa tukuytam ruranqa imanchikpas mana pisipuwananchikpaq (Sal. 23:1). Diosmanta willakunapaq grupokunaqa achka bendicionkunatam apamun. Chaynaqa, kikinchikmantayá kallpanchakusun predicanapaq, ‘achkanpi tarpuqqa achkatam cosechanqa’ nisqanta mana qonqaspa (2 Cor. 9:6).
[6 kaq paginapi recuadro]
¿Munachiwaqchu wasikita?
Wakin congregacionkunaqa sabadopi otaq domingom grupokunata hukllawanku huñunakunankupaq wasikuna mana ancha kasqanrayku. Predicaq lloqsinapaq huñunakuykunaqa congregacionpi huñunakuykuna hinam, chaymi wasinchikpi chay huñunakuy apakuptinqa ancha chaninniyoqta hina qawananchik. ¿Munachiwaqchu wasikita chay huñunakuy apakunanpaq? Imayrikuqllaña wasiki kaptinpas ama niychu penqawanqakuch nispaqa. Ancianokunaqa qawanku manam wasi imayna kasqantachu, aswanqa maypi tarikusqantawan huk asuntokunatam. Wasikipi chay huñunakuy apakunanta munaspaykiqa grupoykipi encargakuq ancianoman willay.