Jesuspa ejemplontam qatikunanchik
1. ¿Ima ejemplotam Jesus saqewarqanchik?
1 Runamasinchikkunata Jesuspa qatiqninkunaña kanankupaq yachachispanchikqa aswan allintapuni ejemplonchik yanapasqantam yachananchik. Jesuspa qayllanpi kaqkunam anchata yacharqaku paypa rimasqanmantawan rurasqanmantapas. Runakunaqa repararqakum Jesuspa kusikuyninpi, runamasinta kuyasqanpi, Taytanpa sutin yupaychasqa kananpaq munasqanpi hinaspa Diospa munayninta rurananpaq kallpanchakusqanpipas (1 Ped. 2:21).
2. ¿Imaynatam ejemplonchik predicaqmasinchikkunata yanapanman?
2 Iñiqmasinchikkunawan predicaspa: Imaynam Jesuspa qatiqninkuna paypa ejemplontakama yacharqaku chaynam ejemplonchikpas predicaqmasinchikkunata anchata yanapanman. Predicayninchikpi kusikuyninchikta qawaspankum chayllaraq predicaq lloqsiqkuna otaq mana ancha experienciayoq wawqe-paninchikkuna kikinkupa imayna predicasqankupi yuyaymanarinqaku. Kusikuyninchiktawan runamasinchikta cheqaptapuni kuyapayasqanchikta qawaspankum kallpanchasqa tarikunqaku paykunapas predicayninkupi chayna kanankupaq. Biblia servichikuypi kallpanchakusqanchikta, yachay munaqkunapata kutipayasqanchikta hinaspa Bibliamanta estudio qosqanchikta qawaspankum kallpanchasqa kanqaku hina kaqllata ruranankupaq.
3. ¿Imaynatam ejemplonchik Biblia estudiaqkunata kallpanchanman, hinaspa imayna kanankupaqtaq yanapanman?
3 Bibliamanta estudiokunata qospa: Biblia estudiaqkunaqa rurasqanchikpim anchata reparanku. Ejemplopaq, ichapas nichwan ancha allinpunim estudianapaq preparakuyqa, Bibliapa textonkunata maskayqa, yachanapaq kaq yachaykunata qellqankupi rayayqa nispa, ichaqa paykunam reparanqaku sichu chaykunata ñoqanchik ruranchikchu icha manachu (Rom. 2:21). Chaymantapas, sichu kikinchikpuni imay hora otaq ima punchaw estudiananchikpaq tantearusqanchikta cumpliptinchikqa hinaspa horallanpi watukuptinchikqa, paykunapas kallpanchasqam kanqaku mana imawanpas estudiayninkuta harkachikunankupaq. Musyarinqakutaqmi qaqa hina iñiyniyoq kasqanchikta hinaspa Diospa sumaq noticianmanta willakunapaq tukuy ima rurasqanchiktapas. Chaynaqa sichu pipas Jesuspa ejemplonta qatikuq cristianowan Bibliata estudiaptinqa runamasinkunata Diosmanta yachachiypi allinpuni yanapakuq cristianom kanqa.
4. Huñunakuykunaman rispanchik, ¿imakunatam ejemplonchikwan qawachichwan?
4 Huñunakuyninchikkunapi: Llapallanchikmi ejemplonchikwan huñunakuyninchikkunapi yachachinchik. Chayllaraq huñunakuyman hamuq yachay munaqkunam congregacionpi allin runa kasqanchikta, wawqe-paninchikkunawan kuyanakusqanchikta, huk sonqolla kasqanchikta chaynataq Diospa agradonpaq hina pachakuyninchiktawan allichapakuyninchikta qawaspankum kallpanchasqa tarikunku hinalla hamunankupaq (Sal. 133:1). Reparankutaqmi huñunakuykunaman mana faltakuspa hamusqanchikpi hinaspa huñunakuykunapi sonqomanta rimasqanchikpipas. Huñunakuyman chayllaraq hamuq runam huk warmachapa Bibliapa textonkunata Biblianpi facillla tarisqanpi reparasqa chaynataq atencionwan leesqanpipas. Chay warmachapa ejemplonmi kallpancharqa Biblia estudiayta qallarinanpaq.
5. ¿Imanasqataq kallpanchakunanchik allin ejemplo hinalla kananchikpaq?
5 Diospa Palabranmi kallpanchawanchik allin iñiqmasinchikkunapa ejemplonkuta qatikunanchikpaq (Fili. 3:17; Heb. 13:7). Hinaptinqa, allinpunim Jesuspa ejemplonta atencionwan qatikuypi reparayqa, chayna rurayninchikqa hukkunatapas yanapanmanmi. Chaynaqa allintapunim reparananchik 1 Timoteo 4:16: ‘Cuidakuspayá allinta yachachisun’ nisqanpi.