Allinpunim predicanapaq tukuy sonqowan kallpanchakuyqa
1 Jehová Diospa testigonkunaqa kallpanchakunchikmi allpantinpi predicanapaq hinaspa Jesuspa qatiqninkuna ruraypi, chaymi 1992 watamantapacha mil millones masnin horata watan-watan predicarqanchik. ¡Maynataraqmá kusichiwanchik chay admirakuypaq ruraypi imallapipas yanapasqanchikmanta yachayqa! (Mat. 28:19, 20.)
2 Jehová Diosllamá tukuy imamantapas allin ruraqqa paytam agradecekunchik kay ‘sasallaña tiempokunapi’ predicananchikpaq kallpanchawasqanchikmanta (2 Tim. 3:1). Hinaptinqa, ¿imatam rurachwan tukuy sonqonchikwan hinalla predicananchikpaq?
3 Imam kallpanchawanchik: Diosta chaynataq runamasinchikta kuyasqanchik hinaspa Diosman qokusqanchikman hina rurayta munasqanchikmi kallpanchawanchik predicananchikpaq (Mat. 22:37-39; 1 Juan 5:3). Kuyakusqachikraykum predicaypi astawanraq kallpanchakunchik (Luc. 9:23).
4 Imaynatam rurachwan: Diablom tukuy imawan sasachawanchik predicayninchikta saqerunapaq. Predicasqanchik lawpi mana uyariy munaqkunata, kay pachapi kusikuykunata, sapa punchaw kawsanapaq preocupakuykunata hinaspa onqoykunatapas servichikun hukmanyachiwananchikpaq.
5 Chaymi astawan kallpanchakunanchik hinalla tukuy sonqonchikwan predicananchikpaq. Allinpunim ‘puntapi hina kuyakuyninchikta’ kallpanchaptinchikqa chaypaqqa Bibliatam leenanchik hinaspa leesqanchikpi yuyaymanananchik chaymantapas allintam servichikunanchik ‘allin yuyayniyoq confianza sirvientepa’ Diosta reqsinapaq qowasqanchikta (Apo. 2:4; Mat. 24:45; Sal. 119:97).
6 Bibliapi willakuykunaqa clarotam qawachin Jehová Diosqa mana allin runakunata puchukachinanpaq punchawqa utqaykamusqanta (2 Ped. 2:3; 3:10). Kaymanta yachaspaqa kallpanchakusunchikyá tukuy sonqonchikwan allpantinpi predicananchikpaq hinaspa Jesuspa qatiqninkuna kanankupaq runakunata yachachimuypi.