Jehová Diospa testigonkunapa 2008 Distrito asambleanku
1. a) ¿Imanasqataq Hebreo congregacionman apostol Pablopa nisqanqa allinpuni? (Hebreos 10:24, 25 nisqanta leey.) b) Apostol Pablopa nisqanman hina, ¿ima rurananchikpaqmi hichpaykamuchkanña?
1 Hebreo congregacionpi cristianokunatam apostol Pablo yuyarichirqa kallpanchanakunapaq huñunakuyqa ancha allin kasqanta, aswanqa ‘Señorpa chaylla kutimunanta yachaspaqa’ (Heb.10:24, 25). Kay tiempopipas qawachkanchikmi apostol Pablopa nisqan punchawqa cumplikunanpaq hichpaykamusqanta chaymi munanchikpuni wawqe-paninchikkunawan huñunakuyta Diospa yachachikuyninta chaskinapaq kay ‘tukupay tiempokunapi’ yanapawananchikpaq sapa kuti sasallaña kasqanrayku (2 Tim. 3:1). 2008 watapaq Distrito nisqa asambleanchikpim chayta rurasunchik.
2. a) ¿Imanasqataq kimsantin punchaw asambleaman riyqa allinpuni? b) ¿Imaynatam arregloykikunata rurawaq asambleaman rinaykipaq?
2 Kimsantin punchawman riy: Kallpanchamuykikum kimsantin punchaw asambleaman rinaykipaq. “Amayá huñunakuyman riyta dejasunchu” nispa nisqanqa qawachinmi allinninchikpaq kaq Diosmanta yachachikuynintaqa llapachanta uyarinanchikpaq (Heb. 10:25). Qallariyña arregloykikunata rurayta. Patronnikimanpas willaypuniña arreglokunata ruraspan permisota qosunaykipaq. Warmaykikuna asamblea punchawkunapaq escuelapi estudiananraq kaptinqa, profesorninkunaman willay warmakunawan asambleaman rinaykichikta, willaytaq Diosta yupaychanaykichikpaq kasqanta. Jehová Diosqa bendecisunkipunim Munaychakuyninta puntapi churanaykipaq kallpanchakuptikiqa (Mat. 6:33).
3. ¿Imakunata ruraspam kuyapayakuq kasqanchikta qawachichwan?
3 Hukkunatapas yanapasunchik rinankupaq: Apostol Pablom wawqe-paninkunata kallpancharqa ‘ama qonqaruspa yanapanakunankupaq’ (Heb. 10:24). ¿Yaqachu pipas Aslla Huñunakuspa Bibliamanta Estudioman riqkunamanta asambleaman rinanpaq yanapanapaq kanman? ¿Yanapawaqchu Biblia estudiaqkunata huk punchawllapas asambleaman rinankupaq? Familiaykipi mana iñiq kaqkunaman asambleapaq arregloykikunamanta willaspaykiqa invitay rinankupaq. Ichapas kuyakuywan invitasqaykiqa kusichisunkiman.
4. ¿Imapitaq yachanapaq tarichwan maypi hinaspa haykapitaq distrito nisqa asamblea rurakunanta?
4 Imaynatam astawan yachachwan: Sapa watam Jehová Diospa testigonkunapa sucursalninman pachak-pachaknintakama telefonowan qayanku maypi hinaspa haykapi asamblea kananta tapunankupaq. Qayaqkunamanta yaqa llapallankum kanku asambleakuna kananmanta yachaq wawqe-paninchikkuna, chaymi manaraq qayaspa kallpanchamuykiku qawanaykichikpaq Llaqta Cuidaq del 1 de marzo de 2008 nisqa revistata (castellanopi).
5. a) ¿Imanasqam tupawaqninchik asambleaman rinanchik? b) ¿Imakunatam ruranayki sapaq asambleaman rinayki kaptinqa?
5 Asambleapi achka tiyanakuna, Bibliamanta qellqakuna, samapakunapaq wasikuna hinaspa tukuy imapas haypananpaqmi ruegakamuniku tupasuqnikichik asambleaman rinaykichikpaq. Mana atisqaykirayku sapaq asambleaman rinayki kaptinqa, congregacionpi secretario wawqenchikta mañakuy samapakuymanta formulariota huntanaykipaq. Asamblea rurakusqan llaqtapi huk asambleakunapas kaptinqa willakuy haykapi rinaykita. Chay fomulariota huntaruspayki, congregacionpi secretario wawqenchikman qoykuy, hinaspam payña apachinqa asamblea rurakusqan llaqtaman.
6-8. ¿Imakunatam yuyarinanchik samapakuymanta? ¿Imarayku?
6 Samapakunamanta: Samachiypi llamkaq wawqenchikkunam kallpanchakunku allin ejemployoq wawqe-paninchikkuna hinaspa allin portakuq wawa-churinkupas huk wawqe-paninchikkunapa wasinkupi samapakunankupaq, congregacionpi ancianokuna allinta qawaptinkuqa. Samapakunapaq wasikunaqa sasachakuqkunallapaqmi. Kay arreglom allinta apakun samachiq hinaspa samapakuq wawqe-paninchikkuna kuyakuywan yanapakuptinku.
7 Asamblea rurakusqan llaqtapi yachaspaqa, atinchikmanmi huklawmanta hamuq wawqe-paninchikkunata wasinchikpi samachiyta. Achka asambleakunapaqqa pachakninpim samapakunapaq cuartokunata necesitakun. Samaykachikuq kaspaqa, segurochá Jehová Diosmanta achka bendicionkunata chaskisun Romanos 12:13 nisqanman hina: “Wasikichikpi samakuy munaqtapas allintayá chaskiykuychik”. Congregacionpi secretario wawqenchikwan rimarisun hinaspa asambleaman hamuq wawqe-paninchikkuna wasinchikpi samapakunankupaq niykusun.
8 Samapakunapaq wasiqa asamblea punchawkunallapaqmi; manam allinchu kanman manaraq asamblea qallariyta otaq asamblea tukuyta paseakunarayku otaq imapas rurananchikrayku samapakuyqa. Chaymantapas, cristiano hina kuyakuyninchikmi kallpanchawananchik imaymana rurasqanchikwan samachiwaqninchik wawqe-paninchikkunata mana hukmanyachinapaq. Wawa-churikunapas samachiwaqninchikpa wasintam respetananku mana yaykuna cuartokunaman mana yaykuspanku. Kay yachachikuykunata llapallanchik kasukuspanchikqa, iñiqmasinchikkunawanmi huk sonqolla kawsakuyninchikta kallpanchasunchik (Juan 13:35).
9, 10. a) ¿Ima mana allin ruraykunataq wakin asambleakunapiqa qawakun? b) ¿Ima allin ruraykunatataq qawachichwan tiyanapaq sitiota sapaqchaspaqa?
9 Allin ruraykuna: Huñunakunanchikpaq Jehová Diospa kamachisqanta kasuykuyqa kikinchikpa allinninchikpaqmi. Kayna huñunakuykunapim Diospa Sutinta hatunchanchik (Isa. 48:17). Distrito sutiyoq asambleanchikpim achka runakuna huñunakunchik chaypim ‘yachanqaku allin rurasqanchikta’. Ichaqa astawanraqmi kallpanchakunanchik. Wakinpiqa asamblea rurananchik sitiopim punkupi achkallaña suyachkanku hinaptin punkuta kichaykuptinkuqa kallpa-kallpayllaña yaykuspanku ñawpaqpi kaq achka sitiokunata tiyanankupaq sapaqchakunku. Wakinpiqa manam kasukunkuchu hamuqkunata chaskiqkunapa nisqankuta. Chaymi huk wawqenchik nirqa “asambleaman allillamanta yaykuqkunaqa qepallapiñam tiyanankupaq tarinku” nispa.
10 Tapukuchwanmi, ¿imatam piensanmanku chayna rurasqanchikta qawaqkunaqa? ¿Kaynata ruraspaychu runamasiykunata kuyapayachkani? ¿Kaynatachu Cristopa cheqap qatiqninkunaqa kuyanakunku? (Fili. 2:4; Rom. 12:10.) Jehová Diosta servispa ñawpariqkunaqa kallpanchakusunchá allin kaqta ruraypi hukkunapas chayta qatikunankupaq. Chayna kaptinqa ordenllanpich asambleapiqa tiyasunchik hinaptin yuyaqkunapas, onqoqkunapas chaynataq asambleaman chayllaraq riq runakunapas allin sitiokunapich tiyanqaku (Mat. 7:12).
11. ¿Imaynatam Mateo 4:4 nisqanqa qawachin asambleapi llapallan yachachikuykunata atencionwan uyariyqa allinpuni kasqanta?
11 Jesusmi nirqa runaqa kawsan ‘Diospa llapa rimasqankunata’ uyarispanmi nispa (Mat. 4:4). Watan-wata asambleakunapim Jehová Diosqa ‘allin yuyayniyoq confianza sirvientenwan imam horapi mikuchiwanchik’ (Mat. 24:45). Convidopi hinam Diosmanta astawan yachananchikpaq allichaypi chaynataq atiendeypi arreglokuna rurakusqanqa achkam. Chaynaqa Jehová Dios kuyakuywan cuidawasqanchikmanta agradecekusunchik asambleaman rispanchik hinaspa chaypi yachachikuykunata atencionwan uyarispa.
[3 kaq paginapi recuadro]
Imay hora asamblea qallarinanmanta
Iskaynin punchawpaq
9.20 tutamanta - 4.55 tardekama
Kimsa kaq punchaw
9.20 tutamanta - 4.00 tardekama