Diosta servisqanchikpi ñawparisunchik
1 Jehová Dios Taytanchikqa kusikunmi servisqanchikpi kallpanchakusqanchikta qawaspan hinaspa allinta predicananchikpaq kallpanchakusqanchikpipas. Pablom kallpancharqa congregacionpi cuentallikuq Timoteota Diosta servisqanpi kallpanchakusqanta qawachinanpaq (1 Tim. 4:13-15). Chaymi, experienciayoq otaq mana experienciayoq kaspapas kallpanchakunanchikmi predicasqanchik astawanraq allin kananpaq.
2 Dios servisqaykipi astawan kallpanchakuy: Ñawparinapaqqa allin ruraykunapim kallpanchakuna. ¿Ima ruraykunapitaq kallpanchakuna? Ejemplopaq, Bibliawan allinta yachachiypim kallpanchakuchwan (Efe. 6:17). Chaymantapas astawanmi kallpanchakuchwan predicayta callekunapi, telefonontakama, negociokuna kaq sitiokunapi otaq yachay munaqkunaman estudiachinapaq hina watukuspanchikpas. Chaymantapas allinmi kanman Bibliamanta estudiachiypi astawanraq kallpanchakuyqa.
3 Yanapakuykuna: Congregacionpi Diosmanta Willanapaq Yachachiq Escuela hinaspa Diosta Servinapaq Yachachiq Huñunakuykunapas allin tanteasqam kachkan predicasqanchikpi allinta yanapawananchikpaq. Chay huñunakuykunaman kallpanchakuspa rispanchik, preparakuspa hinaspa chaypi uyarisqanchikta kasukuyqa allinninchikpaqmi kanqa (2 Cor. 9:6).
4 Chaymantapas iñiqmasinchikkunawanpas yanapanakuchwanmi (Pro. 27:17). Predicacionpi predicaqmasinchikta atencionwan qawaspaqa astawanmi allin predicaq kasunchik. Chaymantapas Aslla Huñunakuspa Bibliamanta Estudiachiq ancianopas arreglotapaschá ruranqa predicacionpi pipas yanapawananchikpaq. Chaymi agradecekunchik yanapawaqninchik precursorta otaq experienciayoq mayqen wawqenchiktapas predicacionpi astawan yanapawasqanchikmanta. Chaynaqa Aslla Huñunakuspa Biblia Estudiasqanchikpi, ¿kachkanchu chayllaraq predicaq mayqen wawqenchikpas? Chayna kaptinqa nichwanmi ñoqanchikwan predicananpaq.
5 Kay tiemponchikpi imamantapas aswan allin rurayqa Diosmanta predicaymi. Diosman ‘kañasqa ofrendata qochkaq hina’ qospanchikqa kuyasqanchiktam qawachichkanchik (Heb. 13:15). Chaynaqa sichum kallpanchakusun predicasqanchikpi astawan ñawparinapaq hinaptinqa Timoteo hinachá kasunchik ‘allin llamkaq hina mana imamantapas penqakuspa Diospa cheqap palabranta allin yachachiq’ (2 Tim. 2:15).