Hinalla ñawpariy
BIBLIAPA nisqanta yacharuspaqa kasukuytam qallarirqanki, chaymi cambiarqanki imayna piensasqaykita, rimasqaykita hinaspa imayna kawsasqaykitapas, chaytaqa yaqapaschá rurarqanki Diosmanta Yachachinapaq Escuelapi manaraq kachkaspayki. Kunanqa yaqapaschá Jehova Diosman qokuspa bautizakurunkiña. Chayna kaptinqa, ¿manañachu Diosta serviynikipi ñawparinaykipaq kallpanchakuwaq? Bautizakuspaqa chayraqmi Dios serviyta qallarichkanki, chaymi hinalla kallpanchakunayki.
Timoteo ancianoña kachkaptinmi apostol Pablo qellqarqa Bibliamanta consejokuna chaskisqanpi chaynataq Diospa llaqtanpi servinanpaq favorecesqa kasqanpipas yuyaymanananpaq. Kallpancharqam chaykunata tukuy sonqonwan rurananpaq chaynapi ‘aswan-aswan ñawparisqan’ sutilla kananpaq (1 Tim. 4:12-15). Dios serviyta chayllaraq qallarispaykipas otaq unay wataña servispaykipas ñawparinaykipaqmi hinalla kallpanchakunayki.
Yachasqanchikmi vidanchikta cambian
Efesios 3:14-19 nisqanpim iñiqmasinkunata Pablo kallpancharqa Diospa yachachikuyninkuna ‘mayna ancho, mayna largo, mayna uku hinaspa mayna hatun’ kasqanmanta allinta entiendenankupaq. Chaypaqmi Jesusqa ancianokunata congregacionpi churarqa yachachinankupaq, correginankupaq hinaspa kallpanchanankupaq. Diospa Palabranpi chaynataq congregacionpi ancianokunapa yachachisqanpi sapakuti yuyaymanayqa yanapawasunmi Dios serviyninchikpi ñawparinanchikpaq (Efes. 4:11-15).
Iñiyninchikpi ñawparinapaqqa Diospa hinaspa Cristopa piensasqanman hinam piensananchik. Chaypaqmi mosoq pachawan ‘pachakuchkaq hina mosoq runaña kananchikpaq’ hinalla kallpanchakunanchik (Efes. 4:23, 24). Jesucristopa vidanmanta Bibliapi yachaspa, ¿reparankichu ejemplonta qatikunaykipaq? ¿Kallpanchakunkichu sumaq kayninkunata qatipakunaykipaq? (1 Ped. 2:21.)
TImamantapas imayna rimasqanchikmi qawachin Dios serviyninchikpi imayna ñawparisqanchikta. Mosoq pachawan pachakuchkaq hina vidankupi cambiaqkunaqa manañam llullakunkuchu, insultankuchu, qacha rimaytaqa rimankuchu nitaq pimantapas mana allintaqa rimankuchu, ‘allin kaqkunallamantam rimanku’ (Efes. 4:25, 26, 29, 31; 5:3, 4; Jud. 16). Sapallankupi otaq Salonpi kaspankupas imayna rimasqankum sutillata qawachin vidankuta Diospa Palabran cambiachisqanta.
Ñawparisqanchiktaqa qawachinchiktaqmi runakunapa yachachisqanwan mana aysachikuspa (Efes. 4:14). Ejemplopaq, ¿intusqachu tarikunki runakunapa imayna yachachisqankuwan otaq imayna kusirikusqankuwanpas? ¿Munawaqchu chaykunapi tiempoykita usuchispa Dios serviynikipi manaña kallpanchakuyta? Chayna kaptinqa Dios serviynikipim hukmanyaruwaq. ¡Mayna allinmi Dios serviyninchikpi ñawparinapaq tiempochakuyqa! (Efes. 5:15, 16.)
Runamasinchikwan allinlla kawsasqanchikpas qawachinmi Dios serviyninchikpi ñawparisqanchikta. ¿Yaqachu iñiqmasikikuna kuyapayayta hinaspa pampachaykuytapas atinkiña? (Efes. 4:32.)
Jehova Diospa munasqanman hina kawsanaykipaq ñawparisqaykiqa sutillam qawakunan congregacionpi chaynataq familiaykipipas. Sutillataqmi kanan escuelapipas, llamkasqaykipipas hinaspa maypipas (Efes. 5:21–6:9). Dios serviynikipi ñawparisqaykiqa sutillam kanqa ima rurasqaykipipas paypa munasqanman hina kawsaptikiqa.
Diospa qowasqanchikkunata servichikusun
Jehova Diosqa llapanchikmanmi yachayta qowanchik imatapas sumaqta ruranapaq, chayman hinataqmi munan favorninta tarinankupaq runamasinchik yanapananchiktapas. Chaymantam apostol Pedro qellqarqa: “Diospa qosusqaykichikman hinayá sapakama yanapanakuychik. Qamkunaqa kaychik Diospa hatun favorninkuna aypuq allin mayordomo hinayá”, nispa (1 Ped. 4:10). ¿Imaynatataq ñoqanchikpas allin mayordomo hina kachwan?
Pedroqa nirqataqmi: “Pipas rimaspaqa Diospa palabranman hinayá rimachun”, nispa (1 Ped. 4:11). Kay textom qawachin Jehova Diosta hatunchanapaqqa Palabranpa nisqanman hina rimananchikpaq, chaymi imayna rimasqanchikqa payta hatunchanan. Diosmanta Yachachinapaq Escuelapi yachachikuykunam yanapasunki ima ruray yachasqaykiwan chaynataq imayna kaynikiwanpas runamasikita yanapaspa Diosta hatunchanaykipaq. Chaynaqa, ¿imaynatataq yachawaq escuelapi ñawparisqaykimanta?
Escuelapa yanapakuyninkunawan ñawparisqaykipi piensanaykimantaqa yuyaymanay chay yanapakuykuna Diosta hatunchanaykipaq imayna yanapasusqaykipi. Allin yachachiq kanapaq escuela yanapawasqanchikraykum kaynata tapukuwaq: “¿Preparakunichu imayna predicanaypaq? ¿Yanapay munasqaytachu qawachini predicasqay runakunaman? ¿Yapamanta kutinaypaq hinachu tapuni? ¿Kallpanchakunichu allin yachachiq kanaypaq hinaspa Biblia estudiachisqaypa sonqonmanpas chayanaypaq?”, nispa.
Diosta serviynikipi ñawparisqaykiqa manam discursokuna qosqallaykimantachu. Ñawparisqaykitaqa qawachinki congregacionpi ruraynikikunata imayna rurasqaykiwanmi. Yachachisqayki qepata tapukuy: “¿Allintachu yachachirqani? ¿Uyariqniykunata yanapanaypaq hinachu yachachirqani?”, nispa.
Imapas ruray yachasqaykikunata servichikunaykipaqqa kikikim kallpanchakunayki. ¿Yaqachu mayqen iñiqmasikitapas wasin-wasin kuska predicanaykichikpaq kallpanchanki? ¿Atiwaqchu congregacionpi mozo-sipaskunata, onqoqkunata hinaspa predicacionman chayllaraq lloqsiqkunata imayna yanapayta? ¿Kallpanchakunkichu Salon limpiaypi otaq asambleapi imaynata yanapakunaykipaqpas? ¿Sapa kutichu precursor auxiliar kayta atiwaq? ¿Atiwaqchu precursor regular kayta otaq yanapakuwaqchu predicaqkunata necesitaq congregacionpi? ¿Kallpanchakunkichu Bibliapa nisqanman hina kawsaspa siervo ministerial otaq anciano kanaykipaq? Imapipas yanapakunaykipaq otaq ruranaykipaq kallpanchakusqaykim qawachinqa Dios serviynikipi ñawparisqaykita (Sal. 110:3).
Experienciayoq kayqa yanapawanchikmi
Dios serviypi manaraq experienciayoq kaspaykiqa ama hukmanyaychu. Diospa Palabranqa ‘mana yachaqman yachay qoykuqmi’ (Sal. 19:7; 119:130; Prov. 1:1-4). Jehova Diospa consejokunata kasukuspaqa yachayniyoqmi kasun, chaymi ima yachasqanchikkunamantapas aswan allinqa. Dios serviyninchikpi ñawparispaqa sutillamá experienciata hapisun. ¿Imaynatam chayna ñawparisqanchikta qawachichwan?
Vida pasasqanpi ima sasachakuytapas atipasqanwanmi wakinqa ichapas ninman: “Ñawpaqtapas kayqa pasawarqañam. Yachaniñam imayna ruraytapas”, nispa. ¿Allinchu kanman chayna confiakuyninqa? Proverbios 3:7 nin: “Amayá ancha yuyayniyoq kasqaykipaqchu hapikuy”, nispa. Vidanchikpi imapas pasawasqanchikqa yanapawanchikmi imakunamantapas cuentata qokunapaq. Iñiyninchikpi ñawpariptinchikpas imapas pasawasqanchikqa yanapawanchikmi Jehova Diospa yanapayninwan ima sasachakuytapas atipasqanchikmanta cuentata qokunapaq. Manam tanteasqanchikman hina ima sasachakuytapas atipasqanchikwanchu ñawparisqanchiktaqa qawachinchik, aswanqa Jehova Diospa yachachikuyninman hina imapaqpas tanteasqanchikwanmi. Hinaspapas tukuy sonqonchikmanta paypi confiakusqanchikwanmi.
Hinalla kallpanchakuy
Iñiyninpi allin takyasqa hinaspa hanaq pachapaq akllasqa kachkaspanpas apostol Pabloqa reqsikurqam wiñay kawsayta haypananpaqqa hinalla ‘kallpanchakunanmanta’ (Filip. 3:13-16). ¿Chaynatachu qampas kallpanchakunki?
¿Sutillachu qawakun Dios serviynikipi ñawparisqayki? Chaymanta cuentata qokunaykipaq tapukuy: ¿Kallpanchakunichu Diospa munasqanman hina kawsanaypaq? ¿Reqsikunichu Jehova Dios llapallan kamachiq kasqanta? ¿Imapas ruray yachasqaykunatachu servichikuchkani payta hatunchanaypaq? nispa. Diosmanta Yachachinapaq Escuelapi yachasqanchikkunaqa yanapawananchikmi Diospa sumaq kayninkunata qawachinapaq imayna rimasqanchikpi hinaspa imayna yachachisqanchikpipas. Chaykunapi reparasqaykim Dios serviynikipi ñawparisqaykita sutillata qawachinqa hinaptinmi astawan kusikuyta tarinki.