Predicayninchikqa anchatam kallpanchawanchik
1. ¿Imakunatam predicaspanchik tarinchik?
1 Jehová Diosta kusichiyta munaspanchikmi hinalla predicananchikpaq kallpanchakunchik, ¿aw? Chayna kaptinpas, ‘Diospa palabranta willakunapaq’ kamachikuyta kasukuspanchikmi, Diospa bendicionninkunata chaskinchik hinaspam kallpatawan kusikuyta tarinchik (2 Tim. 4:2; Isa. 48:17, 18). Hinaptinqa, ¿imaynatam predicaspanchik kallpatawan kusikuyta tarichwan?
2. ¿Imakunapitaq predicayninchikqa kallpanchawanchik?
2 Kallpatawan bendicionkunatam qowanchik: Sapa punchaw sasachakuykunapi piensanamantaqa predicayninchikmi yanapawanchik sumaq suyakuyninchikpi piensananchikpaq (2 Cor. 4:18). Chaymantapas Bibliapa yachachikuyninta runakunaman willaptinchikmi, iñiyninchik allinta kallpanchakun hinaspapas astawanmi kuyanchik Diospa yachachikuyninta (Isa. 65:13, 14). Chaymantapas kay pachapi mana allinkunamanta karunchakunankupaq hinaspa iñiyninkupi ñawparinankupaq hukkunata yanapaspanchikmi, kallpanchasqa tarikunchik mana allinkunamanta karunchakunanchikpaq (Juan 17:14, 16; Rom. 12:2).
3. ¿Imaynatam predicayninchik yanapawanchik sumaq kayninchikkunata wiñachinapaq?
3 Predicayninchikqa yanapawanchiktaqmi sumaq kayninchikkunata astawan wiñachinapaq. Runakuna imayna kasqankuman hina predicaspanchikmi yachanchik humilde kayta (1 Cor. 9:19-23). ‘Cheqesqa hinaspa mana michiqniyoq ovejakuna hina runakunawan’ rimaspam llakipayayta yachanchik hinaspa yanapaytapas munanchik (Mat. 9:36). Mana allinta chaskiwaptinchikpas hinalla predicaspanchikmi pacienciakuyta yachanchik, chaynallataqmi kusikuyninchikpas yapakun hukkunata yanapaptinchik (Hech. 20:35).
4. ¿Imaynatam sientekunki predicasqaykiwan?
4 ¡Mayna kusikunapaqmi kayqa! Predicayninchikwanmi Sapallan cheqap Diosninchikta hatunchanchik. Chaymantapas predicayninchikqa kallpatam qowanchik, arí achka bendicionkunatam qon Diosmanta ‘allin noticiata’ llapallan willakuqkunaman (Hech. 20:24).