¿Imaynatam yachachichwan mana allin leeqta?
1. Predicayninchikpi, ¿imayna runakunatam tarinchik?
1 Predicasqanchikpim tupanchik Diosmanta yachay munaqkunawan, ichaqa wakinmi mana leeyta yachankuchu. ¿Atichwanchu paykunata Diosmanta yachachiyta? Arí.
2. ¿Imanasqataq respetananchik mana allin leeqta, hinaspa imaynatam chayta qawachichwan?
2 Imayna kasqanta respetasun: Jehová Diosqa runapa sonqontam qawan, manam estudioyoq kasqantachu (1 Sam. 16:7; Pro. 21:2). Chaymi ñoqanchikpas mana hukmantachu qawanchik mana allin leeqtaqa. Pacienciawan hinaspa ‘respetowan’ yachachiptinchikqa munanmankuchá yanapachikuyta (1 Ped. 3:15). Chaymi qallariypiqa mana hikutananchikchu textota otaq parrafota leenanpaqqa. Tiempopa risqanman hinapaschá Bibliamanta yachasqanman hina, allintaña leeyta munanman Diospa yachachikuyninta ‘tuta punchaw’ leespa yuyaymanananpaq (Sal. 1:2, 3).
3. ¿Imaynatataq yachachichwan mana allin leey yachaqta?
3 Imayna yachachinamanta: Qellqanchikkunapi dibujokunaqa ancha allinmi yachachinapaq, chaynataq yuyaymanachinapaqpas. Chaymi estudianteman dibujota qawachispa tapuchwan rikusqanmanta rimananpaq. Chaymantañataq yachachisqanchikmanta allinta entiendenanpaq tapukuykunata rurachwan. Tukunapaqñataq yachachisqanchikwan tupaq textokunata leepuchwan. Dibujokunaqa servinmantaqmi estudiota tukuspa pisillapi yuyarichinapaqpas. Kayta ichaqa ama qonqaychu: atisqanman hinalla yachachiy. Yuyarinanpaq kaqkunallata kutirispa-kutirispa yachachiy. Amataq yachachiychu qellqapi mana kaqkunataqa. Bibliamantapuni textokunata leey hinaspa tapuykunata ruray chaynapi entiendesqanta musyanaykipaq. Chaynata yachachiptinchikqa allintaña leenanpaqchá kallpanchakunqa Bibliapa sumaq yachachikuyninkunata astawan yachananpaq.
4. ¿Imaynatam Biblia estudiaqta yanapachwan allinta leenanpaq?
4 Allinta leenapaq yanapakuymanta: Runamasinchik mana allin leeyta yachasqanraykuqa, manam nichwanchu mana entiendesqantaqa. Chaynaqa, ¿imanasqataq mana kallpanchankichu Bibliamanta grabasqa qellqanchikkunata uyarinanpaq? Leeynintaqa sumaqyachinmantaqmi uyarisqanman hina ñawillanwan leeypi qatipakuspan otaq simillanpi qatipakuspanpas. Servichikunmantaqmi Kallpanchakuy leenaykipaqwan qellqanaykipaq, niq qellqatapas. Wakin congregacionkunapim mana leeqkunata yanapanankupaq ancianokuna tiempota rakirunku. Hinaptinqa, ¿allinchu kanman kay yanapakuykuna? Allinmá kanman kay yanapakuykunata servichikuyqa, chaynapi mana allin leeqkuna ‘Bibliapi yachachikuyninkunata’ yachaspanku salvacionta haypanankupaq (2 Tim. 3:15).