Yanapasun leeypi sasachakuqkunata

1. ¿Imanasqataq leeypi sasachakuqkunata Bibliamanta yachachiyqa sasa?

¹ Wakin runakunaqa predicaptinchikmi Diosmanta yachayta munanku, ichaqa leeypi sasachakusqankuraykum mana almitinkuchu Bibliata otaq librokunata estudianankupaqqa. Chaymi Yachachiq librota qallariypi munachiptinchikqa mana allinchu kanman. ¿Imaynatam paykunata yanapachwan Diosmanta yachanankupaq? Iskay chunka masnin nacionkunapi iñiqmasinchikta tapuptinkum nirqaku ima ruwanamanta, qawasun qatiqninpi.

2. ¿Ima qellqakunatam servichikuchwan leeypi sasachakuqkunata yanapanapaq?

² Estudiachisqayki runa mana allinta leeptinqa otaq mana leeyta yachaptinqa, estudiachiytam qallariwaq Diosta uyariy otaq Diosta uyariy hinaspa wiñaypaq kawsay niq folletokunawan. Estados Unidos nacionmanta huk precursormi iskaynin folletokunata qawachin hinaspa tapun mayqen munasqanmanta. Kenia nacionpi Betel wasimantam nimurqaku kay qellqakuna Africa lawpi allinta yanapakusqanmanta, chaypi runakunaqa astawanmi yachanku willasqa, tapukuywan hinaspa kutichiykunawan ruwanamantaqa. Educacionniyoq runakunaqa manapaschá sasachakunkuchu leeyta hinaspa tapukuykuna kutichiytapas, ichaqa mana ancha educacionniyoq runakunam sasachakunku. Biblia estudiaqkuna mana ancha leeyta yachaptinkuqa, wakin iñiqmasinchikkunam servichikunku: Diosmanta allin noticiakuna, Diospa amigon kaytaqa atichwanmi hinaspa Bibliamanta willakuq libroy niq qellqakunata.

3. ¿Imatam ruwananchik leeypi sasachakuqkunata yachachispanchikqa?

³ Kallpanchay. Leeypi sasachakuqkunaqa yaqapaschá penqakunku. Paykunata kuyakuywan yanapaptinchikqa munanqakum Bibliamanta yachayta. Mana leey yachaqkunaqa yaqa llapankum mana sasachakuspalla yachanku. Chaymi paykunataqa mana penqananchikchu (1 Ped. 3:15). Chaynapim kallpanchasqa tarikunqaku hinalla estudianankupaq hinaspa iñiyninkupi ñawparinankupaqpas. Chaynaqa, hinallayá kallpanchasunchik.

4. ¿Imaynatam preparakunankupaq kallpanchachwan leeypi sasachakuqkunata?

⁴ Biblia estudiaq leeypi sasachakuptinpas kallpanchay preparakunanpaq. Sudáfrica lawpi wakin iñiqmasinchikkunam paykunata ninku leeyta yachaq familianwan otaq amistadninwan yanapachikunankupaq. Gran Bretaña nacionmanta huk iñiqmasinchikñataqmi preparakuyta yachachinanpaq preparakusqan librota prestan, chaynapi tapukuypa kutichiyninkunata chaylla tarinanpaq. India nacionmanta iñiqmasinchikñataqmi qatiqnin semanapi estudianankupaq dibujokunata qawachin, chaynapi manaraq estudiachkaptinku piensachkananpaq.

5. Bibliamanta yachachispaqa, ¿imakunata ruwaspam pacienciakuq kasqanchikta qawachichwan?

⁵ Pacienciakuy. Aswan allinnin kaq yachachikuykunata allinta entiendenankupaq yanapay. Qallariypiqa allinmi kanman chunka otaq chunka pichqayoq minutollapi iskay-kimsa parrafokunallamanta rimariynikichik. Allillamanta leeptinkupas pacienciakuy. Jehova Diosta kuyasqanman hinam astawan kallpanchakunqa allinta leenanpaq. Chaymi qallariymantapacha ninayki huñunakuykunaman rinanpaq.

6. ¿Imaynatam leeyta yachachiwaq?

⁶ Biblia estudiaq leeyta yacharuspanqa chayllam iñiyninpi ñawparinqa (Sal. 1:1-3). Achka iñiqmasinchikkunam iskay-kimsa minutollapi, Kallpanchakuy leenaykipaqwan qellqanaykipaq niq qellqata servichikunku sapa estudiay tukusqankupi. Leeyta mana yachasqankuwan hukmanyaptinkuqa, imapas ruway yachasqankunamanta yuyarichispayki kallpanchay. Niytaq Diospa yanapakuyninta mañakunanpaq, Jehova Diosqa kallpanchakusqanmantam bendecinqa (Prov. 16:3; 1 Juan 5:14, 15). Gran Bretaña nacionpi wakin iñiqmasinchikkunaqa kallpanchankum abecedariota yachanankupaq, Bibliapa textonkunata maskanankupaq chaynataq mana sasachakuspalla entiendenapaq qellqanchikkunata leenankupaqpas. Yaqa llapanpim pimanpas leeyta yachachispaqa, kallpanchananchik chayta ruwanankupaq.

7. ¿Imanasqataq leeypi sasachakuqkunaman Bibliamanta yachachinanchikpaq kallpanchakunanchik?

⁷ Jehova Diospaqqa wakchapas apupas chaynallam kanchik (Job 34:19). Diosqa sonqonchiktam qawan (1 Cron. 28:9). Chaymi mana leey yachaqkunamanpas Diosmanta yachachinanchik. Achka qellqanchikkunam kachkan yanapawananchikpaq. Tiempopa pasasqanman hinataqmi Yachachiq librowan estudiachichwan, chaynapi Bibliata astawan entiendenankupaq.