Familiapa allinninpaq
1. ¿Imapaqmi israelita familiakunata yanaparqa sabado punchaw?
1 Sabado punchawpi israelita familiakuna samanankupaq Diospa kamachisqanqa allinninkupaqmi karqa: chay punchawpi samaspankum tiempochakuqku Jehová Diospa bendecisqanpi hinaspa paywan amistadninku imayna kasqanpi yuyaymananankupaq. Tayta-mamapas kallpanchakuqkum wawa-churinkuman Diosmanta yachachinankupaq (Deu. 6:6, 7). Sapa sabadom Diospa llaqtanpi kaqkunaqa tiempochakuqku Payta yupaychanankupaq.
2. ¿Imatam Diosmanta yachachin sabadopi samanankupaq kamachisqan?
2 Jehová Diosqa manañam niwanchikchu familiantin sabado punchawta samanapaqqa. Chaywanpas chayna kamachisqanqa yanapawanchikmi: payqa interesakunmi paywan amistadninchik imayna kasqanpi (Isa. 48:17, 18). Chaytam kunanpas qawachin Familiawan Diosta Yupaychanapaq Tutata qowaspanchik.
3. ¿Imapaqtaq Familiawan Diosta Yupaychanapaq Tutaqa?
3 ¿Imapaqtaq Familiawan Diosta Yupaychanapaq Tutaqa? Enero 2009 watapim, Diosmanta Yachachinapaq Escuela hinaspa Diosta Servinapaq Huñunakuy rurakusqan tuta Aslla Huñunakuspa Bibliamanta Estudio rurakuyta qallaykurqa. Chaynataqa cambiarurqa familiakuna Diosta huk tuta kuska yupaychanankupaq hinaspa chayman hina Diosta serviyninkupi kallpanchanakunankupaqmi. Chaymi familiakuna kallpanchasqa karqaku chay huñunakuypa rantinpi familiankuwan allinta tiempochakuspa Bibliata otaq sapa familiapa necesitasqanman hina mayqen yachachikuymantapas estudianankupaq.
4. ¿Huk horallatachu estudiananchik? Explicay.
4 Aslla Huñunakuspa Bibliamanta Estudiopaqqa tiempochakurqanchikmi alistakunapaq, rinapaq hinaspa huk ruraykunapaqpas. Yaqa llapanchikmi huk horalla huñunakunapaq achka horata tiempochakurqanchik. Chay tiempotam kunanqa servichikuchwan familiantin Jehová Diosta yupaychanapaq chayqa manam huk horallachu kanan. Aswanqa tanteanam familiapa necesitasqanman otaq imayna tarikusqanman hina hayka tiempo estudianapaqpas.
5. ¿Lliw yachachikuytachu kuska estudiana? Explicay.
5 ¿Lliw yachachikuytachu kuska estudiana? Wawa-churiyoq familia otaq mana wawa-churiyoq kaqkunapas Bibliamanta kaq yachachikuyta estudiaspaqa kallpanchanakunkum (Rom. 1:12). Familiaqa astawanmi huk sonqolla kawsanku. Chaymi Familiawan Diosta Yupaychanapaq Tutapiqa Bibliamanta horqosqa yachachikuykunata estudiana. Ichaqa allintaqmi familiapi kaqkuna sapakama estudianankupaq tiempochakuyninkuqa. Ejemplopaq, ichapas imamantapas llapanku estudiaruspanku hina chay sitiollapi sapakama huñunakuypaq preparakunmanku otaq revistanchikkunata leenmanku. Wakin familiakunaqa chay tutapim televisionta mana prendenkuchu.
6. ¿Imaynatam familiapi estudiachwan?
6 ¿Imaynatam rurachwan? Manam sapa kutichu tapuywan kutichiywan kanan. Wakin familiakunam tanteanku chawpi semanapi huñunakusqanchikman hina familianwan estudianankupaq: chaymi sapa familia tanteanku imaynata ruranankupaq. Ejemplopaq, Bibliatam kuska leenku, huñunakuypaqmi tanteasqanku kaqta preparakunku hinaspam imayna predicanankupaq practicanku. 6 kaq paginapim yanapakuykuna kachkan.
7. ¿Imakunatam ruranmanku mana aburrikunankupaq?
7 ¿Imatam ruranmanku mana aburrikunankupaq? Wawa-churikunaqa astawanmi entiendenku kuyakuywan hawkalla yachachisqaqa. Tiempo allin kaptinqa hawapipas estudiawaqchikmi. Chaymantapas huk rato samariypas allinmi kanman. Wakin familiaqa mikunankupaqmi imachatapas ruranku. Ichapas tayta-mamaqa warmanku sasachakuypi kasqanmanta otaq mana allinta portakusqankumanta corregiyta munanqaku, ichaqa Familiawan Diosta Yupaychanapaq Tutataqa manam servichikunankuchu qaqchanankupaq otaq correginankupaqqa. Mayqen warmantapas lliwpa qayllanpi penqachinapaq hina correginanmantaqa allinmi kanman huk kutipiña sapallanpi corregiyqa. Familianwan estudiayqa manataqmi aburrikunapaq hinachu kanan aswanqa qawachinankum kusisqa Dios yupaychasqankuta (1 Tim. 1:11, NM).
8, 9. ¿Imakunatam taytaqa ruranman preparakunanpaq?
8 ¿Imakunata ruraspam taytaqa allinta yachachinman? Familiantam allinta yanapanqa imamanta estudianankupaq kaqta tiempowan preparakuspaqa (Pro. 21:5). Allinmi kanman imamanta estudianankupaq señoranta tapuyninqa (Pro. 15:22). Chaymantapas wakin kutipiqa warmaykikuna tapuynikipas allinmi kanman. Chayta ruraspaykiqa cuentatam qokunki imamanta yachay munasqankuta otaq imawan sasachakusqankumantapas.
9 Taytaqa manapaschá sapa kutichu unayta preparakunan kanqa. Familiaqa munanqapaschá qatinasllanpi imamantapas sapa semana yachayta, chaymi taytaqa mana sapa kutichu mosoq yachachikuyta preparanan kanqa. Allinmi kanman Familianwan estudiayta tukuruspallan Diosta serviyninpi familianpa necesitasqanman hina qatiqninpi yachachinanpaq preparakuyninqa. Wakin taytakunaqa familianwan imamanta estudianankupaq kaqtam suti rikuyllata listapi churanku lliwpa rikunanku sitiopi. Chaywanmi familiaqa estudianankupaq listo suyanku, wakinpiqa preparakunankupaqmi tiempochakunku.
10. Familiawan Diosta Yupaychanapaq Tutapi, ¿imatam ruranmanku sapallan kaqkunaqa?
10 ¿Imatataq rurayman sapallay kaspaqa? Sapallan kaqkunaqa Familiawan Diosta Yupaychanapaq Tutatam servichikunmanku estudianankupaq. Allinmi kaykunata ruraynin kanman: Bibliata leeynin, huñunakuykunapaq preparakuynin, Llaqta Cuidaq hinaspa ¡Despertad! revistata leeyninpas. Wakin iñiqmasinchikqa mayqen yachachikuymantapas astawanmi estudianku. Wakin kutipiqa ichapas mayqen iñiqmasinchiktapas otaq familiatapas invitanmanku Bibliata estudiaspa kallpanchanakunankupaq.
11, 12. Familiawan Diosta Yupaychanapaq Tutaqa, ¿imakunapim familiata yanapan?
11 ¿Imakunapitaq yanapawanchik Familiawan Diosta Yupaychanapaq Tutaqa? Tukuy sonqonchikwan Jehová Diosta yupaychaspaqa paymanmi astawan asuykunchik. Chaynallataqmi Diosta kuskanku yupaychaq familiaqa astawan kuyanakunku. Chayna yanapakuy tarisqankumantam casarasqa iñiqmasinchikkuna nirqaku: “Iskayniykum precursor kaniku ichaqa manam kanchu wawa-churiyku, chaywanpas chay tutataqa kusikuywanmi suyaniku. Cuentatam qokuniku astawan kuyanakusqaykumanta hinaspa Diosta kuyasqaykumantapas. Estudianaykupaq punchaw chayaramuptinqa rikchariruspallam ninakuniku ‘¿imatam kunan rurasunchik? Hinaspam niniku ¡kuskam Diosta yupaychasun!’”, nispa.
12 Mana tiempoyoq familiakunatapas yanapanmi haykapi estudianankupaq tanteasqanku. Iskay qari wawankunata sapallan uywaq precursoram qellqarqa: “Ñawpaqtaqa atispallaykum wakin kutipi estudiaq kaniku. Llumpay pisipasqa tarikuptiymi mana sapa kutichu estudiaq kaniku. Tiempochakuytam mana atirqanichu. Chaymi anchata agradecekuspa qellqamuykichik Familiawan Diosta Yupaychanapaq Tutamanta. Kunanqa sapa kutiñam estudiachkaniku chaymi allinta yanapawachkanku”, nispa.
13. ¿Imamantam kanqa familia yanapasqa kananpaqqa?
13 Samanankupaq sabado punchawta qosqan hinam Familiawan Diosta Yupaychanapaq Tutaqa familiakunapaq Diospa bendicionnin (Sant. 1:17). Israelpa miraynin familiakuna sabado punchawta imayna servichikusqankuman hinam Dioswan amistadninku karqa. Chaynallataqmi kay tiempopipas Familiawan Diosta Yupaychanapaq Tutata imayna servichikusqanchikman hinam yanapasqa kasunchik (2 Cor. 9:6; Gal. 6:7, 8; Col. 3:23, 24). Kay tutata allinta servichikuspaqa kay Salmo qellqaq hinachá ninki: “Ñoqapaqqa ¡mayna sumaqmi Diospa ñawpaqninpi kayqa! Señor Diosnillaypim amparakuni ñoqallayqa”, nispa (Sal. 73:28).
[5 kaq paginapi suti rikuylla kaq willakuy]
Familiawan Diosta Yupaychanapaq Tutaqa manam aburrikunapaq hinachu kanan, aswanqa kusisqa Dios servisqanchiktam qawachinan
[6 kaq paginapi recuadro]
SUTILLAM KANAN
Familiawan Diosta Yupaychana Tutapaq
Biblia:
• Bibliata leey sapa semana leenapaq kaqta. Leesqaykichik textokunapi achka runakunapa rimasqan kaptinqa, chay runakunapas rimachkanman hina mayqennikichik leenaykichikpaq ninakuychik.
• Bibliapa willasqanman hina actuay.
• Bibliata leeychik sapa semana leenapaq kaqta hinaspa sapakama qellqaychik leesqaykichikman hina huk otaq iskay tapuyta. Hinaspa kuska maskaychik kutichiyninta.
• Sapa semana huk textota tarjetachapi anotay hinaspa umallamanta yachay chaynataq explicay. Chaykunata waqaychaychik hinaspa sapa semana yuyariychik hayka textotaña yachasqaykichikta.
• Bibliaykita leey, Biblia imayna leesqankumanta grabasqata uyaristin.
Huñunakuykunapaq:
• Wakinta huñunakuypaq kaqta kuska preparakuychik.
• Qatiqnin semanapi huñunakuypaq tupaq takikunata ensayaychik.
• Diosmanta Yachachinapaq Escuelapi otaq Diosta Servinapaq Huñunakuypi discursota otaq demostracionta ruranaykichikpaq kaptinqa familiaykichikpa qayllanpi ensayaychik.
Familiapa necesitasqanmanta:
• Los jóvenes preguntan otaq Aprendamos del Gran Maestro nisqa librokunata servichikuy.
• Escuelapi ima sasachakuytapas imayna atipanankupaq ensayaychik.
• Wawa-churikichik tayta-mama kachun, qamkunañataq wawa-churinkuna. Paykuna maskachunku yachachikuyta imayna yanapasunaykichikpaq.
Predicacionpaq:
• Semana tukuyta revistakunawan imayna predicanaykichikpaq practicaychik.
• Cristopa wañukusqanta yuyarinapaq killapi otaq vacacionnikichikpi astawan predicanaykichikpaq tanteaychik.
• Predicacionpi imamantapas tapukusqankuman hina piensaspa chay tapukuykunapa kutichiyninta sapakama maskaspa ensayaychik.
Kaykunatapas rurawaqchikmi:
• Chayraq chaskisqaykichik revistakunatam kuska leewaqchik.
• Sapakamam leewaqchik chayllaraq chaskisqaykichik revistapi gustasusqaykichik mayqen yachachikuytapas hinaspam rimariwaqchik.
• Invitawaqmi sapallan otaq casarasqa mayqen iñiqmasinchiktapas hinaspam paykunata tapuwaqchik.
• Mayqen videonchiktapas qawaspam chaymanta rimariwaqchik.
• Kuska estudiaychik ¡Despertad! revistapi “Los jóvenes preguntan” otaq “Actividades para la familia” nisqan yachachikuykunata.
• Estudiaychik Llaqta Cuidaq revistapi lloqsimuq: “Churi-wawaykichikta yachachiychik” otaq “Mozo-sipaskunapaq” niq yachachikuykunata.
• Leewaqchikmi Anuario librota otaq kimsa punchaw asambleapi chayraq chaskisqanchik mayqen qellqatapas chayman hina rimarinaykichikpaq.
• Chayllaraq pasaq mayqen asambleamantapas yuyariwaqchikmi allinnin kaq yachachikuykunata.
• Jehová Diospa unanchasqankunata qawaspa ima yachasqaykichikmanta rimariychik.
• Bibliapa willakusqanman hina kuska dibujaychik otaq mapata ruraychik.