Callekunapi predicayqa allinpaqmi
1. ¿Imaynatam Jesusta qatipakuchwan?
1 Jesusqa mana iskayrayaspam predicarqa ñankunapi chaynataq maypipas runakunawan tupaspan (Luc. 9:57-61; Juan 4:7). Payqa lliw runakunamanmi Diosmanta willayta munarqa. Kunan tiempopim callekunapi predicaspa runakunata allinta yanapanchik Diospa yachayninta tarinankupaq (Pro. 1:20). Aswan allinmi kanqa tanteaykuspa kikinchikmanta hukkunata parlapayaptinchikqa.
2. ¿Imanasqataq callekunapi predicaspaqa kikinchik rimayta qallarinanchik?
2 Rimaytam qallarinanchik. Sayaspa otaq tiyaykuspa puriqkunata suyanamantaqa allinmi kanman kikinchikmanta asuykuspa rimapayayqa. Rimapayay asirispa, uyanta qawaspa hinaspa mana manchakuspa amistadnikita hina. Piwanpas predicaspaqa allinmi sapakama predicaynikichikqa kanman. Chaymantapas kallpanchakunam yachay munaqwanqa yapamanta rimanapaq. Atikuptinqa, rimayta tukuruspa tapuy imaynam kaqmanta rimanaykichikpaq. Wakinqa huk callellapim sapa kuti predicanku, chaymi yanapan chayninta puriqkunawan achka kutita rimananpaq hinaspa astawan yachachinanpaqpas.
3. ¿Imaynatam allinta tanteachwan callekunapi predicaspa?
3 Allintam tanteananchik. Allinta tanteay maypi hinaspa piman predicanaykipaq. Manam lliw purikuqmanchu predicananchik. Allinta qawariy. Sichum pipas kallpayllaña pasaptinqa manam sayachinachu. Negociokunapa kasqanpi predicaspaqa, negociantekunata ama hukmanyachinaykipaq hina predicay. Allinmi kanman rantipakusqanmanta lloqsimuptinña runakunata rimapayayqa. Sumaqllata runakunaman asuykuy, ama mancharichinaykipaq hinachu. Allintataqmi tanteana mayqen qellqanchikta qonapaqpas. Sichum pipas nisqanchikpi anchata mana interesakuptinqa tratadollatam qochwan revista qonamantaqa.
4. ¿Imanasqataq callekunapi predicayqa ancha allin?
4 Callekunapi predicasqanchikmi yanapawanchik muhuta maqchichkaq hina pisi tiempollapi cheqapmanta achka runakunaman willananchikpaq (Ecl. 11:6). Callepi tupasqanchik wakin runakunaqa wasinpi mana tarisqanchik kaqkunam. ¿Manachu qampas tanteakuwaq callekunapi sumaqta predicanaykipaq?