Hukkunatayá ‘llakipayasun’
1. ¿Imatam necesitachkanku achkallaña runakuna?
1 Ima tiempomantapas kunanmi runakunaqa yanapanata aswan necesitachkanku. Enteron pachapi tukuy imapa pasasqanwanmi tarikunku llumpay llakikuywan onqosqa, mana suyakuyniyoq hinaspa hukmanyasqallaña. Cristianokunaqa yachanchikmi achkallaña runakuna yanapanata necesitasqankuta, atichwanmi llakipayaspa yanapaytaqa (Mat. 22:39; Gal. 6:10). ¿Imaynatam tukuy sonqonchikmanta yanapaykuchwan? Chaymantayá yachasun.
2. ¿Imata ruraspam runakunata llakipayasqanchikta qawachichwan?
2 Llakipayaspam ruranchik. Runakunamanqa Jehová Diosllam cheqap consuelota qonman (2 Cor. 1:3, 4). Llakipayakuq Diosninchikmi niwanchik paykunata ‘llakipayananchikpaq’ hinaspa Gobiernonmanta allin noticiata willananchikpaqpas (1 Ped. 3:8). Paykunaman aswan willanapaq kallpanchakuspanchikmi ‘llakisqa’ sonqonkuta hawkayachinchik, yachanchikmi Diospa Gobiernollan ñakariykunata tukuchinanmanta (Isa. 61:1). Jehová Diosqa serviqninkunata llakipayasqanraykum mana allin rurayta chayllaña chinkachinqa hinaspa apamunqa mosoq allpata (2 Ped. 3:13).
3. Jesusta qatipakuspa, ¿imaynam huk runakunawan kananchik?
3 Jesus hinam runakunapaq kananchik. Jesusqa achkallaña runakunaman willaspanpas, sapakamapim piensarqa. Yacharqam Diosmanta sapakama ima yachay munasqankuta chaymi pacienciakuspa yachachirqa, llakipayarqam mana michiqniyoq ovejakuna hina kasqankumanta (Mar. 6:34). Jesusta qatipakuspaqa ñoqanchikpas runakunatam llakipayasun, chayqa sutillam qawakunqa uyanchikpi hinaspa imayna rimasqanchikpipas. Chaynataq, imamantapas puntatam predicasun paykunapa imayna kasqanman hina (1 Cor. 9:19-23).
4. ¿Imanasqataq runakunata ‘llakipayananchik’?
4 Llapallan nacionkunapim waranqantin runakuna tukuy sonqowan yanapaptinchik Diospa Gobiernonmanta consuelakuq willakuyta uyarichkanku. Llakipayakuq Jehová Diostam hatunchanchik hinaspa kusichinchik ñoqanchikpas pay hina ‘llakipayakuq’ kaspanchik (Col. 3:12).