Estudiota tarinapaq pichqa yanapakuykuna
1. ¿Imatam rurananchik Biblia estudiay munaqta mana tarispaqa, hinaspa imanasqa?
1 ¿Bibliamanta estudiay munaqta tarinaykipaqchu sasachakunki? Chayna kaptinpas hinallayá kallpanchakuy. Jehová Diosqa yanapanmi kallpanchakuqkunataqa (Gal. 6:9). Qatiqninpim qawasunchik estudiokunata tarinapaq pichqa yanapakuykunamanta.
2. ¿Imaynatam runakunaman Bibliamanta estudiachiyta qallaykuchwan?
2 Bibliamanta estudiota munachiy. Achka runakunam yachanku Llaqta Cuidaq hinaspa ¡Despertad!, qellqakunata aypusqanchikta, ichaqa manamá yachankuchu Bibliamanta estudiota qosqanchikmantaqa. Wasin-wasin predicaspaykiqa, kallpanchakuy Bibliamanta estudiota munachinaykipaq. Munachiytaq sapa kuti watukusqayki runakunamanpas. Mana munaptinkuqa hinalla qellqanchikkunata apaspa, kallpanchakuy estudiayta munanankupaq. Huk cristianom unay wataña casarasqa runaman qellqanchikkunata saqeylla-saqeq. Huk kutipim chayllaraq lloqsimuq qellqanchikkunata apaspan iskayninkuta qonqaymanta tapurqa: “¿Munawaqchikchu Biblia estudiayta?”, nispa. Paykunañataqmi nirqaku arí nispanku, kunanqa bautizasqañam kachkanku.
3. ¿Imanasqataq mana piensananchikchu huñunakuyman hamuq lliw runakuna Biblia estudiasqankutaqa?
3 Huñunakuykunaman hamuq runakunawan rimariy. Amayá piensaychu huñunakuyman hamuq lliw runakuna Biblia estudiasqankutaqa. Huk iñiqmasinchikmi nin: “Huñunakuykunapim Bibliamanta achka estudiachisqaykunataqa tarirqani”, nispa. Huk señoram 15 watakunaña cristiana wawankunawan huñunakuykunaman riq. Payqa huñunakuy qallarichkaptinmi chayaq hinaspapas tukuruptillanmi kamas kutikuq. Huk kutipim ichaqa huk cristiana tapurqa: “¿Munawaqchu Biblia estudiayta?”, nispa. Chay señorañataqmi estudiayta qallaykuspan kunanqa bautizasqaña kachkan. Estudiachiq cristianam nin: “¡Imanasqamá chunka pichqayoq watatañaqa suyarqani estudiota munachinaypaqqa!”, nispa.
4. ¿Imakunatam rurachwan estudiota qallarinapaq?
4 Hukkunatapas tapuy. Huk cristianam Bibliamanta yachachinankupaq huk iñiqmasinkunata riysin. Estudiachiyta tukuruptinkum chay riysiq cristianaqa estudiachisqanta tapun: “¿Reqsinkichu pitapas Bibliamanta estudiay munaqta?”, nispa. Chaymantapas, sichu sapa kuti watukuspanchik pimanpas saqerqanchik Yachachiq librota hinaspaqa, paykunatapas tapuchwanmi pikuna chay librota munasqankumanta. Wakin iñiqmasinchikkunapas otaq wakin precursorkunapas manapaschá atinmankuchu Bibliamanta yachay munaqman estudio qoyta. Hinaptinqa, ¿atiwaqchu paykuna estudiachiyta?
5. ¿Imanasqam ancha allin kanman iñiqmasinchikpa mana iñiq qosanta otaq mana iñiq warminta Biblia estudiananpaq tapuyninchikqa?
5 Casarasqakunapa mana iñiq warminta otaq qosanta tapuy. ¿Congregacionnikipi kanchu mana iñiq warmiyoq otaq mana iñiq qosayoq iñiqmasikikuna? Wakinkuqa manam munankuchu qosankuwan otaq warminkuwan Biblia estudiaytaqa, ichaqa munanmanmi hukwan estudiayta. Chayna kaptinqa, allinmi kanman iñiq qosanta otaq iñiq warminta puntata tapuyninchik chaynapi imaynata otaq haykapi Biblia estudiayta qallarinapaq.
6. ¿Imanasqataq Diosta mañakuyqa ancha allin Bibliamanta estudiay munaqta tarinapaq?
6 Diosta mañakuy yanapasunaykipaq. Ancha allintaqmi Jehová Diosta mañakuypas (Sant. 5:16). Paypa munasqanman hina mañakuptinchikqa uyariwasunmi (1 Juan 5:14). Mana ancha tiempoyoq huk iñiqmasinchikmi Diosta mañakurqa Bibliamanta estudiay munaqta tarinanpaq. Señoranñataqmi manchapakurqa qosan estudiota tariruspan tiempon mana haypananmanta, astawanraq sasachakuyniyoq kaptinqa. Chay llakikuyninmantam señoranqa Jehová Diosman willakurqa. Iskay semana pasaruptinmi mañakusqankuman hina huk precursora Bibliamanta yachay munaq runata tariruspan paywan rimarqa estudiachinanpaq. Señoranmi nin: “Bibliamanta estudiota qonankupaq mana haypakuq piensaqkunatam niniku haykapipas Dios mañakuyta mana saqenankupaq hinaspa llakinkumantapuni Diosman willanankupaq. Manam haykapipas piensarqanichu ancha kusisqa tarikunaykutaqa”, nispa. Hinalla kallpanchakuspaykiqa qampas tarinkimá Bibliamanta yachay munaqtaqa, chaynapi ‘wiñay kawsayta’ haypanankupaq (Mat. 7:13, 14).