Amayá atipachikuychu tiempoyki mana haypasusqaykiwanqa
1. ¿Imanasqam wakin iñiqmasinchikkunaqa Bibliamanta estudio qallariyta mana munankuchu?
1 Wakin iñiqmasinchikkunaqa manamá Bibliamanta estudiota qallariyta munankuchu mana ancha tiempoyoq kasqankurayku. Pitapas Bibliamanta yachachinapaqqa tiempochakunam preparakunapaq, yachachinapaq hinaspa sasachakuyninkunapi yanapanapaqpas. Apostol Pablom nirqa Tesalonica llaqtapi iñiqkunata tukuy tiemponwan Diosmanta yachachispan yanapasqanmanta (1 Tes. 2:7, 8). ¿Imaynatam tiempochakuchwan Bibliamanta estudiota qonapaq?
2. ¿Imatam rurasun Jehová Diosta anchata kuyaspaqa?
2 Diosta servinapaqqa tiempochakunam. Achkamá Dios serviyninchikpi rurayninchikkunaqa. Sapa semanam tiempochakunchik huñunakuykunaman rinanchikpaq, Diosmanta willakunanchikpaq, Bibliata leenanchikpaq hinaspa Diosta mañakunanchikpaqpas. Kaypi piensarisun: casarasqa kaqkunaqa tiempon mana haypaptinpas kuyasqan qosanpaqqa otaq señoranpaqqa tiempochakunmi. Ñoqanchikpas Jehová Diosta anchata kuyasqanchikraykum, kusikuywan maymantapas tiempota horqonanchik payta yupaychananchikpaq (Efes. 5:15-17; 1 Juan 5:3). Jesuspa nisqanman hinaqa, Jehová Diospa kamachisqantam rurachkanchiktaq Diosta servinankupaq runakunata yanapaspa (Mat. 28:19, 20). Chaypi yuyaymanaymi yanapawasun chay ruraypi kallpanchakunapaq.
3. ¿Imaynatam Bibliamanta estudiota qochwan imaraykupas tiemponchik mana haypawaptinchik?
3 Ichaqa, ¿imatam rurachwan onqosqanchikrayku, llamkayninchikrayku otaq congregacionpi achka rurayninchik kasqanrayku tiemponchik mana haypawaptinchikqa? Huk iñiqmasinchikkunam onqosqankurayku wakinpiqa yachachisqan runakunata ninku wasinkuman rinankupaq. Wakinñataqmi hinalla yachachinankupaq telefonontakama otaq computadorantakama estudiota qonku. Wakin iñiqmasinchikkunañataqmi mana atispanku congregacionpi huk kaqnin iñiqmasinkuwan rimanku paypa rantinpi Biblia estudiaqta yachachinanpaq.
4. ¿Imaynam tarikusun Bibliamanta estudiota qospaqa?
4 Pabloqa anchatamá kusikurqa hukkunaman Diosmanta yachachinanpaq tiempontawan kallpanta servichikuspanqa (Hech. 20:35). Paytaqa Tesalonica llaqtapi Diosmanta willakusqan allinpi tukusqanmi kallpancharqa Diosman graciasta qonanpaq (1 Tes. 1:2). Tiemponchik mana haypawasqanchikwan mana harkachikuspa Bibliamanta estudiota qospaqa, kusisqallañam Diospa munayninta rurasun.