Ama iskayrayaychu Bibliamanta yachachiypi
1. ¿Imanasqataq pimanpas ‘qoykunanpaq kachkaptinqa’ mana harkakunchikchu?
1 Jehová Diospa testigonkunaqa ‘qoykunanpaq kachkaptinqa’ manam harkakunkuchu, aswanqa Diospa Munaychakuyninmanta suyakuytam hinalla willakunchik (Pro. 3:27). Mayna allinmá Diospa munaychakuyninmanta runakunaman willayqa. Achka horata predicaspayki Bibliamanta qellkunata saqespaykipas otaq maylawpi willakuptikipas Bibliamanta estudiota qonaykiraqmi kanman. ¿Imanasqataq chayta ruranaykipaq mana kallpanchakunkichu?
2. ¿Imataq harkawanchikman Bibliamanta estudio qonanchikta?
2 Bibliamanta estudiota qonanchikpaq mana atisqanchikpaq hina hapikusqanchikmi harkawanchik otaq tiemponchik mana haypawananchikpaq hina piensasqanchikpas. Qatiqninpi consejokunawan yanapachikuspayá kallpanchakuy Bibliamanta estudiota qonaykipaq (Mat. 28:19; Hech. 20:20).
3. ¿Imanasqataq Bibliamanta yachachinapaqqa allin preparasqa kasqanchikmanta nichwan?
3 Manapaschá atiymanchu: Piensankipaschá Bibliamanta estudio qoyta mana atinaykipaq mana ancha educacionniyoq kaspayki otaq mana estudio qoyta atiqpaq hapikuspaykipas. Ichaqa, ¿yuyarinkichu punta pachak wata ukupi cristianokunaqa “mana ancha educacionniyoq kasqankuta”? Hinaspapas, paykunaqa Diosmanta allin yachachiqmi karqaku. ¿Imaynatataq yacharurqaku? Bibliaqa ninmi “Jesuspa puriqmasinkuna kasqankuta” (Hech. 4:13). Chaynamiki, allin yachachiq Jesucristomantam yacharurqaku. Paymantaqa ñoqanchikpas yachachwantaqmi, Bibliapimá qellqasqa kachkan yachachisqankunaqa. Mana ancha educacionniyoq kaspapas llapallanchikmi Diosmanta aswan allin yachachikuyninkunata chaskichkanchik (Isa. 50:4; 2 Cor. 3:5).
4. ¿Imatam Amosmanta yachanchik?
4 Wakin kutikunapiqa ancha reqsisqa runakunatam Jehová Diosqa anyarqa mana ancha educacionniyoq humilde runakunawan servichikuspan. Amosqa chayna willakuqkunamanta huk kaqninmi karqa paymá nirqa: “Manam ñoqaqa Diosmanta willakuqchu kani nitaqmi paykunapa castanchu kani. Ñoqaqa oveja michiqllam kani hinaspa purun higos rantikuqllam” nispa (Amos 7:14). Chayna kaptinpas Amosqa mana manchakuspanmi toro taytachakunapa sacerdote Amasiasman Diospa castigonmanta willarqa (Amos 7:16, 17). Chaynallamá ñoqanchikpas mana qonqananchikchu Bibliamanta yachachisqanchikqa Diospa ruraynin kasqanta hinaspapas paymi chayta rurananchikpaq yachachiwasunchik (2 Tim. 3:17).
5. ¿Imanasqataq Bibliamanta estudiota qonanchikpaq kallpanchakunanchik tukuy ima rurayniyoq kachkaspapas?
5 Tiempoymi mana haypawanchu: Cheqaptayá tukuy ima rurayniyoq kanki, ichaqa ¿manachu predicanaykipaqpas arreglota rurarunkiña? Bibliamanta estudiota qonaykipaq tiempochakuspaykiqa qawankipunim Diosta servispa ancha kusikunapaq kasqanta. Mayna kusikunapaqmi Diospa Palabran runakunapa vidanta cambiachisqanta qawayqa (Heb. 4:12). Jehová Diosqa kusikunmi runamasinchikkunata ‘cheqap yachachikuy reqsinankupaq’ kallpanchakuspa yanapasqanchikmanta (1 Tim. 2:4). Angelkunapas kusikunkum runakuna huchankumanta wanakuspa Diosta serviptinkuqa (Luc. 15:10).
6. ¿Imataq Diospa munayninman hina allin rurayqa kanman?
6 “Diosninchikqa munachkanmi llapallan runakuna salvakunankuta hinaspa cheqap yachachikuy reqsinankuta” (1 Tim. 2:4). Chaymi ñoqanchikqa yanapakunchik Diosninchikpa munaynin rurakunanpaq. ¡Mayna kusikunapaqmá! Chaynaqa, ¡amayá iskayrayaychu Bibliamanta estudio qoytaqa!