Valorwan predicasun, ichaqa hawka sonqolla kasun
1 Allin sonqoyoq runakunata predicaptinchikmi musyakunchik Bibliapa mana yachachisqanman hina iñisqankuta. Arí, valorwanmi predicananchik ichaqa ‘llapallanwanmi hawkalla’ kayta munanchik mana pitapas sientechispa (Rom. 12:18; Hech. 4:29). ¿Imaynatam valorwan predicachwan hawka sonqolla kaspa?
2 Kaqlla iñiyniyoq kasqanchikmanta musyarisun: Llampu sonqoyoqkunaqa manam rimaspaqa atipanakunkuchu. Runakunapa iñisqankunata yanqachayqa manam yanapawasunchu rimasqanchikta uyariwananchikpaqqa. Chaymi, pipas pantay iñiyninmanta rimawaptinchikqa, sumaqllatam rimachwan kaqlla iñiyniyoq kasqanchikmanta. Chaykunamanta rimaptinchikqa ichapas runapa sonqonta llampuyachichwan uyariwananchikpaq.
3 Ichaqa, runakunapa pantasqa iñiyninkumanta mana imatapas niptinchikqa, ¿manachum qepanchachkachwan cheqap yachachikuykunata? Manamá. Cristiano hinaqa manam runapa lliw pantasqa yachasqankunamanta atipanakunapaqchu kamachisqa kanchik, aswanqa Diospa Munaychakusqanmanta predicanapaqmi (Mat. 24:14). Chaymi sapa kuti pipas pantasqa iñiyninmanta rimawaptinchikqa manam atipanakunanchikchu aswanqa sumaqllatam tapuchwan imayna piensasqanta yachananchikpaq (Pro. 16:23).
4 Predicaspaqa respetakuq kasunchik: Wakinpiqa mana manchakuspanchikmi cheqap yachachikuykunamanta defiendenanchik. Ichaqa hawka sonqolla kasqanchikraykum penqaymanqa mana churanchikchu pantay iñiyniyoqkunata otaq pantay yachachiqkunataqa. Manataqmi piñakunanpaq hina rimaykunawanqa rimanchikchu. Yachasqanchikmanta hatun tukuyqa runakunatam harkan mana uyariwananchikpaq, ichaqa humilde hinaspa kuyapayakuq kayninchikmi allin sonqoyoq runakunata yanapanman uyariwananchikpaq. Runakunata respetasqanchiktam qawachisun iñiyninkuta respetaspa, chaymi yanapawasun predicasqanchikta uyarinankupaq.
5 Runakunata predicaspam apóstol Pablo iñiyninkuta respetarqa hinaspam kallpanchakurqa Diosmanta allin noticiakuna willasqan runakunapa sonqonman chayananpaq (Hech. 17:22-31). Nirqataqmi “mana ancha iñiyniyoqkunawan kaspaymi ñoqapas chayna kani paykuna gananayrayku, sapakamawanmi paykuna hina kani wakillantapas salvanayrayku” (1 Cor. 9:22). Ñoqanchikpas apóstol Pablo hinayá valorwan predicasun, ichaqa hawka sonqolla kaspa.