Lliwmanmi ‘willakunanchik’
1. ¿Imatam apostol Pablo ruwarqa qatipakunapaq hina?
1 ‘Diosman willakuynikita allinta cumpliy’ (2 Tim. 4:5, NM). Apostol Pabloqa mana recelaspanmi Timoteoman chaynata nirqa, Pabloqa anchatam kallpanchakurqa Diosmanta willakuypi. 47 watapi chaynataq 56 watakunapim kimsa kutita viajarqa predicastin chaynataq iñiqmasinkunata watukustin. Chaymantapas Hechos librom achka kutikama willakun Diosmanta willakuypi ancha kallpanchakusqanmanta (Hech. 23:11; 28:23). ¿Imaynatam ñoqanchikpas chaynata ruwachwan?
2. ¿Imaynatam lliw runakunaman predicachwan wasin-wasin rispa?
2 Wasin-wasin predicaspa. Wakin runakunaqa manaraqmi Diosmanta allin noticiakunata uyarinkuchu, paykuna uyarinankupaq ichapas predicachwan huk horakunapi. Tardeykuqta otaq semana tukuyta predicaspaqa ichapas qosakunawan parlachwan. Sapa wasipim pillawanpas parlarinapaq kallpanchakunanchik, chaypaqmi wasiyoqta mana tarispaqa anotananchik huk horakunapiña kutinapaq. Chaywanpas mana tarispaqa ichapas telefonowan qayachwan otaq watukuspa cartata saqechwan.
3. ¿Maykunapitaq predicayta atiwaq?
3 Maypipas predicaspa. Jehova Diospa testigonkunaqa lliwmanmi willanchik Diospa yachachikuyninkunamanta. Wakinpiqa willakunchik ‘callekunapim’ otaq ‘plazakunapim’ (Prov. 1:20, 21). Willakunchiktaqmi maypi kaspapas. Chaynata ruwaspaqa nichwanmi Diosmanta willakuypi anchata kallpanchakusqanchikmanta chaynataq ‘allinta cumplisqanchikmantapas’ (Hech. 10:42; 17:17; 18:5; 20:20, 21, 24).
4. ¿Imapaqmi yanapawasun Diosta mañakuyninchik chaynataq yuyaymanasqanchik?
4 Wakinpiqa manapaschá predicayta atisunchu manchapakuq kasqanchikwan otaq imawanpas sasachakusqanchikrayku, Jehova Diosqa entiendenmi chayna tarikuptinchik (Sal. 103:14). Chayna tarikuspaqa Jehova Diostam mañakunanchik valorwan pitapas predicanapaq (Hech. 4:29, 31). Chaymantapas mana manchakuspam predicasun Diospa sumaq willakuyninkuna estudiasqanchikpi yuyaymanaspaqa (Filip. 3:8). Chaynata ruwaspaqa astawanmi chaninchasun Diospa sumaq noticiankunata, hinaspa predicananchikpaqpas kallpanchasqam tarikusunchik.
5. ¿Imaynatam yanapakuchwan Joelpa willakusqan cumplikunanpaq?
5 Joel libropim willakurqaña Jehova Diospa castiganan manchakuypaq punchaw manaraq chayamuchkaptin mana imawan harkachikuspa tukuy hinastinpi Diospa llaqtan predicanankumanta (Joel 2:2, 7-9). Chaynaqa Diosmanta willakuyninchiktayá allinta cumplisun, chaytaqa manañam haykapipas ruwasunñachu.