Tapukuykunapaq kaq

◼ ¿Imatam warmachakuna ruwananku iñiyninkupi ñawparinankupaq?

Diosta serviq tayta-mamakunaqa anchatam kallpanchakunku Jehova Diosmanta warmankuman yachachinankupaq (Efes. 6:4). Sapa madrugawmi sapa punchawpaq textota estudianku, allinta yanapasqanrayku. Familiawan Diosta yupaychaspankum wakin familiakunaqa videota qawanku, Mozo-sipaskunam tapukunku niq yachachikuykunamantapas rimarinku chaynataq actuanku ñawpa tiempopi runakuna hina. Ichaqa warmakuna iñiyninkupi ñawparinankupaqqa astawanmi Diosmanta yachananku (Heb. 6:1).

Tumpata piensarisun predicasqanchik lawpi runakunaman yachachisqanchikpi. Chayllaraq watukuspa estudiachiyta qallarinapaqqa, yaqa llapanpim servichikunchik ¿Imatapunim Bibliaqa yachachin? niq librota. Chay librowan estudiachiyta tukuruspañataqmi ‘Diospa kuyakuyninpiyá takyasunchik’ niq librowan. ¿Imanasqam chay librokunawan yanapanchik? Yachachiq libroqa estudiaqkunatam yanapan Bibliapa yachachikuyninkunata reqsinankupaq, ‘Diospa kuyakuynin’ niq libroñataqmi yanapan Bibliapa nisqanman hina kawsanankupaq. Kay iskaynin qellqakunata estudiasqankuqa yanapanqam Jesucristopi hapipakunankupaq hinaspa ‘iñiyninkupi sumaqta takyanankupaqpas’ (Col. 2:6, 7). Allinmi kanman chay qellqakunata warmanchikwan estudiayqa. Paykunaqa yachanankum ñoqanchikpa rantinchikpi Jesuspa wañusqanmanta, Diospa Gobiernonmanta hinaspa wañuqkuna imayna tarikusqankumantapas. Yachanankutaqmi ñakarinanchikta Dios imanasqa saqesqanmanta hinaspa tukupay tiempopi kawsasqanchikmantapas. Manam iskayrayanankuchu Diosmanta yachasqanku cheqap kasqantaqa, chaynapim ‘allin hinaspa mana allin kaqtapas reqsinqaku’ (Heb. 5:14). Tayta-mamakunaqa warmanku wiñasqanman hinam yachachinanku. Ichaqa wakin warmachakunam uchuychankumanta Bibliapi sasa yachanapaq kaqkunata entiendenku (Luc. 2:42, 46, 47).