¿Imaynatam Jehova Dios qawawan?
1. ¿Imapim tupan Bibliawan espejoqa?
1 ¿Sapa kutichu espejopi qawakunki? Yaqa llapanchikmi sapa punchaw espejopi qawakunchik, chaymi yanapawanchik allinta allichakunapaq. Bibliataqa tupachichwanmi espejowan. Leeyninchikmi yanapawanchik imayna kayninchikta qawakunapaq, Jehova Diospas chaytam qawan (1 Sam. 16:7; Sant. 1:22-24). Diosqa reqsinmi piensasqanchikkunata hinaspa munasqanchikkunatapas (Heb. 4:12). Bibliata sapa punchaw leeyninchik hinaspa chaypi yuyaymanayninchikmi yanapawasun Diosmanta aswan allinta yachachinapaq imakunapi kallpanchakunamanta. ¿Imanasqam chaynata ninchik? (Sal. 1:1-3.)
2. ¿Imaynatam Bibliaqa yanapawanchikman imayna kasqanchikta qawakunapaq?
2 Bibliata servichikuy espejota hina. Diospa qawasqanman hina imayna kayninchikkuna allin kasqanta yachanapaqmi, yanapawasun ñawpa tiempopi Diospa serviqninkunamanta yachayninchik. Rey Davidmi Diospa sutin kuyasqanta qawachirqa (1 Sam. 17:45, 46). Isaiasñataqmi Diosmanta mana uyariy munaq runakunapa kasqanpi willakuyta munarqa (Is. 6:8, 9). Jesusñataqmi taytanta anchata kusyasqanrayku kusikuywan paymanta willakurqa (Juan 4:34). Punta pachak watapi cristianokunapas Diospi hapipakusqankuraykum, tukuy sonqonkuwan paymanta willakurqaku (Hech. 5:41, 42; 2 Cor. 4:1; 2 Tim. 4:17). Chaykunapi yuyaymanaymi yanapawanchik Dios serviyninchikpi imayna kasqanchikta qawakunapaq, chayman hinataqmi kallpanchakunanchik.
3. ¿Imanasqam chaylla cambiananchik?
3 Kallpanchakuy cambianaykipaq. Espejopi qawakuchkaspa mana allichakuyninchikqa manam allinchu kanman. Diospa yanapakuynintam mañakuchwan imayna kayninchikta qawakunapaq hinaspa chayman hina cambianapaq (Sal. 139:23, 24; Luc. 11:13). Chaytam utqayman ruwananchik tukupay tiempopi kawsasqanchikrayku hinaspa runakunapas mana wañunankupaq (1 Cor. 7:29; 1 Tim. 4:16).
4. Diospa Palabranwan qawakuspan cambiaq runaqa, ¿imaynam kanqa?
4 Jehova Diosqa qawan sonqonchiktam otaq imayna kayninchiktam (1 Ped. 3:3, 4). ¿Imaynam kasun Diospa Palabranwan qawakuspanchik imayna kasqanchikta cambiaspanchikqa? Bibliam nin: “Mana qonqaspa kasukuqqa mayna kusisqam kanqa tukuy ima rurasqanpi”, nispa (Sant. 1:25). Chaynaqa, Jehova Diospa ‘sumaq kayninta huk espejo hina’ qawachiptinchikqa, Diosmanta willakuyninchikmi kusikunapaq hinaspa allin kanqa (2 Cor. 3:18).