Allinta yanapanapaq: Biblia estudiachisqaykiman allinta estudiananpaq yachachiy

Imanasqam yachachina. Iñiyninkupi allin sapichasqa sacha hina takyanankupaqmi, chaypaqqa allintam estudiayta yachananku (Heb. 5:12–6:1). Allinta estudianapaqqa tiempochakuspam kallpanchakuna hinaspam yachasqanchik kaqkunata chayraq yachasqanchik kaqkunawan tupachina, chaynata ruwasqanchikqa yanapawasunmi yachasqanchikman hina allin kaqkunata ruwanapaq (Prov. 2:1-6). Biblia estudiaqkunapas kikinkum yachananku tapukusqankupa kutichiynin maskayta. Chaynata kallpanchakusqankuqa yanapanqam ima sasachakuytapas Diosta servisqankupi atipanankupaq (Luc. 6:47, 48).

Imaynatam yachachina:

Jehova Diosta mañakuspa yachachiyta qallariy, chaynata ruwaspam yachachinki Diosta mañakuyqa ancha allin kasqanta (Juan 14:26; 1 Cor. 2:10).
Yachachiyta qallarichisqaykimantapacha kallpanchay yachachinaykipaq kaqta allinta preparakunanpaq. Chaypaqqa qawachiwaqmi imayna preparakusqaykita utaq ima palabrakuna señalasqaykita.
Kallpanchay entiendesqanman hina rimarinanpaq. Amataq qillqapi kaq tapuykunaman hinallachu tapuypas.
Kallpanchay bibliata sapa punchaw leenanpaq. Internetpim jw.org nisqanpi kachkan bibliata sapa punchaw leenapaq yanapakuy. Bibliata sapa punchaw leeyman costumbranapaqqa anchatam kallpanchakuna, chayqa kikinchikpa allinninchikpaqmi (Sal. 1:2, 3).
Internetpi Leenapaq Qillqakuna nisqanpi tapukuyninkunapa kutichiyninta maskananpaq yachachiy. Yachachiytaq huñunakuykunapi estudiasqanchik qillqakunata letrachakunallawan tarinanpaqpas (símbolos).

Kay killapi kayta ruway:

Mayqin yachachikuymantapas yachachiyta tukuruspaqa yuyarichinaykipaq tapuy entiendesqanman hina rimarinanpaq. Pimanpas bibliamanta manaraq yachachispaykiqa bibliata utaq Willakuq qillqata leeruspa imamanta yachasqaykita yuyariy. Chaynata ruwaptikiqa imamanta yachasqaykim umaykipi takyanqa.