Imaynatam grabasqa kaqkunawan yanapachikuchwan
1. ¿Imataq kachkanña jw.org nisqapi?
1 Achka runakunam qillqanchikkunata internetpi jw.org nisqapi leechkanku (Ecl. 12:10). Grabasqapas kachkanñam, ¿uyarichkankiñachu chaykunata? Achka qillqanchikkunañam grabasqa kachkan. Chaykunaqa, ¿imakunapim yanapawachwan?
2. ¿Imaynatam grabasqa kaqkunawan yanapachikuchwan sapallanchik utaq ayllunchikwan estudiasqanchikpi?
2 Sapallayki utaq aylluykiwan estudiasqaykipi. Grabasqa kaq qillqanchikkunata uyariy viajaspapas utaq imata ruwaspapas (Efes. 5:15, 16). Allinmi kanman uyaristin mayqin qillqatapas wasikipi kaqkunawan estudiaspa leeynikichikqa. Sapallanchik estudiaspaqa grabasqa kaqkunawanmi yanapachikuchwan allin leeyta yachanapaq utaq quechua rimayta chayraq yachaspaqa astawan yachanapaq.
3. ¿Pikunataq astawan munanmanku grabasqa kaq qillqanchikkuna uyariyta?
3 Diosmanta willakusqanchikpi. Willakusqanchik lawpim qillqanchikkunata leenanpaq mana tiempoyuq runakunata tarinchik, ichapas paykunaqa munanmanku grabasqa kaqkuna uyariyta. Wakinqa astawanraqmi uyariyta munanku rimasqanku idiomapiqa (Hech. 2:6-8). Wakin llaqtakunapiqa yachanankupaqmi uyariyta munanku. Hmong sutiyuq llaqtapi kaqkunam abuelonkupa chaynataq taytankupa imamantapas willakusqankuta uyarispanku yachanku, manataqmi chayllaqa qunqarunkuchu. África lawpi kaq runakunapas yachayta munaspankum willakuykunata uyarinku.
4. ¿Imakunatam tapukuchwan grabasqa kaq qillqanchikkunawan yanapachikuyta munaspaqa?
4 Sunqunchikpim tapukunanchik: “¿Allinchu kanman willakusqay lawkunapi grabasqa kaqkunata uyarichiyqa? ¿Pipas munanmanchu grabasqa kaqta internetnintakama apachinayta?”, nispa. Diosmanta yachay munaqmanqa quchwanmi grabasqata chaynataq papelpi kaqtapas, internetmantam grabasqa kaqtaqa hurqunanchik. Chayta pimanpas quspaykiqa yupanaykim hinaspam killa tukuyta hayka qusqaykimanta qillqanayki. Grabasqa kaqkunaqa manam uyarinallanchikpaqchu, yanapawachwantaqmi Diospa palabranmanta runamasinchikman tarpuchkaq hina yachachinapaqpas (1 Cor. 3:6).