Diosqa kasukuqkunatam yanapan

Ñawpaq tiempopi Diosta yupaychaq Moisesmi nirqa Diosta tukuy imapi kasukuptinchikqa paypas tukuy imapi yanapawananchikmanta (Deuteronomio 10:13; 11:27). Diostaqa kasukunchik manam manchakusqanchikraykuchu, aswanqa kasukunchik kuyakuq hinaspa yanapakuq Dios kasqanraykum. Arí, Diostaqa kasukunanchik payta kuyasqanchikraykum (1 Juan 5:3).

Diosta kasukuspanchikqa allinmi kasun. ¿Imanasqataq chaynata ninchik? Chaymantayá qatiqninpi yachaykusun.

1. DIOSTA KASUKUYQA ALLINNINCHIKPAQMI

Bibliam nin: ‘Ñuqaqa Diosnikim kani, allinnikipaq yachachiqnikim kani, maynin purinayki qawachiqnikim kani’, nispa (ISAIAS 48:17).

Jehova Diosqa unanchawaqninchik kasqanraykum allinta riqsiwanchik. Payqa yachanmi paypa yanapakuynillanwan allin kananchikmanta. Chaymi palabranpi qillqachirqa allin kanapaq ima ruwananchikmanta. Palabranta ñawinchaspa hinaspa ñawinchasqanchikman hina ruwaspaqa ima tantiasqanchikpas allinmi kanqa.

2. DIOSTA KASUKUYQA KUSISQA KANAPAQMI YANAPAWANCHIK

Bibliam nin: “¡Kusisqaqa kanku Diospa palabranta uyarispa kasukuqkunam!”, nispa (LUCAS 11:28).

Kay tiempopi achkallay-achka runakunam kusisqa kanku Diospa palabranpi nisqankunata kasukusqankurayku. Kaypi yuyaymanasun: España nacionmanta kaq huk runam piñakuqllaña karqa, warmichantapas nanay siminwanmi qaqchariykuq. Huk kutipim chay runaqa bibliapi Joseymanta ñawincharqa. Joseytaqa wawqinkunam chiqnisqankurayku sirviente kananpaq rantikururqaku. Chayna kaptinpas Joseyqa llampu sunqum karqa (Genesis 37-45). Chay España nacionniyuq runam nirqa: “Joseymanta yachayqa yanapawarqam mana chaylla piñakuq, kuyakuq hinaspa pampachakuq kanaypaq. Chaymi kunanqa warmichaywan kusisqa kawsakuni”, nispa.

Arí, bibliapa nisqankunam yanapawanchik runamasinchikkunawan allinlla kananchikpaq. Qatiqninpim chaykunamanta astawanraq yachaykusunchik.