¿Imanasqataq kuyakuq kananchik?

Llapallanchikmi Adanpa miraynin kanchik, chayraykum huk ayllu hina llapallanchik kanchik. Huk ayllu hina kasqanchikraykum Diosqa munan llapallanchik kuyanakunanchikta. Ichaqa kunan punchawpiqa kuyakuyqa manam qawakunchu.

¿IMATAM BIBLIAQA NIN KUYAKUYMANTA?

Bibliam nin: “Runamasikitaqa [...] kikikita hinam kuyanki”, nispa (LEVITICO 19:18).

Bibliam nin: “Hinallayá kuyaychik enemigoykichikkunata”, nispa (MATEO 5:44).

¿IMAKUNATAM RUWASUN RUNAMASINCHIKKUNATA KUYASPAQA?

1 Corintios 13:4-7 Diosqa niwanchik kuyakuq runa imayna kasqanmanta.

“Pipas kuyakuyniyuqqa pacienciakuqmi, allin sunquyuqmi”.

Kaypi yuyaymanay. ¿Imaynataq tarikunki pipas mana chaylla piñakuruspan kuyakuyllawan rimapayasuptikiqa?

Pipas kuyakuyniyuqqa “mana envidiakuqmi”.

Kaypi yuyaymanay. ¿Imaynataq tarikunki pipas imamantapas envidiasuptikiqa?

Pipas kuyakuyniyuqqa “manam kikillanpaq munaqchu”.

Kaypi yuyaymanay. ¿Imaynataq tarikunki rimasqaykitapas mana kaqpaqta hina hapiq runawan kaspaykiqa?

Pipas kuyakuyniyuqqa ‘manam ima mana allin ruwarusqankutapas yuyarayanchu’.

Kaypi yuyaymanay. Diosqa sunqumanta wanakuqtaqa pampachaykunmi. Bibliam Diosmanta niwanchik: “Manam wiñaypaqchu anyawasun, manam wiñaypaqchu piñakuwasun”, nispa (Salmo 103:9). Ñuqanchikqa kusisqam tarikunchik pipas pantasqanchikmanta pampachaykuwaptinchik. Chaymi ñuqanchikpas sientichiwaqninchik runata pampachaykunanchik (Salmo 86:5).

Pipas kuyakuyniyuqqa ‘manam kusikunchu mana allin ruwaywanqa’.

Kaypi yuyaymanay. Llakipi tarikuspaqa munanchikmi pipas llakipayawananchikta. Manamá munanchikchu ñakarisqanchikwan kusikunankutaqa. Chaymi ñuqanchikpas llakipi tarikuqkunataqa llakipayananchik.

Dios yanapawananchikta munaspaqa lliw runamasinchikkunatam kuyananchik. Paykunata kuyaspaqa lliw atisqanchikkunapim yanapaykusun.